الجمعة، 22 أغسطس 2008

حدوتة الكادر

اهلا بكم
بعد الفاصل الطويل والحاجات الكتير اللي حصلت مش حتكلم عن الانجازات اللي عملتها الحكومة وبراءة هاني سرور وممدوح اسماعيل وحريق مجلس الشوري اللي حيترمم علي حسابنا وبفلوسنا لكن عايز اجابة لأسئلة من بعض المدرسين عن الكادر
بس الاول قبل اي حاجة هو ايه حدوتة الكادر دي ؟؟؟
من حوالي 3 سنين كدة الرئيس مبارك اتمطع وراح رازعنا قرار من قرارته الصائبة دائما وقال ايه حيخلي الحد الادني لمرتبات المدرسين الف جنيه والحد الادني لمعاش المدرسين 500 جنيه والحافز 150% وطبعا القرار ده كان زي قرار العلاوة اللي فاتت يعني من الاخر اشتغالة
بس مع الوقت المدرسين حالتهم ادهورت اكتر من الاول فعملو بالمثل بتاع اليهودي لما بيفلس بيدور في دفاتره القديمة
ولما نكشوا في الدفاتر القديمة ايدهم جت بالصدفة علي قرار الكادر ومسكو فيه واخذو يطالبون بتحقيقه

وطبعا علشان الحكومة بتاعتنا ماشية علي مبدأ ان هي مش حتنفذ اي كلمة بتقولها راحت اخترعت بقي حاجة اسمها اختبارات الكادر
ونزلت نماذج امتحانات وكمان نزلت نماذج اجابة للامتحانات دي علي النت وبكدة تخلي المدرسين بالعافية يتعلمو كمبيوتر وانترنت علشان يقدموا علي النت في اختبارات الكادر وعلشان ينزلو نماذج الامتحان واجابتها من علي النت
طيب يعني ايه اختبارت الكادر ؟؟
الاجابة من احد المدرسين وهو انه حيختبر المدرس في 3 حاجات
( اللغة العربية - اختبار تربوي - مادة تخصص )
السؤال بقي اللي سألهولي احد اصدقائي من مدرسين مادة التربية الرياضية
( يعني الالعاب )
قالي بالنص انا راجل متخرج من اكتر من 10 سنين ولما كنت في الكلية دخل دكتور لغة عربية علشان يدينا مادة العربي اللي كانت مقررة علينا في التيرم الاول من سنة اولي كلية ضحكنا عليه ومرضناش نحضر ومن ساعة ما خلصت ثانوية عامة وانا ما فكرتش ابص في كتاب عربي جايين دلوقتي يختبروني في مادة اللغة العربية طيب انا بقي حستفاد ايه يعني وانا بوقف العيال في الطابور الصبح حقول زراعين امام رفعا مع وضع فتحتين علي حرف الألف ولا حعرب الجملة قبل تحية العلم ؟؟؟ ده السؤال الاول
السؤال الثاني قالي انا تخصص جمباز في الكلية جايين دلوقتي بعد ما طلعلي كرش يسألوني الاعصاب اليمفوية البيضاء سريعة الانقباض ولا بطيئة الانقباض ؟؟ ده السؤال الثاني
السؤال الثالث قالي ليه بقي الدكتور يسري الجمل وزير التعليم مدخلش الاختبارات دي ليه مش المفروض ان هو((( رأس الافعي ))) قصدي الرأس المدبر للوزارة ؟؟؟
السؤال الرابع علي لسان احد اساتذتي وهو مدرس لغة انجليزية والاستاذ ده كان مشهور ان هو في البيت كان بيكلم مراته انجليزي لأن هي كمان مدرسة انجليزي وفي الفصل مش بينطق ولا حرف عربي ناقص يشتري الخضار من السوق بالانجليزي قال طيب انا اصلا قربت انسي العربي ومش حستفاد بيه في الشغل خالص يبقي ليه بقي حتخليني امتحن عربي ؟؟
بالنسبالي انا بقي عايز اسأل سؤال هو حضرتك يا سيادة الوزير فاضي ومش لاقي حاجة تعملها؟؟ علشان كدة اخترعت حوار الكادر ولا بتحل مأزق وقعك فيه الرئيس مبارك ولا الموازنة العامة للدولة فلست ومفيش فلوس تصرفوها للمدرس
بلاش افترا على الناس الغلابة وبعدين مين اللى خرج الوزراء والريس مش هما المعلمين اللى انتوا بستهزءوا بيهم دلوقتى ؟؟
سوال اخر سيادة الوزير
ما رايكم عندما يقول طالب ابتدائى للمعلم انت هتروح تمتحن ثم يضحك ؟؟
علي فكرة حرام عليكم والله اللى بتعملوه فى الناس انتم قلتم كادر المدرسين قالت شكرا لكن عينكم فيه ده حرام مش قادرين عليه انتم احرار تقولوا كلام وانتم مش قده برضه انتم أحرار لكن تلعبوا بالغلابة ده ممنوع يا حكومة مش فاهمة حاجة وفى الآخر تقولوا برنامج الريس طيب ابقي سلملي علي الريس
واسأله هو المدرسين بتوعه اللي درسوا له السنين دي كلها وخلوه وصل لرئيس جمهورية امتحنوا كادر ولا لا ؟؟
غير بقي ان في حاجة قالهالي اخصائي اجتماعي ومحدش واخد باله منها
التربية الاجتماعية خلت اسئلة النماذج المرحلة الثانية من كادر المعلمين بأسئلة خاصة بها وهذا يعنى حرمان الاخصائيين الاجتماعيين من حصولهم من كادر المعلمين للمرحلة الثانية فهل هذا مقصود من وزارة التربية والتعليم ؟؟؟

ولما سئلت ناظر مدرسة اعدادية عن الكادر مكنش عايز يرد عليا ولما عرف اني حنشر الكلام علي النت رد عليا كادر ايه اللى انت جاى تقول عليه...يكفى احراج مكانة المعلم المصرى على مستوى العالم بعد ان كان يشار اليه بالبنان..جميع دول العالم كانت تتعاقد مع الحكومة المصرية على استعارتنا باغلى الاسعار فتشفط الحكومة اكثر من النصف ..اما الان..........حسبنا الله ونعم الوكيل ..ضاعت هيبة وشرعية وشرف المعلم المصرى ..من اجل 100 جنيه....اهوووو..مخرج وخلاص من قرار رئيس الجمهورية ...ولكن ما يحزننى اننا ثمار هذا القرار فى عقود قادمة من الاهانات والتجريح فى الدول العربية على وجه الخصوص ...ناهيك عن وقف الاعارات والتعاقدات الا بشرووووووط قاسية....ارجو من سيادة رئيس الجمهورية السيد\محمد حسنى مبارك بسرعة التدخل لايقاف هذه المهزلة الهزلية المبكية فى حق التعليم المصرى والمعلم المصرى

طبعا لو الكلام ده منفعش كالعادة والوزير عمل اللي في دماغه
فإليك ايها المعلم بعد النصائح

فى مقولة بتقول (يعيش المعلم ويتعلم) ودى الى ماشى بيها سيادة الوزير
1-لازم تذاكر كويس
2-تجهز قلمك ومسطرتك واستيكتك وقلم رصاص
3-لازم تسطر ورقة الاجابة كويس
4-تحسن خطك وتوضح الاملاء
5-لازم تقرا الفتحة واية الكرسى علشان تبعد عنك الشطان
6-اقرأ ورقة الاسئلة كلها الاول
7- لولقيت سؤال صعب سيبة للاخر
8-اكتب اسمك على ورقةالاجابة بوضوح
9-اكتب رقم جلوسك بوضوح
10-اعتمد على نفسك بس
11-اياااااااااكم ... والغش
12-لما تخلص سلم الورقة واخرج للى جاى يوصلك للامتحان واوعى تقلة الامتحان صعب (عييييب) وفى النهاية ربنا يوفق الكل
***
اخر الكلام خالص سألت واحدة جارتنا والدتها مدرسة قالتلي حرام عليهم مش عارفين ناكل كل ما نقول لماما اطبخي تقولنا انا بذاكر

هناك 14 تعليقًا:

Desert cat يقول...

تامر استمارات كادر المعلم كنت انا اللى بطبعها لهم من على النت
وكانوا بيروحوا الادارة 3 او 4 مرات ويرجعوا يلاقوا فى الاستمارات بتاعتهم اخطاء ... اكتر الاخطاء الشائعه كانت فى الدرجة المالية او المؤهل مع البيانات دى داخله بمعرفة المدرسة والتابع ليها المدرس وكل مدرس ليه رقم مسلس ورقم سرى يعنى انا بطبعها جاهزه بس وهما بيروحوا يقدموها فى الادارة التعليمية
خلصنا من مرحلة الاستمارات دخلوا فى مرحلة الاسئلة والاختبارات
امبارح بنوتة فى كلية صيدلة لاقيتها بتتصل بيا بتقولى ممكن تجيب لى رقم الجلوس من على النت ولما سالتها جلوس ايه يا بنتى انتى مش اجازة قالت لى مش ليا ده لمامااصلها هتمحن الكادر
اخر حاجه علشان الرغى الكتير بتاعى ده
لاقيت واحده داخله على الستين جاية تقولى انا عايزة اطبع اسألة الكادر ممكن ؟؟
قولت لها لمين يا طنط قالت ليا يا بنتى ماهو بعد ما شاب وقعدت تقول كلام اكتر من نصه انت ذكرته فى البوست
وقيس على هذا المنوال
تحياتى

حاجات جوايا يقول...

بجد شر البلية ما يضحك

مش عارفين يهزاوا المدرسين بإيه ولا بإيه ؟
مرة برفع اعمال السنة وجعل المدرس ملوش سلطة على الطالب لغاية ما خلوا الطالب يعتدى على المدرس بالضرب والسب والاهانة والسخرية

ودلوقت بامتحان الكادر .. لما خلوا المدرس بقى ملطشة من الكل .. مش عيب ان الانسان يطور من نفسه كل فترة .. بس يعمموها بقى ويخلوا الدكتور يذاكر تانى والمهندس يذاكر تانى .. والمحامى والمحاسب وكله يذاكر من الاول .. اشمعنى المدرسين يعنى .. واهو الكادر يعم على الكل

وبالمرة رئيس الجمهورية يذاكر تانى عشان الفترة الجاية

دمت بخير اخى
سالى

tarek momen يقول...

قال الشاعر فيما مضي
قم للمعلم و فه التبجيل..كاد المعلم ان يكون رسول
اما ما يناسب الزمن الحالي
اشفق علي المعلم و اعطه بريزة..يكفي المعلم انه رجع تلميذا

Empress appy يقول...

عكسك فى الراى يا تامر بقى
انا عن نفسى بجد شايفه ان الاساس التعليم حتى لو كنا كبار
طبعا انا متختلفه على فكره التنفيذ ازاى بس متنساش ان فيه ناس بتقرأ غلط اساسا والله ومتعلمين
يعنى برضه مش كويس ان مدرس انجليزى ينسى اللغه
تامر باريس مش بيرضوا يتكلموا حاجه غير اللغه بتاعتهم فاهم احنا بوظنا اللغه خالص
يا راجل دا انا مش بعرف اقول كلمتين عربى صح على بعض ههههههههههههه
بس الوزير لاوم يعمل اى منظر وخلاص هو حتى لو عاوز يعمل ده يعمله صح بس دايما عندنا الفكرة بتتولد صح وتتنفذ غلط
حمد لله على سلامتك

شمس النهار يقول...

اناصحيح مش فاهمه موضوع الكادر ده
بس اناليه تحفظات
المدرس هوه اللي ضيع هبته بايده كان زمان المدرس محترم لييييييه
كان مثقف جدا لان ده كان حال اغلب المصريين ساعتها
المدرس كان مستوعب الماده العلميه اللي بيدرسها
مش حافظها وحافظ التنشين بتاع الامتحان
كنا لما نسأل المدرس اي سؤال كان بينبسط ويرد عشان كان متمكن
دلوقتي اللي بيسأ المدرس بيحطه في دماغه لآنه بيعتبره احرجه وعايز يطنطط عليه امام التلاميذ
صراع المدرسين علي الدروس الخصوصيه افقدهم هيبتهم امام المجتمع
كل اللي عنده ثانويه عامه بالذات بيكره المدرسين
المدرسين زمان كانوا بيختاروا يكونوا مدرسين
المدرسين دلوقتي نتاج مكتب التنسيق او
وكذلك الطمع في فلوس الدروس الخصوصيه
اغلب المدرسين فاقدي الشخصيه والقدوه
واغلبهم يجهلوا ابسط المجريات اصلهم مش فاضيين
للآن اذكر مدرسييني اللي كنا بندخل معهم في مناقشات جميله مش في المنهج اصلا
حتي انهم كانوا بيقولوللنا علي اسماء كتب نقراها
يعني علمونا المنهج وكمان ربونا ثقافيا
انابعتبر ان الامتحانات دي صحصحه لكل مدرس قفل علي عقله المنهج اللي بيدرسه وبس
ياريت يرجع للمدرس هيبته وهو اللي هيرجعها ماحدش هيرجعهالو
علي فكره انا مش بكره المدرسين انا امي مدرسه
انابس خايفه عليهم وعلينا لآن همه اللي بيطلعوا شباب البلد
وفاقد الشئ لايعطيه

محمد يقول...

الاثنين غلط
الحكومه الى بتعتقد وهى على خطأ أنه
يوجد لديها عمليه تعليميه

المدرسين الى متصورين أن الى بيقوموا بيه أسمه تعليم ,أن هما معلمين

الوزير الى متصور أنه كده حيرفع مستوى
موظفين الى درجه أعلى وبالمره يزوغ من مصاريف الكادر

والاخوة المدرسين الذين تنازلوا بأختيارهم عن وظيفة معلم وأصبحوا ملقن بأجر

وأهدى لهم جميعا أغنية

(كاتش كادر فى الالولو حب سمية حب لولو)

tamer.sala7 يقول...

قطة الصحراء
موضوع الكادر ده واحد قالي انه اكل عيش لناس كتير يعني الوزير و وكيل الوزارة والموظفين اللي في وكالة الوزارة واصحاب السيبرات اللي بتطبع الاستمارات بتاعة الوزارة ربنا يسهل لعبيدهD:
---------------------------------
حاجات جوايا
بصي يا سالي عايز اقولك ان المدرس هو اللي هزق نفسه من أول ما بدأ يدخل الفصل ينام او يشرب شاي وياكل سندوتشين الفول ومش بتكلم علي كل المدرسين وفي نفس الوقت مش كلهم وحشين والغرض من الكلام ده كله ااننا نقول للحكومة لما تيجي تعملي حاجة اعمليها بضمير بس مش اكتر
-----------------------------------
أ/طارق مؤمن
عايز اقول لحضرتك ان اي حد في مصر عايز البريزة مش المدرس بس وبعدين المشكلة مش في انه رجع تلميذ المشكلة في انه بقي مسخرة بسبب الموضوع ده
-----------------------------------
APPY
علي فكرة انتي كدة مش عكسي خالص انتي كدة متفقة معايا جدا لأن كلنا عارفين ان اثنان لا يشبعان طال علم وطالب مال لكن المصيبة فعلا في الناس اللي بتقرا غلط وبعدين مدرس انجليزي مش مطلوب منه يتكلم بالفصحي يعني مهو مش حيمثل مسلسل تاريخي في الفصل وبعدين انتي مش بتعرفي تقولي كلمتين عربي علشان انتي مش محتاجهم بس في الوقت اللي ح تحتاجي فيه الكلمتين دول اساسي انتي اللي ح تدوري علي حد يعلمك ده انا سيبت شغل في شركة كبيرة علشان عايزني اخد كورس تسويق وعلي حسابهم كمان قولت ايه الهبل انا راجل شغال في الدعم الفني مليش دعوة خالص بالتسويق ومش حينفعني لكن لما فتحت الشركة بتاعتي انا اللي بقيت مضطر اخد كورس التسويق لأن بقيت محتاجه في الشغل وزي ما انتي قولتي الفكرة بتتولد صح وتتنفذ غلط ربنا يرحمنا
---------------------------------
شمس النهار
مش لوحد اللي مش فاهمة موضوع الكادر ده في مدرسين مش فاهمين والمشكلة ان الوزير نفسه مش فاهم بس كل اللي عايز اقولهولك يا بختك بمدرسينك
--------------------------------
محمد
والله العظيم عندك حق في كل حاجة الاتنين غلط وانا اضم صوتي لصوتك في الاغنية المعبرة اللي انت اختارتها

همس يقول...

تعرف باه

ماما موجهه وبرضو ليها امتحان

ومارحتش

طب التوجيه برضو ايه علاقته بالكادر

دا شغل حكومة هبله


بجد انا لاول مره احمد ربنا

ان ما اتعينت مدرسه

تحياتى

شمس النهار يقول...

كل سنه وانت طيب
انت فين ماكتبتش حاجه جديده
رمضان كريم

غير معرف يقول...

كل سنه وانت طيب يا تامر

كل رمضان وانت اقرب لربنا

ورمضان كريم

وماتنسانى من الدعاء

حكيم النيل يقول...

المشكلة ان مافيش نقابة قوية تقف ضد المهزلة دى



كل سنة وانت طيب يا تامر

سبهللة يقول...

كل سنة وانت طيب يا تامر
اللهم بلغنا رمضان
وارزقنا صيامه وقيامه كما تحب وترضى
سلام عليكم

Alkomi يقول...

كل عام و انتم بخير بمناسبة شهر رمضان الكريم

رمضان كريم اعاده الله عليكم بالخير و اليمن و البركات

ليك فانوس عندي تعالى خده بسرعة يالا

panfilakairis يقول...

Top 10 casinos to visit in Vegas in 2022 - Mapyro
The first casino 경산 출장마사지 of its kind in the UK, 파주 출장샵 William Hill has opened 광명 출장샵 at the Grand Victoria 영주 출장샵 Hotel & Casino. The William Hill casino is 시흥 출장안마 an exclusive