الخميس، 5 يونيو 2008

دلع عيني دلع --- عز عملها وخلع


ويستمر مسلسل تدمير مصر على ايدي ابطال الحزب الوطني ومحتكري السلطه وينجح احمد عز ورفاقه من رجال اعمال سلطه حكومه الخراب الوطني ويفلتوا باموالهم المشبوهه التي امتصوها من دم الشعب المصري بمساعده الحزب الوطني وينجح نواب الشعب من الحزب الوطني ولااريد ان اقول انهم نواب شعب فالشعب منهم برئ ونعلم تماما كيف دخلوا المجلس واصبح نواب الحزب الوطني متواطئون مع المحتكرين في سرقه اموال الشعب حيث لم يفلح أحمد عز في الاجتماع الأساسي الذي أدرجت فيه جريمة الاحتكار ضمن جرائم غسيل الأموال. فهو اليوم في ذكري النكسة قام علينا بأجتماع عاجل للجنة التشريعة بمجلس الشعب برئاسة الدكتورة امال عثمان بألغاء المادة التي قضت بإدراج الأموال المتحصلة من الممارسات الاحتكارية علي قائمة جرائم غسيل الأموال. والاجتماع ده يعتبر الاول من نوعه في تاريخ مجلس الشعب حيث انه لم يستغرق اكثر من أكثر من ٧ دقائق ولم يحضره غير عدد قليل من نواب الحزب الوطني، ولم يحضره اي شخص من المعارضة وهنا واحتج النواب، الذين حضروا بعد انتهاء الاجتماع بدقيقة واحدة، ومنهم جمال حنفي، وعلاء عبدالمنعم، ومحمود عامر، وطلعت السادات، وأحمد ناصر، حيث أبدوا غضبهم لإبلاغهم بموعد الاجتماع قبله بساعتين فقط، دون تحديد ما ستتم مناقشته فيه. يعني اجتماع محدش يعرف عنه اي حاجة غير قبل المعاد بساعتين ولم يستغرق سوي سبعة دقائق والناس تحضر بعد ما يخلص بدقيقة واحدة ده ممكن نقول عليه ايه ولماذا يتفاني طباخين القوانين المسلوقة في بلدنا المريضة الي مساندة ومناهدة احمد عز بالقانون يعني ليه يعملو قانون يفيد بأن الممارسات الاحتكارية ليست خفية، وإنما علنية، وبالتالي فإنها لا تنطبق عليها فلسفة قانون مكافحة غسيل الأموال. لا وكمان الحكومة طلبت إعادة المداولة حول إضافة أموال الممارسات الاحتكارية إلي غسل الأموال، يعني المعارضة رافضة والشعب رافض واللجنة المركزية يوم الاحد الماضي ايضا كانت رافضة ولكن إرادة عز الحديدية المباركة أمرت بأن يتم عقد الاجتماع وعدم أعطاء الأعضاء إللي دمهم مش خفيف الفرصة ليحضروا ويعترضوا. وبالأمر تم حذف النص إللي معجبش عز في أول اجتماع. اسلوب ادارة البلد بالطريقه دي تدل علي شيئ واحد هو ان النظام الحاكم وحكومته وحزبه ولجنة سياساته ونوابه في مجلس الشعب والشوري واثقين تماما ان مافيش اخره ولا في جنة ولا نار ولا حساب ولا بعث بعد الموت
لأن اللي بيحصل ده ظلم بين ولا يرضاه حتي الشيطان
يعني الامل الوحيد اللي كان الشعب بيتعلق بيه وبيقول بكرة الحال حـ يتعدل ويجي اليوم اللي نعرف نرجع فلوسنا من عز خلاص مبقاش ينفع لأن الاحتكار دلوقتي بحكم القانون والدستور ليس عليه اي عقوبات وهذا الاجتماع ليس بغريب على لجنة اغلب اعضائها من الحزن الحاكم ومن نواب الاغبية ان تحذف وتضيف على هوا من يدير مصر وهو السيد احمد عز محتكر ثروات مصر من الحديد والسبب الرئيسى وراء باقى الاحتكارات والسبب الرئيسى فيما الت اليه الاحوال السيئة فى مصر من ارتفاع فى اسعار كل مناحى الحياة بداية من الارتفاع الجنونى فى العقارات الذى ينذر بكارثة اجتماعية محققة لا محالة انتهاءا الى ارتفاع اقل انواع الغذاء مثل العدس والفول . وكالعادة الاجتماعات المفاجئة التى لا يعلم بها اعضاء المعارضة الا قبل انعقادها بقليل لتاخذ نواب الاغبية حريتها فى اصدار ما تشاء من قرارات
عندما كنت في كلية التجارة علي ما اتذكر انه توجد مادة تسمي بالاقتصاد وفي ألف باء الاقتصاد توجد قاعدة اقتصادية تنص علي أن سوق المنافسة الكاملة لا يتوفر إلا إذا توفرت المعلومات لكل الناس واللي بيحصل في بلدنا ان مفيش معلومات لأي حد اصلا سواء من الاعلاميين او من الاشخاص العاديين فبالتالي لا توجد اي نوع من انواع المنافسات وده بيترتب عليه نتيجة واحدة وهي الاحتكار
ويعد الاحتكار والفساد ظواهر مرتبطة عضويا بأي نظام شمولي استولت فيه السلطة على مؤسسات الدولة وتسخرها لصالحها وأي نظام لايسمح لكل أصحاب مصلحة واحدة أن ينظموا أنفسهم في تنظيم يخصهم وأي نظام يستند على طبقة من ( رجال الأعمال ) أنشأها هو على نهب البنوك وضرب القانون بعرض الحائط وأي نظام يحتكر المعلومات لنفسه وهنا يتسائل بعض الشباب التي تسمهيم الحكومة بالقلة المندسة عن شئ واحد وهو الي متي سنظل نحارب طواحين الهواء ؟؟
فنحن في مصر يوجد لدينا مشكلة وهي أننا نحب أن نحارب طواحين الهواء وخيالات المئاتة. ودائما نشكو من الحكومة (التي نقصد بها الوزراء) ، ونشكو من الأغلبية في مجلس الشعب ، ونشكو من واضعي القوانين المشبوهة والموافقين عليها ، ونشكو من مزوري الانتخابات من غالبية الشرطة والقلة من القضاة والكثير من موظفي الحكومة ، ...إلخ والحقيقة أن القائم على الحكم حقيقة هم الأسرة الحاكمة وبعض أقربائها وأصدقائها من مراكز القوى التي قد لا يعلمها كثير من المصرين أما ما يتعاطى معه الناس ممن ذكرت أعلاه فهم خدم منتفعون تم تجمعهم وتبلورهم حول البؤرة الرئيسية ولا يملكون من الأمر شيء إلا في ضوء ما أعطي لهم من أوامر وسماحات وهم وكلاء أعمال للسادة الكبار الذين يأكلون معظم الوجبات ويتركون جزء منها للخدم بالطبع وهؤلاء الخدم يقومون أيضا بدور القناع (الماسك) الذي يرتديه السادة حتي إذا بلي وظهر سوءات ما تحته تم تغييره بقناع جديد صلاحيته لم تنته ولا أبالغ إن قلت إن هذا النموذج المحلي هو تقريبا النموذج العالمي للأنظمة الأجنبية الاستعمارية وأباطرتها فتلبس أقنعة من أنظمتنا الحاكمة لنا حتى تنأى بنفسها عن الاستبداد المباشر والاستيلاء على ثروات هذه البلاد وبالطبع أيضا تترك للخدم باقي الوجبات وتظهر هي بصورة الديموقراطية وحقوق الإنسان حتى إذا بلي القناع وأبدى ما خلفه من سوءات من يرتديه تم تغييره بقناع جديد وهكذا. فنحن الشعوب في آخر السلسة الاستغلالية. ... طيب ركزوا معي: ربنا قال عز من قائل: (ليميز الله الخبيث من الطيب ويجعل الخبيث بعضه على بعض فيركمه جميعا فيجعله في جهنم أولائك هم الخاسرون) عند صناعة الحديد الصلب في أفران الصهر يتم صهر المواد الخام التي يختلط بها الحديد مع الشوائب المضرة التي تضعف خصائصه ولا ينفع استخدامه بها ومع الصهر يرتفع الشوائب والمكونات الضارة على سطح المصهور وتكون طبقة تسمى الخبث (بفتح الخاء) ومع الصهر يتجمع الخبث وينفصل من الصلب ويطفو على السطح (ويعلو فوق باقي الحديد المصهور النقي) ثم في النهاية نميل الفرن قليلا فيسقط الخبث في مزبلة التاريخ ويظل الحديد النقي تنتفع به الشعوب ويصنع الدروع وأدوات الإنتاج يعني ربنا اللي قال طيب الحكومة بتاعتنا عايزة ايه ؟ انا متوقع ان السيد رئيس الوزراء سيلقي علينا بيان هذا نصه يا ايها المواطن العزيز لا تحشر نفسك فيما لا يخصك او فيما لا تفهم فيه...هل انت من المحتكرين او لك قضية غسيل اموال ....متبقاش غتيت وخليك فى حالك ومشاكلك ..العيش وحلينالك المشكله ومصارف المدارس وادينا بنحاول الثانويه وهنخليهالك سنه واحده بس خلى عندك دم وخليك خفيف ...يا سيدى المواطن تحدث عن مشاكلك فقط حتى لا توجع دماغك انت...لأن محدش هيعبرك وفى الاخر انت اللى هيجيلك المرض...احنا ورانا مشاكلك ومشاكل غيرك يعنى لازم تقدر ان احنا اللى شايلين كل المشاكل .عشان خاطرك انت بس احنا بننصحك وانت حر...عشان فيه حريه فى البلد...و...كفايه اننا سايبين القلة المندسة اللي اسمهم المدونين برة السجون لغاية دلوقتي وقد اعزر من انذر وهذا البيان يفلسف سياسة الاستاذ احمد عز رئيس لجنة الخطة والموازنة وهي
احتكار الحديد واحتقار الشعب
طيب في سؤال كدة صغير محشور في زوري وعايز حد يجاوبني عليه ؟؟
يعني قانون الطوارئ بقاله 27 سنة ومدوه سنتين كمان علشان قانون الارهاب اللي هو البديل بتاعه لسة متعملش
يعني قانون الارهاب يستغرق 29 سنة وقانون ممارسة الاحتكار يستغرق 7 دقائق ؟؟ في حاجة غلط ولا بيتهيألي
مهومن اللي بيحصل ده انا بقيت ضد الحكـومـة

هناك 13 تعليقًا:

Desert cat يقول...

يا تامر انا حاسه اننا بنأذن فى مالطة عمال نتكلم ولا نجيد سوى الصوت العالى لكن فعل بخ مفيش ... وهما خلاص عرفوا ديتنا واللى تعرف ديه اقتله .. احنا نذلهم ونعمل اللى احنا عايزينه وهما كبيرهم ايه .. هيهللوا شوية ويشجبوا يستنكروا وفى الاخر يتكتموا عز ميحتكرش حديد ويحتقرنا احنا كمان ليه ميعبروش المعارضه ليه ده كتر خيرهم كمان انهم قالوا لهم قبل المعاد بساعتين ده كدا كرم زيادة .. من الاخر احنا اللى نستاهل لاننا متهاونيين اوى فى حقوقنا مذلولين ومتهانيين وبرضه ساكتين

tarek momen يقول...

ياتري لو عملنا قائمة باعداء الشعب المصري ترتيب عز هايبقي رقم كام والسؤال الأهم هايبقي فيها كام اسم 100-200-1000سؤال صعب مش كده

Eldebug يقول...

ابوصلاح ... وانا فى وسط الامتحانات كده اتجنيت فى عقلى وقلت اروح اشيل الشوية الشعر اللى فوق دول ... ورحت للحلاق ... وكانت الندوة عنده فى اسعار الحديد ... وفى النص كده وانا بتاوب من الزهق ... واحد منهم خبط كلمة قعدت افكر فيها كتير اوى ... قال ايه احمد عز ده مجرد صورة بس فى الوش والشركة دى بتاع جيمى او علاء ... الا هوه صحيح ليه لأ ... ليه ميكونش الكلام ده صحيح ... هوه احمد عز ده طلع منين اصلا

maYHam يقول...

حلوة اوي السبع دقايق دولا

زمان نكسة الستة أيام ودلوقتي فضيحة السبع دقائق

في تقدم برضه وهي دي الحكومة الإليكترونية

Empress appy يقول...

عيب عيب كده ازاي تسال سؤال زي ده مش عيب عييييييييييييب
هما عملوها علشان قسمين مغ بعض يبقي تسال يبقى عيييييييييييب عليك

أميمة كامل يقول...

كل حاجة يا سيدى ماشية بالقانون

اتناقشت فى المجلس وأخذت حقها لكن

احنا مش كنا مركزين ولا واخدين بالنا

المرة الجاية نركز علشان فى خبطات

هاتعدى فى ثوانى

يوميات فنانه مفروسه جداا يقول...

اموت واعرف بيتكب دا كله في اد ايه وبتجيب المعلومات ديه منين

يا استاذ تامر ريح نفسك والله انا حاسه انك هطء خلاص ومش عارف تعمل حاجه

ربنا يكون في عون اصحاب الضمير الصاحي اللي زي حضرتك

وبعدين قانون ام طارق زي قانون ام ايهاب زي ما قالت اابي بالظبط يعني كلها اختلاف مسميات مش اكتر
ربنا يرحمنا برحمته والله

تقبل مروري انا جيت المره ديه من غير شياطين خرس ولا حاجه اهه

سلام

tamer.sala7 يقول...

قطة الصحراء
انا فعلا بدأت ازهق واتخنق من اللي بيحصل في البلد دي ده احنا لو بنأذن في مالطة كان حد رد علينا والله العظيم عمري ما سيبت حقي بس المرة دي حاسس اني عاجز ومش عارف اعمل اي حاجة
-------------------------------
طارق مؤمن
السؤال بتاعك مش صعب يا استاذ طارق يعني بكل بساطة ممكن نحسب عدد اعضاء الحزب الوطني + اعضاء الحكومة + كبار رجال الدولة + نواب مجلسي الشعب والشوري = اعداء الشعب المصري
--------------------------------
Eldebug
نعيما ده اولا
ثانيا احنا عارفين ان عز فعلا برافان لمبارك وثروته وفيه زيه كتير اوي بس برده البرافان ده ميعملش اللي بيعمله عز يعني عز اصلا كان طبال ومش ممكن طبال يعمل الفلوس دي كلها من شارع الهرم بس السؤال هنا مين تاني غير عز برده برافان
--------------------------------
أنا من كنت محتاجاً
لا واللي يغيظ اكتر انهم بقالهم 29 سنة شغالين في قانون الطوارئ ومش عارفين يعملو قانون الارهاب
---------------------------------
appy
والله العيب اننا ساكتين علي اللي الحكومة بتاعمله فينا انا بجد اتقهرت لما شوفت الموافقة بتاعة السبع دقايق دي وطلعت السادات داخل يقولهم طيب مش كنت تقوللنا قبل ما تطبخوها
-------------------------------
اميمة كامل
عندك حق يعني قانون يتناقش في 7 دقايق وقانون بقاله 27 سنة شغالين بيه مع انه المفرض انه استثنائي يبقي المرة اللي جاية ممكن يعملو اي حاجة في غمضة عين
--------------------------------
يوميات فنانه مفروسه جداا
بعد الشر عليكي تموتي ليه يا رب عز واللي زيه هم اللي يموتو كلهم بس اللي بيحصل في البلد فعلا كتير ولو فكرتي تكتبي في اي وقت حتلاقي حاجة تكتبي عنها وبالنسبة للمعلومات احنا بنعيش ازهي عصور الشفافية والحكومة ماشية بشعار من حقق تعترض ومن حقي مسألش فيك
انما بقي موضوع انك حاسة اني حتطق انا فعلا كدة بس مش عارف اتصرف
وبعدين انتي تيجي في اي وقت ده بيتك

شمس يقول...

مش عارف لية اللى بيحصل دة المفروض كل مصرى يخاف على بلدة ومش يحتكر ويخرب فيها

تحياتى

Tamer Nabil Moussa يقول...

ياعم تامر دة انا مش ملاحق عليك

هنعمل اية بس مصايب وبتحدف علينا.

ادعى ربنا يريحنا منها


تحياتى

Unknown يقول...

يا ابنى اصحى صحصح فووووق... السبع دقايق دول عشان يغزوا بيهم عين الشيطان بس الود وده اصلا يخرج يقول يا شعبى الصبور الحبيب الحبوب المهاود انا طلعت قرار ديكتاتورى رقم كذا ونصه كذاعلى راى محمد صبحى ولا اجتماع ولا يحزنون وبالنسبة يعنى ان احنا شعبه وكدة اه يا سيدى احنا شعبه ما بين الخيرين حساب وهو وصاحبه واحد... حد ليه شوق فى حاجة؟؟

tamer.sala7 يقول...

شمس
احنا عايزين اعادة توعية لكل حاجة في البلد
---------------------------------
تامر نبيل
يا باشا انت مش ملاحق عليا انا مش ملاحق علي الحكومة اللي مش عايزة تختشي علي دمها
-----------------------------------
انجي
ايه البلطجة دي ؟؟

غير معرف يقول...
أزال أحد مشرفي المدونة هذا التعليق.