الأحد، 7 يونيو، 2009

مولد سيدي اوباما


اسمحوا لي ان ادلي بدلوي في مولد سيدي اوباما

اولا الراجل فظيع يعني علي رأي العيال السيس مزززز اخر حاجة وده طبعا كان سبب ان معظم النسوان اتهبلت بجمال امه ومنهم بنات شغالين معايا في الشركة قالولي انا عايزة اتجوز واحد زي اوباما وده في نظري فايدة كبيرة علي الاقل لما يبقي فتي احلام البنات باراك اوباما احسن ما يبقي تامر حسني

ثانيا الكاريزما الفظيعة اللي خلت الراجل صرخ وي لاف يو اوباما

ثالثا الشغل الامريكاني بتاع الشاشات البلازمة اللي محطوطة بزاوية 99 يعني مش زاوية قايمة ولا زاوية منفرجة وده خلانا كلنا محتارين ازاي حافظ الكلام ده كله من غير ورق واتضح في الاخر ان هو كان بيقرا من الشاشة وبشتغلنا

رابعا الاربعين مستشار اللي كاتبين الكلام اللي الراجل قراه يعتبروا ناس فعلا مخهم ذهبي خصوصا ان فيهم كسنجر

خامسا اوباما كشفنا قدام نفسنا يعني لما يطلع واحد زي احمد المسلماني ويقول شعر وقصائد غزل في اوباما والناس تسأل ليه مع انه طول عمره بيشتم في امريكا واسرائيل وفي الاخر يطلع ان المسلماني بيشتغل مستشار اعلامي لأحمد زويل والدكتور زويل بيشتغل مستشار لأوباما والبيضة عند الفرخة والفرخة عايزة قمحة والقمحة عند الفلاح والفلاح عايز فلوس والفلوس عند الصراف ........ الخ الخ الخ



سادسا بقي المصريين شعب طيب يعني علي رأي نوارة واحد قالها ده كان بيصلي الضهر في جامع سيدي حسن وعندنا عم ابو ايمن كبير المثقفين في شارعنا قال ان هو كان بيعمل عمرة في السعودية قبل ما يجي علي مصر

سابعا الرئيس مبارك مازال يستطيع ان يختار ويحدد فهو قرر ان لا يحضر الخطاب نظرا لأن مكانة رئيس الجمهورية لا تسمح بأن يجلس وسط صفوف الجماهير لتلقي الخطاب وايضا لا توجد منصة ليجلس عليها فوق المسرح


ثامنا الانجازات الفظيعة التي حدثت وابرزها النافورة التي صنعت في اقل من عشر ساعات لآ وكمان وصلت لها المياه في حين ان المنطقة دي مفيهاش مية الناس تشربها


تاسعا واخيرا وده الاهم

الناس اللي متفقوش علي اي حاجة غير ان هم يختلفوا اتفقوا علي اوباما فخطابه تابعه المثقفون والصيع والشباب السيس والحزب الوطني وحزب الغد والاخوان المسلمين والاخوان المسيحين والاخوان البهائيين
وكل المصريين وكل الايرانين علي الرغم من ان بينهم مصانع الحداد
وبعد ما خلص الخطاب بتاعه راح كل منهم يمدحه في نقطة ويهجيه في الاخري فالمصرين قالو عنه انه لا يجب ان يصف المسيحين بالاقلية ومنهم ايضا من قالوا وي لاف يو اوباما

هناك 11 تعليقًا:

GeHaD-----(male) يقول...

realy y3ny
nice post & nice tawdi7 & nice no2t

شمس النهار يقول...

يعني لازم كل مره نحب انك تكتب بوست نخاللي
حد غريب يزور مصر
من ساعة الست الاسبانيه ماشوفناش
لك بوستات

اما الحاج اوباما وزيارته الغير ميمونه

من ضمن الفوائد كمان ده غير انك عملت البوست ان العاملين في اسرتي اخدوا اجازه
وقعدنا مع بعض:)

طب بزمتك في شعب احلا من كده يوافق انه ياخد اجازه بالسلاسه دي عشان بوب جاي يزورنا

اما الخطاب التهديدي اللي القاه نيافته علينا
بصراحه شديده هو مكتوب بعنايه يحسد عليها مستشاريه الافاضل
الحقيقه ماسابوش حاجه ماهديدوناش بيها

اما موضوع الجامع ده حركه امرييييكاني خالص بجد مافهمتهاش
صحيح هو تحفه معماريه ليس لها مثيل في العالم هو وتوئمه الرفاعي
وكمان مدافن العائله المالكه وكمان شاه ايران
بس برضه مش عارفه ايه سبب الزياره
طب الاهرامات ماشي لكن المسجد !!!!؟؟؟؟

اهي زياره عدت وخلاص
وبصراحه سلانا ابن الايه قبل واثناء وبعد الزياره
بس زعلانه منك ومن كل من قال عليه وسيم
ياعم ده شبه الرغيف المحسن:)

أنا حر يقول...

اوباما هو الكذبة الامريكية الجديدة للشرق الاوسط
تحياتي

صوت من مصر يقول...

نعم انه مولد وصاحبه غايب

محمود خاطر يقول...

حقيقي دي أول مرة أعرف ان اوباما كان بيقرا من شاشات
كنت منبهر بيه بصراحة
أحبطتني يا راجل
بس كويس انا كدا رجعتلي الثقة في نفسي يعني لما أبقي رئيس جمهورية مش هحتار أخطب خطاب حلو زي أوباما من غير الورقة ويبقي عندي كاريزما خاصة أحسن منه كمان
اشمعني هو يعني

جريدة الصباح العربي يقول...

انتهينا من اختيار الفائزين في مجالي الشعر والقصة القصيرة وذلك لعددنا الأول ولكن مازلنا نرحب بكل الأعمال لأن المسابقة دورية , من يريد أن تصل أعماله من مدّونته الى جمهور القراء فى مصر والوطن العربي , ارسل لنا أعمالك من قصة وشعر وخواطر الى البريد الألكتروني التالي
arabicsabah@yahoo.com
كما نرحب بمقالاتكم التي ستنشر فور ارسالها على جروب الجريدة وستصبح مفتوحة لمناقشتها بين القراء ... تابعونا على جروب الجريدة
http://www.facebook.com/group.php?gid=78080770039
انتظرونا قريباً في الاسواق
تحياتي
الصباح العربي

Tadwina يقول...

مرحباً / تامر
لقد قام أحد المعجبين بمدونتك بإضافتها إلى تدوينة دوت كوم، بيت المدونات العربية.

قام فريق المحررين بمراجعة مدونتك و تصنيفها و تحرير بياناتها، حتى يتمكن زوار الموقع و محركات البحث من إيجادها و متابعتها.
يمكنك متابعة مدونتك على الرابط التالى:
http://www.tadwina.com/feed/1350

يمكنك متابعة باقى مدونات تدوينة دوت كوم على الرابط التالى:
http://www.tadwina.com

لعمل أى تغييرات فى بيانات مدونتك أو لإقتراح مدونات أخرى لا تتردد فى الإتصال بنا من خلال الموقع ونرجو منك مراسلتنا للأهمية على الايميل
Tadwina@gmail.com.
لوضع البانر الخاص بنا على الصفحة الرئيسية لمدونتك حتي يستطيع قراءنا في مصر والوطن العربي من متابعة تدويناتك المستحدثة

و لكم جزيل الشكر،

فريق عمل تدوينة دوت كوم.
http://www.tadwina.com

سومه...مجنونه فى بلد عاقل يقول...

يا ابنى اهم شىء انت قوبته ان المصريين غلابه قلبهم ابيض ما بيصدقوا قشايه اوباما تييجى يفتركوا الفرج جه لكن على مين دا حربايه مش قشايه

لقد خلقنا الله احرارا يقول...

تصدق والله خسارة بعدك عن التدوين

موقع زواج يقول...

هههههههههههههههههههههههه
حلو اسم الموضوع دة

شكرا لك

محمد ممدوح يقول...

رائع


http://againsttantawy.blogspot.com/