الأحد، 8 يونيو 2008

ازمة مستشفي المطرية ** وتصريحات المسئوليين الجهنمية !!!!

بعد وفاة الاطفال الاربعة بوحدة المبتسرين بمستشفي المطرية نفي الدكتور محمد عوض، رئيس الشركة القابضة لكهرباء مصر، أن يكون لقطاع الكهرباء أي علاقة بحادث انقطاع التيار الكهربائي، عن مستشفي المطرية التعليمي، الذي تسبب في وفاة ٤ أطفال رضع
الموضوع ده من الاسبوع اللي فات بس انا مكنتش عايز اكتب عنه اي حاجة لأني مش عارف حيثيات الموضوع خالص بس بعد تصريحات الدكتور اللي قال فيها «إحنا بعيد عن هذا الموضوع، ولا علاقة لنا بوفاة الأطفال، فمسؤولية وزارة الكهرباء تنتهي عند العداد». بصراحة استفزيت طيب يا دكتور انا عايز اسأل حضرتك لما المسئولية بتاعتكم بتخلص عند العداد مين اللي مسئول عن الصيانة ؟؟ ومين اللي مسئول عن تشغيل العداد اللي مسئولية حضراتكم بتخلص عنده ؟؟؟ ثم أضاف: «يجيبوها يمين يجيبوها شمال إحنا بعيد، ولسنا سبباً في هذه العملية، فالتيار الكهربائي كان يصل إلي العداد الخاص بالمستشفي حتي الساعة الثانية صباحاً، وهو الوقت الذي توفي فيه الأطفال، أما ما حدث بعد ذلك فنحن لا نعلم عنه شيئاً». وقبل ما ارد علي الدكتور عايز اذكر حاجة صغيرة للاسف اننا لانتحرك الابعد حدوث كارثه.
بعد كل هذا التقدم من المؤسف انه يحدث انقطاع للتيار ومن الممكن ان تكون داخل مصعداو عياده لطبيب بها أجهزة أو--أو-- بغض النظر عن هذا الحادث
1- كل مستشفي يجب أن يكون بها مولد كهربى(ديزل) يعمل أوتوماتيك عند انقطاع التيار ويتم عمل الصيانه الكامله له كل فتره وتجربته كل أسبوع للتاكد من عمله فى حاله الطوارئ
2-كل مستشفى يجب أن يكون بها وحده UPS أيضا وهى تعمل فى حاله الانقطاع وعدم دخول الديزل أوتماتيك لسبب ما وهذه الوحده يتم توصيلها للأماكن الحيويه مثل غرف العمليات والعنايه المركزه وغرف الأطفال المبتثرين والاستقبال والطوارئ
وهذا لا ينفي المسئولية عن قطاع الكهرباء حيث انه في دول كثيرة اقل من مصر في المستوي الاقتصادي
3- يوجد لكل مستشفي عدد 2 خط كهرباء احدهم اساسي يعمل بنظام التوالي والتوازي والاخر يعمل بمجرد انقطاع التيار الكهربي عن الخط الاول وهي كهرباء مباشرة ( Static electricity )
يعني يا دكتور حضرتك تجيبها يمين او تجيبها شمال لازم يكون لوزارة الكهرباء دخل باللي حصل ؟؟
طيب حنقول ان الاطباء هم المسئولين ؟؟؟ رد احد الاطباء في برنامج العاشرة مساءا يوم الاربع بأن الاطفال ماتو مبتسرين يعني ماتو قبل ما الكهربا تقطع يعني بمعني اوضح المستشفي ملهاش ذنب و وزارة الكهرباء كمان ملهاش ذنب
طيب الاطفال دي ماتت ازاي يا دكتور يا بتاع الكهرباء ؟؟؟
طيب الاطفال دي ماتت ازاي يا دكتور يا بتاع المستشفي ؟؟؟
الاجابة حتبقي بعد تقرير الطب الشرعي واللي حيثبت ان الاطفال ماتو منتحرين
الله يرحمك يا سيدي يا عمر بن الخطاب رضي الله عنه كان يقول لو عثرت بغلة في العراق لكان مسئول عنها عمر في أيامنه الغبره كل مسئول يتنصل من مسئوليته واساتذه في الفزلكة ورمي المسئولية على الآخرين وبنفس البراعة لو كانت هناك نجاحات لتسابق عليها جميع الأكابر وكل ينسب النجاح لنفسه لان الفشل يتيم ما تلقيش له أب وموت أطفال داخل حضانة في مستشفى تعليمي في أي مكان في العالم يعني انتحار كل مسئول وأولهم وزير الصحة والوزير بتاع الاتجاهات يمين وشمال هو بريء أصله متعود على كده أنا كنت عايز أسمع كلام الوزير لو الأطفال دول كانوا أبناء مسئولين أو ابناء جاليات من خارج المخروسة - اقصد المحروسة لازم كان حيقول كلام تاني خالص
وهنا جدير بالذكر ان في دول اقل احتراما من مصر كانت استقالة الحكومة بأكملها لو حدث مثل ما حدث او علي الاقل كان استقال وزير الصحة و وزير الكهرباء او احدهم وده يبقي اضعف الايمان مش يتنصل كل منهم من المسئولية ونذكر اليابان عند حدوث زلزال 2004 استقال وزير الاسكان مع انه طبعا مش هو اللي عمل الزلزال ومكنش فيه اهمال في انقاذ ضحايا الزلزال لكنه لم يقدر علي تحمل مسئولية وفاة اشخاص

فهل نحن اقل من اليابان ؟؟؟ الاجابة معروفة وهي طبعا نحن اقل من اليابان
طيب هل نحن اقل من كندا التي استقال فيها وزير الخارجية لتركه وثائق سرية بمكان غير آمن ؟؟ والاجابة معروفة وهي ايضا نعم نحن اقل من كندا

هل نحن اقل من روسيا التي قدم وزير الدفاع استقالته لقرابته من رئيس الوزراء الجديد ؟؟؟
وهل نحن اقل من ايطاليا التي استقال فيها وزير الاصلاح بعد ارتدائه قميص مرسوم عليه الكاريكاتير المسئ للرسول( صلي الله عليه وسلم ) ؟؟
يذكر ان في كل الدول لم يتسبب اي من الوزراء السابقين في موت صرصار بسبب الاهمال وليس اربع اطفال
في وسط كل هذا والسيد رئيس الوزراء لم يعقب علي الموضوع بأي شكل ولم نري له اي تصريح سوي تصريح وحيد علي ظلال مؤتمر دافوس للمطرب تامر حسني حيث قال له «شرفتنا يا تامر وإحنا بنحب نتشرف بيك في أي تعامل باسم مصر ونعتبرك واجهة لبلدك». وهنا يهمس في اذني بعض الخبثاء كيف يصبح تامر حسني واجهة للبلد وهو مدان في قضية مخلة بالشرف ؟؟
كم كنت اتمنى ان يقال ذلك لعالم او عامل شريف وليس لطالب فاشل دراسيا مزور هارب من ضريبة الرجولة
وهنا اسئل احمد نظيف بماذا شرف تامر حسني مصر شرف مصر لانه تهرب من التجنيد ولا شرف مصر لانه مزور ولا شرف مصر لان اتهم في قضيه تمس الشرف ؟؟؟ لكي الله يا مصر
والله بالله تالله لو تشريف الدولة بالتزوير والتهرب من الخدمة العسكرية لفعلتها
وهنا ارد علي اسطورة جيله تامر حسني بس إلي قالك يا تامر انك شرفت البلد هو نفسه إللي ضيع شرف البلد و اتباعة علي اي صعيد خلال الـ20 سنة
يعني حضرتك يا دكتور نظيف مش شايف الاطفال اللي بيتقتلو بسبب الاهمال ومش شايف القوانين اللي بتتفصل علشان المحتكرين يهربو بفلوس الشعب ومش شايف العمال المعتقلين اللي لسة خارجين من السجون وما زالو يعانون من اثار التعذيب ؟؟
الي هذا الحد وصل التبجح بالحكومة المصرية ؟؟
الي هذة الحالة من الهذيان وصل السيد رئيس الحكومة والحكومة ؟؟؟
طيب انا لسة ضد الـحـكومة

هناك 24 تعليقًا:

الحقيقه المصريه يقول...

الف الف شكر يا تيمورا على تضامنك معي واشكرك على متابعتك للمدونه واتمنى ان تشاركني في فضح هذه الشركه خاصه بعد ما اقوم بنشر الصور التى سنقدمها للمحكمه
وعاشت مصر لابنائها وعاش ابناء مصر للدفاع عنها من المغتصبون

Desert cat يقول...

والله يا تامر هو انا بعد شوية التصاريح اللولبية الخزعبلية المهلبية دى ارجح ان الاطفال اول ما نزلوا للدنيا تسرب ليهم وهما فى الحضنات خبر غلاء الاسعار والبطالة والبنزين والجو حر نار قالوا نعمل انتحار جماعى احسن
كل واحد بيخلى مسؤليته وكان اللى ماتوا كلاب مش بنى ادمين
كل واحد بيلقى المسؤلية على التانى
ولا عندهم احساس بحرقة قلب اهاليهم واللى ممكن يكون فيهم لسه اول طفل يفرح بيه زوجين او طفل جه بعد زواج دام سنين طويلة او غيره و غيره وكل واحد الله اعلم بظروفه
حسبنا الله ونعم الوكيل

Unknown يقول...

طب وايه يعنى لما اطفال لسة ما شافوش الدنيا يموتوا من الاهمال؟؟
وللا ايه يعنى لما المسؤلين يتهربوا من المسؤلية؟؟
دى حاجات كلها تافهة وصغيرة الكارثة بجد اللى ممكن تاثر على سمعة مصر ان شريط تامر حسنى الجديد اتاخر و كدة الدكتور نظيف هيقلق واحتمال شرف مصر يكون فى خطر.... صباح الهبل

عبده الرايق يقول...

ههههههههههههه
الوزير بتاع ايطاليا يستقيل ده شىء وارد
اما عندنا
انا عمرى ماسمعت عن وزير استقال
يموت 4 اطفال يتحرق الناس فى القطر
يغرق الناس فى السفن
تولع تتحرق بجااااااااااااز
عيب قوى الوزير يستقيل
كلمه استقاله كلمه عيب قوى
وبعدين انت راجل اكبر مننا وعارف كل حاجه
بقولك صح
بما ان سنك 108 سنه
متعرفشى احمس هو اللى بنى الهرم ولا مين بالظبط ؟؟؟؟

Unknown يقول...

شكرا يا تامر على المعلومات المهمة دى واكيد كل واحد يتنصل من المسئولية وحتى لو اعترف بالمسئولية مش هيحصل حاجة برضة يبقى انت اكيد فى مصر
سلام

غير معرف يقول...

السلام عليكم

مش وحدك والله ضد الحكومة

عارف المقال دة حرق دمى مش علشان

الاطفال اللى ماتوا بسبب الاهمال بنشوف

من ده كتير ومفبش غير وسيلة واحدة

علشان نغير اظنك عارفها

اللى حرق دمى تامر حسنى

الهايف ابن ال...........

بلاش شتيمة علشان مدونتك وانا مش

بقصد تامر وحده لا هو وعمرو دياب

وهيفا ونانسى وروبى والشاب جيلاتى (

مش غلط مطبعى)

وغيرهم كتير

من اللى شوهوا سمعة البلد لدرجة ان

العرب بيجوا علشان .........


المهم اديى على كتفك وعلى كتف كل واحد

نفسه البلد تتغير للاحسن

تحياتى

Wael Salem يقول...

يا تامر يا ابني
كانوا عملوا حاجه لأف شخص وشوية ماتوا في العباره
واللي ماتوا في قطار الصعيد
واللي بيموتوا كل يوم علي النعوش العائمة إلي أوربا
واللي ماتوا في حرب العراق مع ايران (النعوش الطائرة)

يا ابني المواطن المصري مايسواش في نظر أي مسئول حبة الأسبرين اللي هياخدها سيادة المسئول عشان الصداع اللي هيجيله من التفكير في هذا المواطن .


هحكيلك قصة صغيره
كان لما يجي حد من أمريكا .. كان لازم يسجل في السفاره ... وعرفت منهم ان الاجراء ده عشان لو حصل اي حاجه يعرفوا يوصلوله ... يحموه ... ياخدوا بالهم منه .

لما جيت امريكا ... روحت زي الباشا اتصلت بالقنصلية المصرية في هيوستن ... اللي المفروض انا تابع ليها .... بعد عدة محاولات ردوا ع التليفون
واحد بيقولي yes قولتله يا فندم انا عايز اسجل في القنصلية ... راح قالي تسجل ايه ؟ قولتله اسمي وعنواني
راح قالي انت محسن؟
قولتله لأ انا مش محسن
قالي ماتهزرش يا محسن
قولتله والله يا سيدي انا مش محسن
قالي طيب انت مين ؟
قولتله انا اللي عايز اسجل في القنصلية
قالي احنا مش بنسجل حد هنا
you in your own
قولتله شكراً يا حج وقفلت .



تحياتي

alshared يقول...

تكفي حسبي الله ونعم الوكيل

alshared يقول...
أزال المؤلف هذا التعليق.
.:.-=- ELGaZaLy-=-.:. يقول...

عارف يا تامر فى نظام فى اليابان

الوزير الى بيغلط بيعاقب نفسة يالموت

وعلى رايك ممكن وزير فى ايطاليا يستقيل فى مص ربيقالو بس...

منظر الاطفال كان يقطع القلب

حسبى الله ونعم الوكيل بجد

Yasser Hussein يقول...

بالرغم من مشهد وفاة الاطفال اللي يقطع القلب واللي أنا شخصيا مقدرتش أكمل مشاهدة الفيديو ع اليوتيوب
إلا إن الاطفال دي اترحمت من أيام عايشينها وايام ما يعلم بيها الا ربنا لسه هنعيشها احنا وعيالنا

حسبنا الله ونعم الوكيل في كل مسئول مهمل ولا يعاقب المهملين

خالص تحياتي

tarek momen يقول...

يا سيدي انت بتهرج
يعني ايه وزير يستقيل
يعني بيقول للحكومة كلها انتم ما عندكوش دم
ما هو لو كل وزير قصرفي اداء مهامه هايستقيل مش هايبقي في وزراء يمشو شغل الحكومة
ده اذا كان عندهم شغل
ثم من باب اولي ماالريس اللي عين الوزير ده يستقيل او يتنحي او يتقاعد او اي حاجة
ياسيدي عندنا الوزير يقال مش يستقيل

tarek momen يقول...

اه نسيت بالنسبة لننوس عين مامته تمورة حسني
انت ما تلومش عليه
ماهي الحكومة نفسها متهربة من اداء الواجب الوطني جت علي تامر
قال الشاعر " اذا كان رب البيت بالدف ضاربا - فشيمة اهل البيت كلهم الرقص"
بالمناسبة عرفت ان السنغال عاملة مؤتمر للمصالحة بين فتح وحماس
مش بعيد تسمع قريب عن دعوة دولة مدغشقر لمؤتمر التوافق بين عائلة المتولي وعائلة عبد ربه بناحية اسيوط لحسم الخلاف علي اسبقية الري
وذلك لانشغال الحكومة المصرية بمؤتمر ادفس و اجري
هأووووووو

tamer.sala7 يقول...

البور سعيدي
لا شكر علي واجب وربنا معاك ومع كل مصري غيور علي بلده
---------------------------------
قطة الصحراء
لو الوزير سمع كلامك حيعجبه فعلا ومش بعيد يطلع تصريح يقول فيه ان الاطفال كانو عاملين علاقات عاطفية وانتحرو علشان التكيف بتاع الحضانة اتعطل
-------------------------------
انجي
شرف مصر زي اللبانة بقي في بوق كل واحد شوية والكارثة اللي انتي بتتكلمي عليها دي فعلا حتأثر علي سمعة مصر
---------------------------------
عبده الرايق
الوزير بتاع ايطاليا استقال علشان الورق اللي كان المفروض يشيله في الخزنة غلط وشاله في الدرج واعتبرو ان ده تقصير في شغله انما عندنا الوزراء كلهم ماشيين بمبدأ احنا مبنغلطش والاعمار بيد الله
--------------------------------
ايمن بدر
المعلومات دي مش اكتشاف دي تصاريح للسادة المسئولين الكبار وكلنا عارفين ان مصر فيها كل الاهمال ده وساكتين
-------------------------------
عرفة فاروق السيوطي
وعليكم السلام
انا مش عايزك تتعصب وتضايق وتتنرفز بس اللي عايزك تعمله تدعي من قلبك علي ولاد الكلب اللي حيموتونا كلنا وهم لازقين في الكرسي وابن ..... تامر حسني الهايف ابن الهايفة فرحان بأنه شرف البلد مع ان ابن ..... اللي اسمه نظيف هو اللي ضييع شرف البلد وخلانا لبانة في بوق العرب كلهم وفي اوربا لغاية انهاردة فاتكرين ان احنا لسة بنركب الجمال لغاية دلوقتي
---------------------------------
المهاجر
انا مش غايظني الاهمال قد ما غيظني تصريحات المسئولين يعني مش كفاية اهمال كمان تنصل من المسئولية مع ان بداية التوبة الاعتراف بالخطأ ومعني انهم معترفوش بالخطأت يعني محدش فيهم اعلن توبته وده بينذر بكوارث تانية في الطريق اما موضوع موظفين السفارة دول معزرورين حنقول انهم شغالين بعيد عن العين وسايبهم لضميرهم والحاجات الكتير دي واذا كان رب البيت بالدف ضارف فشيمة اهل البيت هي الرقص المصيبة في الخرة اللي اللي شرف البلد في دافوس
---------------------------------
الشريد
محمود مش كفاية حسبي الله ونعم الوكيل كلنا بنتحسبن وكلنا بندعي عليهم بس لغاية امتي حنفضل نتكلم عايزين نتحرك
---------------------------------
الغزالي
انا مش فاكر ان في وزير واحد تم اقالته في مصر ولا حتي اجبروه انه يقدم استقالته
احنا معندناش سياسة الاعتراف بالخطأ
----------------------------------
أ/ ياسر حسن
انا معاك ان الاطفال دي اترحمت بس المشكلة في اهلهم اللي اتعذبت ربنا يصبرهم ويصبرنا ويهدي المسئولين يا ياخدهم
---------------------------------
أ/ طارق مؤمن
والله العظيم انا مش بهرج هو الارواح بتاعة الناس دي ملهاش تمن يعني كتير علينا اننا حتي نحلم ان يكون عندنا وزير واحد عنده دم يا استاذي انا اعلم جيدا ان في مصر الوزير لايستقيل مع العلم ان الدستور يحتم علي المسئولين اقالة المخطأ ولكني احلم بأن ينفذ الدستور

tamer.sala7 يقول...

أ/ طارق مؤمن
عند وائل المهاجر في مقال كويس اوي عن وفاة الاخت الكبري اللي هي مصر يا ريت تبقي تبص عليه في تلخيص كويس اوي لموضوع السنغال اللي بتصلح بين فتح وحماس انما دولة مدغشقر اللي حتصلح بين متولي وحسني لحسم الخلاف علي اسبقية الري
حضرتك عندك حق مهو احنا في عزبة
الحج ابو جمال

Tamer Nabil Moussa يقول...

هو مودى البلد فى داهية غير اللى بيتهرب من المسئولية والمفتج ويعمل فيها اعمى ومش شايف

ولكل ظالم يوم

تحياتى

صحفية روشة يقول...

النهاردة عيد ميلادى تعالو على مدونتى وسمعونى احلى هابى بيرث داى تو يووووووووو

Empress appy يقول...

بص يا تامر فيه اخبار بيقال انهم هيقيلوا الجبالى وزير الصحه انت عارف ان ده من الناس اللى تمتلك مصنع للاسمده اه والله بس بصراحه يعنى تلوث ايه مقولكش الادهى بقى انه بيقولك على الرغم من التلوث اللى بيسببه المصنع فى ابو زعبل انه كمان كده خفيف شوفت ازاى وطبعا ولا بيئه نافعه ولا غيرة قدام الوزير واخوه اللى بيديرة
وسلم ليه على التصريحات وان كله تمام يا فندم

Alkomi يقول...

تامر باشا

نورتني يابن بلدي

بالنسبة لرئيس الحكومة

هي فين الحكومة دي انت شايف حكومة يا كابتن

الحكومة فقدت في احداث غامضة و نزلولها اعلان مع السلامة و الكل داعي عليكي

بالنسبة للاطفال دول

كدة كدة كانوا هيموتوا بالكهرباء او الغاز الغالي او تحت سيارة بتمون بنزين خمسة و تسعين من ابو تلاتة جنيه الا ربع و الربع تيبس

كدة يعني

نصيبهم

شرفتنا و ماتقطعش

دعاء مواجهات يقول...

يعنى انت بتحلم علشان تقوول وزير

ومصرى

ويستقيل

يارباجل (تفمن بقك)

فال ال ولا فالك

بعيد الشر عنهم.......

تحيااتى ليييك

tamer.sala7 يقول...

تامر نبيل
انا مش متغاظ غير من احمد نظيف ده تقريبا عد فقع عينه
فعلا لكل ظالم يوم وربك مبيسبش حد
-------------------------------
appy
الاخبار دي عايز اؤكدلك انها مش صحيحة لأن الجبلي صاحب مصنع الاسمدة اللي في ابو زعبل هو نفسه صاحب مستشفي دار الفؤاد اللي بيتعالج فيها كل الكبار والمسئولين و بيعمل اعلانات ليها عادل امام في افلامه غير ان هو مش فارقة معاه اصلا اذا كانو بشيلوه ولا ميشيلهوش دي حاجة ترجعلهم انا بتكلم علي التنصل من المسئولية

غير الحروس الاسطورة نجم الجيل اللي شرف مصر بشهادة رئيس الوزراء اللي مش راضي يتدخل وعامل نفسه مش شايف ومفيش حاجة في دماغه غير دافوس وتيمو
---------------------------------
محمد الكومي
الحكومة ماتت ولازم تسلم نفسها
انا مش صعبان عليا الاطفال قد ما صعبان عليا اهلهم بالنسبة للبنزين ابو 3 جنيه الا ربع سمعت ان الناس بتوع شارع الرحمة اللي في كرموز بيسرقوه من العربيات المرسيدس والـ بي إم وبيشربوه علي الريق
-------------------------------
دعاء مواجهات
والله فعلا بحلم بس الحلم مش صعب ولو بطلنا نحلم نموت وبداية المشوار ديما الحلم كل ده حلو بس لغاية امتي حنفضلنا راضيين وساكتين وحاطين جزمة في بوقنا

رامى اشرف يقول...

modo3 rA23 ya tamer
we alwa7d mosh 3arf amta nehaet alnas de alkesa de ha mosh 3araf at5ls amt
alnas de ht5le 3ndaha dm amta mosh 3arf
3moma rabena me3ak we me3ana

غير معرف يقول...

استقالة ايه بس وهما واخدين حسنى مثلهم

فى التناحه والزقة

ويعنى استبعد خالص ان واحد فيهم يغور بمزاجه

وحتى لو كدا زى ما حصل مره بس بصراحه مش فاكره مين تحديدا

حسنى نفسه رفضها وقلو خليك متلقح

( سمعت مره عن دا جايز تكون تهيئات )


اما بخصوص زفت الطين تامر عادى جدا

انه تلاقيه متنيل فى اى حافله ولا حاجه تبع الحكومة

زى ذكرى حرب اكتوبر مهو تامر وهيثم

اللى هربانين من الجيش هما اللى غنو فيها

دا طبيعى مهيا حكومة هبله هتجيب مين يعنى


بس تعرف انا ابتديت اشك فى حكايه

تامر حسنى دا

مش ملاحظ تشابه اسم ابوه مع ....


تحياتى

يوميات فنانه مفروسه جداا يقول...

ايه ده يا تامر مش عارف ايمة تامر حسني اللي شرف بلدنا
نو نو نو اخص عليك مش هوا اللي بيعمل لينا الاوغاني العاطشيفيه وبعملينا افلام تسلينا واحيانا كده اغاني وطنيه ومثل الشباب الاعلي في ضرب الشهادات بلا تعليم بلا نيله وبرضو علمنا ازاي يتهربو من الجيش
اخص عليك من الجريئ الشجاع اللي هيعلنا دا كله

وبالنسبه للاطفال عمرهم انت مش مؤمن بالقضاء والقدر ولا ايه استغفر الله العظيم يا رب
ربنا يعينك علي ضميرك الصاحي ده
ولنا الله ملناش غيره
حسبي الله ونعم الوكيل
سلام