الثلاثاء، 16 سبتمبر 2008

سؤال يفطر

طبعا كلنا تابعنا الكارثة بتاعة الدويقة وشوفنا تقاعص الحكومة او عجزها في مواجهة الازمة باجهزة الدفاع المدني او جهاز مواجهة الكوارث

وكلنا برده شوفنا حريق مجلس الشوري واللي برده عجز الدفاع المدني وجهاز مواجهة الكوارث في السيطرة عليه ؟؟

وقبل كل ده كان برده في غرق العبارة وبرده عجزت الحكومة واجهزتها المدنية في السيطرة علي الموقف وانتشال الجثث

وغيره وغيره وغيره وكانت الحكومة في كل مرة تستدعي فرق من الجيش يعني في حادثة العبارة الحكومة استدعت لانشات الجيش ومروحيات المسح والاستكشاف التابعة للجيش والقوارب المطاطية الخاصة بالجيش والفرق الطبية المرسلة من مستشفيات الجيش ويتم انقاذ المصابين عن طريق ضباط الجيش ومستشفيات الجيش وفي حريق مجلس الشوري برده كلنا شوفنا الطيارة اللي كان نازل منها الجردل البدائي اللي برده تابعة للجيش بس ماشي اهو عرفو يعملو حاجة بعد اشتعال النيران لمدة 8 ساعات و اخيرا في الحادثة بتاعة الدويقة حتي المخيمات اللي اتعملت علشان ينام فيها اهل الدويقة برده كان الجيش هو اللي عملها

طيب يعني من كل اللي فات ده شوفنا الجيش ينقذ الغارقين الجيش يسيطر علي الحرائق الجيش يأوي الجيش يعمل كل حاجة طبعا ده مش غريب علي قطاع بتنفس بالامر والنظام هو السمة الاجابية الوحيدة فيه وطبعا ده مش بيقلل من قيمة الجيش خالص ومش ده موضوعنا اصلا

طيب فين بقي اجهزة الدولة ؟؟؟ فين معدات الدولة ؟؟ في الموظفين اللي بيتصرف عليهم من خزينة الدولة ؟؟ فين فرق الاغاثة والطوارئ ؟؟
فين جهاز مواجهة الكوارث ؟؟ فين فرق وزارة الصحة ؟؟
فين اي حاجة مش بتاعة الجيش ؟؟
ده حتي شرطة المرور عجزت عن السيطرة علي الموقف في الشارع واستدعت الشرطة العسكرية علشان تسيطر لها علي المرور اللي هو شغلتها الاساسية

في اي دولة محترمة في حاجة اسمها إدارة الأزمات والطوارئ ولو اخدنا مثلا امريكا حنلاقي في كل ولاية ادارة للآزمات ولما تحصل مصيبة كبيرة يستدعو ادارة الازمات بتاعة الولاية ولو المصيبة كبيرة اوي وادارة الازمات بتاعة الولاية مش قادرة تسيطر علي الكارثة يستدعو ادارة الازمات الفيدرالية وكل ده بعد ما يفشل جهاز الدفاع المدني في مواجهة الكارثة
يعني مستحيل نلاقي واحد من المارينز اتدخل في حل اي كارثة داخل الولاية مهما كانت الكارثة دي ايه حتي لو كانت ضرب برج التجارة العالمي

طيب نرجع لمصر تاني
دلوقتي الفلوس اللي بتتصرف علي كل الاجهزة دي لزمتها ايه ؟؟
القوات المسلحة وظيفتها انها تعمل مخيمات للمشردين ولا تنقذ الغارقين ؟؟
ولو افترضنا ان وظيفة القوات المسلحة هي كل شئ حتي انقاذ الغارقين والمشردين . طيب مين اللي ح يحمي الحدود الخارجية ؟؟

انا حاولت الاقي اجابة ملقتش غير شتيمة في الحكومة و النظام السؤال بقي ..
****




هو الشتيمة في الحكومة و النظام بتفطر ؟؟؟؟

هناك 13 تعليقًا:

Alkomi يقول...

في فتواه الصادرة عن تجشئه نتيجة شربه المر من كيعانه من افعال الحكومة افتى فريسة الشيخ محمد بن لآل كومي بان شتيمة مثل هذه الحكومات انما تصب في مصلحة المواطن - من فضلك ماتفهمنيش غلط في موضوع المصلحة ده - لانها تنفس عن مكنونه الساخط على كمية القمامة و الزبالة في محيطه المجتمعي

Empress appy يقول...

انت معرفتش ان اسرائيل عرضت على مصر تبعت قوات انقاذ للناس اللى تحت الصخره
اممممممم
طيب ادينى قولت لك
بص هما لسه معتقدين ان مصر بلد امن وامان يا خويا بعيد عنك والفلوس دى بتتقلب يا عبد المعطى يعنى مش عارف
انا فعلا بيجيلى صاعقه لما اشوف العجز اللى فى اجهزة الدوله وخاصه المتخصصين
الجيش بيبنى كبارى وفى وقت قياسى كمان
طيب ما يشيلوا كله ويخلوا الجيش بس
اما الفتوى بتاعت الشتيمه فانصحك ببلاش عارف ليه لانها ولا تقدم ولا هتاخر بل بالعكس مع مرور الوقت هتجمد قلبك وتبقى الحاجات دى عادى هههههههه وهتلاقى نفسك بتشتم ليل ونهار على انه عادى هههههههههه

شمس النهار يقول...

ياسيدي ابقه اشتمهم بعد المغرب
او ادعي عليهم ساعة مغربيه
بس يااخي دول متحصنين ضد الشتيمه
وودن من طين وودن من عجين زي مابيقولوا

dr.lecter يقول...

انت من حقك تتم الحكومه وتنتقدها ببراحتك لكن افقهاء قالوا ماينفعش تخرج عن طاعه ولي الامر حتي لو هو كان فاسد الا لو والعياذ بالله اجبرك علي عصيان ربنا او فعل الفواحش

طبعا الحكومه منتهزه ان الشعب المصري بيسمع الكلام ومايقدرش يجادل الفقهاء فعلشان كده نازلين يخصوا فينا وفي اللي جابونا ويفقوا لنا البيض الملون قبل شم النسيم وكمان بيبحوا يهرجوا معانا بس تهريجهم اوفر شويه علشان كده بتفلت منهم زي ماحصل مؤخرا

يارب ادمها علينا خفه دم الحكومه وولي الامر بتاعنا ربنا ينتعهم بالسلامه قادر ياكريم

soly88 يقول...

محدش عارف مين بيحكم مصر
وكويس ان فاضل حاجه عدله شويه زى الجيش . وبعدين باريس حدود ايه اللى هيحميها هو يقدر يقرب من الحدود اصلا
البلد على فين محدش عارف ولا همه كمان
وعلى رأى على الحجار :
المصرى يصبر على الحاكم السو 30 سنه ويقول دول فكه

شمس النهار يقول...

لا اكيد في فيرس في المدونين
كل ماادخل عند حد الاقيه كسلان وماكتبش حاجه جديده زي
رمضان كريم قوي كده ليه

همس يقول...

ياااااااااااه

طب وربنا اصولك تفرح اصلا

وتكون فى مرحلة انشكاح على الاخر

دى مواقف كلها ممكن نزلطها بحبة مية ونقول ايه مصايب


انما افتكرت دا كلو ونسيت ان الحكومة استخدمة الجيش فى تنظيم وتوزيع العيش


ياراجل دول حكومة واطيه ومعفنه

وفالحه تعمل ميت منصب وتوزع فى ميت سفير

وتعمل وزرات ملهاش لازمة

وكلو بهدف لاسمح الله ترتقى بالبلد

لا طبعا علشان ترتقى بالفلوس اللى بيطفحوها

حارو ونار وسم فى جتتهم ولاد المفجوعه

يلا ارتحت خلتنى اشتم

اللهم انى صائمة

Desert cat يقول...

الاجهزة الامنية بتاعتنا دى سكر
اللى بيحصل من السادة المتسولين فى البلد عبارة عن اعلان صريح لاى حد عايز يحتلنا من الصبح ابعت حد يولع فى البلد والجيش هيروح يطفى وانتوا ادخلوا احتلونا وكل الظروف هتكون مهيأة لا تنزعجوا كثيرا

أنا حر يقول...

اجهزة الدولة ماتت مع الرجالة في الحرب
على فكرة شتيمة الحكومة مش بتفطر انا سألت في الموضوع ده
:)
تحياتي

عاشقة القمر يقول...

انا مش عارفه انو لشتيمة خليه بعد المغرب ههههههههه بس قول يارب تورني فيهم يوم قول حسبي الله ونعم الكويل هم في دنيا يستمتعو ولكن لهم حساب عند ربنا

nody يقول...

لا طبعا الشتيمه فى الحكومه ما تفطرش
ماهما دى شغلتهم انهم يتشتموا
هما ليهم وظيفه غير كده؟

Sweet Violet يقول...

نصيحه بلاش تشتم ادعى عليهم و ان شاء الله هانشوف يوم فيهم ونترحم بقى

لكن الشتيمه ولا هاتقدم ولا هتاخر ولو لازم لازم يعنى اصبرى لبعد رمضان مش معقول تضيع صيامك طول النهار عشان خاطرهم يبقى ضيعوا البلد وصيامنا كمان

عايش... ولكن !!!! يقول...

هتصلك بعم يتسائلون لما يكونوا جايبين اى شيخ من اللى بيحللوا اى حاجه واجيبلك فتوى منه علشان تقدر تشتم على طول :)
اما بقا بخصوص عجز الحكومه فبجد انا جبت اخر منهم ومبقاش عندى كلام اقوله