الجمعة، 22 أغسطس 2008

حدوتة الكادر

اهلا بكم
بعد الفاصل الطويل والحاجات الكتير اللي حصلت مش حتكلم عن الانجازات اللي عملتها الحكومة وبراءة هاني سرور وممدوح اسماعيل وحريق مجلس الشوري اللي حيترمم علي حسابنا وبفلوسنا لكن عايز اجابة لأسئلة من بعض المدرسين عن الكادر
بس الاول قبل اي حاجة هو ايه حدوتة الكادر دي ؟؟؟
من حوالي 3 سنين كدة الرئيس مبارك اتمطع وراح رازعنا قرار من قرارته الصائبة دائما وقال ايه حيخلي الحد الادني لمرتبات المدرسين الف جنيه والحد الادني لمعاش المدرسين 500 جنيه والحافز 150% وطبعا القرار ده كان زي قرار العلاوة اللي فاتت يعني من الاخر اشتغالة
بس مع الوقت المدرسين حالتهم ادهورت اكتر من الاول فعملو بالمثل بتاع اليهودي لما بيفلس بيدور في دفاتره القديمة
ولما نكشوا في الدفاتر القديمة ايدهم جت بالصدفة علي قرار الكادر ومسكو فيه واخذو يطالبون بتحقيقه

وطبعا علشان الحكومة بتاعتنا ماشية علي مبدأ ان هي مش حتنفذ اي كلمة بتقولها راحت اخترعت بقي حاجة اسمها اختبارات الكادر
ونزلت نماذج امتحانات وكمان نزلت نماذج اجابة للامتحانات دي علي النت وبكدة تخلي المدرسين بالعافية يتعلمو كمبيوتر وانترنت علشان يقدموا علي النت في اختبارات الكادر وعلشان ينزلو نماذج الامتحان واجابتها من علي النت
طيب يعني ايه اختبارت الكادر ؟؟
الاجابة من احد المدرسين وهو انه حيختبر المدرس في 3 حاجات
( اللغة العربية - اختبار تربوي - مادة تخصص )
السؤال بقي اللي سألهولي احد اصدقائي من مدرسين مادة التربية الرياضية
( يعني الالعاب )
قالي بالنص انا راجل متخرج من اكتر من 10 سنين ولما كنت في الكلية دخل دكتور لغة عربية علشان يدينا مادة العربي اللي كانت مقررة علينا في التيرم الاول من سنة اولي كلية ضحكنا عليه ومرضناش نحضر ومن ساعة ما خلصت ثانوية عامة وانا ما فكرتش ابص في كتاب عربي جايين دلوقتي يختبروني في مادة اللغة العربية طيب انا بقي حستفاد ايه يعني وانا بوقف العيال في الطابور الصبح حقول زراعين امام رفعا مع وضع فتحتين علي حرف الألف ولا حعرب الجملة قبل تحية العلم ؟؟؟ ده السؤال الاول
السؤال الثاني قالي انا تخصص جمباز في الكلية جايين دلوقتي بعد ما طلعلي كرش يسألوني الاعصاب اليمفوية البيضاء سريعة الانقباض ولا بطيئة الانقباض ؟؟ ده السؤال الثاني
السؤال الثالث قالي ليه بقي الدكتور يسري الجمل وزير التعليم مدخلش الاختبارات دي ليه مش المفروض ان هو((( رأس الافعي ))) قصدي الرأس المدبر للوزارة ؟؟؟
السؤال الرابع علي لسان احد اساتذتي وهو مدرس لغة انجليزية والاستاذ ده كان مشهور ان هو في البيت كان بيكلم مراته انجليزي لأن هي كمان مدرسة انجليزي وفي الفصل مش بينطق ولا حرف عربي ناقص يشتري الخضار من السوق بالانجليزي قال طيب انا اصلا قربت انسي العربي ومش حستفاد بيه في الشغل خالص يبقي ليه بقي حتخليني امتحن عربي ؟؟
بالنسبالي انا بقي عايز اسأل سؤال هو حضرتك يا سيادة الوزير فاضي ومش لاقي حاجة تعملها؟؟ علشان كدة اخترعت حوار الكادر ولا بتحل مأزق وقعك فيه الرئيس مبارك ولا الموازنة العامة للدولة فلست ومفيش فلوس تصرفوها للمدرس
بلاش افترا على الناس الغلابة وبعدين مين اللى خرج الوزراء والريس مش هما المعلمين اللى انتوا بستهزءوا بيهم دلوقتى ؟؟
سوال اخر سيادة الوزير
ما رايكم عندما يقول طالب ابتدائى للمعلم انت هتروح تمتحن ثم يضحك ؟؟
علي فكرة حرام عليكم والله اللى بتعملوه فى الناس انتم قلتم كادر المدرسين قالت شكرا لكن عينكم فيه ده حرام مش قادرين عليه انتم احرار تقولوا كلام وانتم مش قده برضه انتم أحرار لكن تلعبوا بالغلابة ده ممنوع يا حكومة مش فاهمة حاجة وفى الآخر تقولوا برنامج الريس طيب ابقي سلملي علي الريس
واسأله هو المدرسين بتوعه اللي درسوا له السنين دي كلها وخلوه وصل لرئيس جمهورية امتحنوا كادر ولا لا ؟؟
غير بقي ان في حاجة قالهالي اخصائي اجتماعي ومحدش واخد باله منها
التربية الاجتماعية خلت اسئلة النماذج المرحلة الثانية من كادر المعلمين بأسئلة خاصة بها وهذا يعنى حرمان الاخصائيين الاجتماعيين من حصولهم من كادر المعلمين للمرحلة الثانية فهل هذا مقصود من وزارة التربية والتعليم ؟؟؟

ولما سئلت ناظر مدرسة اعدادية عن الكادر مكنش عايز يرد عليا ولما عرف اني حنشر الكلام علي النت رد عليا كادر ايه اللى انت جاى تقول عليه...يكفى احراج مكانة المعلم المصرى على مستوى العالم بعد ان كان يشار اليه بالبنان..جميع دول العالم كانت تتعاقد مع الحكومة المصرية على استعارتنا باغلى الاسعار فتشفط الحكومة اكثر من النصف ..اما الان..........حسبنا الله ونعم الوكيل ..ضاعت هيبة وشرعية وشرف المعلم المصرى ..من اجل 100 جنيه....اهوووو..مخرج وخلاص من قرار رئيس الجمهورية ...ولكن ما يحزننى اننا ثمار هذا القرار فى عقود قادمة من الاهانات والتجريح فى الدول العربية على وجه الخصوص ...ناهيك عن وقف الاعارات والتعاقدات الا بشرووووووط قاسية....ارجو من سيادة رئيس الجمهورية السيد\محمد حسنى مبارك بسرعة التدخل لايقاف هذه المهزلة الهزلية المبكية فى حق التعليم المصرى والمعلم المصرى

طبعا لو الكلام ده منفعش كالعادة والوزير عمل اللي في دماغه
فإليك ايها المعلم بعد النصائح

فى مقولة بتقول (يعيش المعلم ويتعلم) ودى الى ماشى بيها سيادة الوزير
1-لازم تذاكر كويس
2-تجهز قلمك ومسطرتك واستيكتك وقلم رصاص
3-لازم تسطر ورقة الاجابة كويس
4-تحسن خطك وتوضح الاملاء
5-لازم تقرا الفتحة واية الكرسى علشان تبعد عنك الشطان
6-اقرأ ورقة الاسئلة كلها الاول
7- لولقيت سؤال صعب سيبة للاخر
8-اكتب اسمك على ورقةالاجابة بوضوح
9-اكتب رقم جلوسك بوضوح
10-اعتمد على نفسك بس
11-اياااااااااكم ... والغش
12-لما تخلص سلم الورقة واخرج للى جاى يوصلك للامتحان واوعى تقلة الامتحان صعب (عييييب) وفى النهاية ربنا يوفق الكل
***
اخر الكلام خالص سألت واحدة جارتنا والدتها مدرسة قالتلي حرام عليهم مش عارفين ناكل كل ما نقول لماما اطبخي تقولنا انا بذاكر

الثلاثاء، 19 أغسطس 2008

BACK

BAAAAAAAAAAAAAAACK
البوست ده ملهوش اي لزمة غير اني بجد عايز اقول للناس اللي سألت عليا شكرااااا شكراااا شكراااا
وبجد وحشتوووووووني
واخص بالذكر ( حنان الشريف ) قطة الصحراء اللذيذة اللي بجد احرجتني بزوقها وذكائها
وكمان عايز اقول لرحاب ( APPY ) ربنا يخليكي للغلابة وبجد سؤالك عليا وانا مش موجود خلاني فرحان اوي
وكمان اللي عايز اقولها شكرا كتير امي الصغيرة واختي الكبيرة ( ام اياد ) سبهللة اللي بجد اول ما شوفت تعليقها كنت حعيط من الفرح
وكمان البنت همس المتغاظة طلعت جدعة اوي وسألت عليا
مش عايز انسي اي حد سواء كان سووو او تامر نبيل او ابراهيم او المهاجر او ملك الكبدة او اي حد سأل عليا خلال الشهرين اللي فاتو بس هو فعلا كانو اصعب شهرين مرو في حياتي بس الحمد لله عدوا خلاص حصل خلالهم حاجات كتير اوي بس للاسف انا كنت بمعزل عن العالم وانشاء الله حرجع تاني وحعمل نيو لوك بس بعد ما اخد فترة نقاها قصيرة
وكل سنة وانتم طيبين بمناسبة شهر رمضان وربنا يكرما ويقدرنا علي الصوم والطاعة خلال الشهر الكريم
اخيرا عايز اقول ان انا بجد عرفت قيمة الحكومة اللي انا ضدها علشان خلتني اعمل مدونة واتعرف علي ناس محترمين وشباب بجد خايف علي بلده ربنا يحميكم
ونلتقي بعد الفاصل