سلام مدور.....علشان السلام المربع بقة غالي

المقال ده هدية من العبد الفقير الي الله تامر صلاح اللي هو انا
للحكومة اللي انا مازلت ضدها وبقولها الف مبروك علي انها اقرت قانون المرور غصب عن الشعب والمعارضة
مع اني محتار ودماغي حتنفجر ازاي الحكومة اقرت القانون وهم اصلا مكنوش موجودين في الجلسة بتاعة مجلس الشعب بدليل ان الدكتور احمد فتحي سرور رئيس المجلس شد مع الدكتور مفيد شهاب وده اللي سمته جريدة المصري اليوم أول صدام بين «سرور» و«شهاب» بسبب غياب الحكومة عن مناقشة قانون المرور وقال سرور إنه سيضطر إلي اتخاذ إجراءات حادة في مواجهة الحكومة، للحفاظ علي كرامة المجلس، ووصل الأمر إلي حد تهديده بإلغاء الجلسة، غير أن الدكتور شهاب دخل في اللحظة نفسها، وقال ـ موجها كلامه إلي رئيس المجلس ـ «يعز علي أن تكلمني بهذا الانفعال يا سيادة الرئيس، وأنت تعلم أنني مريض وخرجت من القاعة للذهاب إلي الحمام.. وكنت أتمني أن تقدر هذا الظرف ولا تضطرني إلي الدخول في التفاصيل»، وأغلق شهاب الميكروفون الذي يتحدث فيه بعصبية. طبعا الدكتور سرور مسكتش رد علي الدكتور مفيد وقاله «أعرف أنك مريض.. لكنك غبت ساعة.. فهل كنت في الحمام طوال هذه المدة؟.. وكلامي بانفعال لأنني أحترم المجلس». وكلمة احترم المجلس دي مجتش علي مزاج الدكتور مفيد فبرده قرر انه ميسكتش ورد عليه وقاله «وأنا أحترم المجلس قدر احترامك له»، لكن سرور ختم المساجلة بقوله: «كان الواجب أن تستعين بأحد زملائك ليعاونك ويسد فراغك، لأن غياب الحكومة استهانة بكرامة المجلس». الي يغيظ في كل ده ان الكلام ده علي الهواء مباشرة قدام كل دول اللي بتشوفنا علي الفضائيات ولما الدكتور سرور حس ان شكله بقي وحش هو والدكتور مفيد يعني يقوله كنت فين يرد يقوله في الحمام يعني شكلهم مش حلو فبعد فترة، ذكر الدكتور سرور أنه طلب من الأمين العام للمجلس حذف انتقاداته للحكومة من مضبطة المجلس، مبررا ذلك بأنه لم يكن انتقادا رسميا، وإنما تم في إطار العلاقة الودية التي تربطه بالدكتور شهاب. المهم بقي ان القانون اللي اقره المجلس حيخدم الشعب جدا وطبعا الشعب ده متمثل في المهندس احمد عز
ازاااااااااااااااااااااااي ؟
الاقرارات دي تنص علي ان اقصى عمر لسيارات الاجرة هو العشرون عاما فقد ووافق المجلس وسط اعتراض المستقلين على احلال سيارات الاجرة وسيارات نقل الركاب التي مضى على صنعها عشرين عاما بسيارات حديثة وطبعا الكلام ده مرفوض بسبب وجود في مصر اكثر من نص مليون سيارة عمرها تجاوز الاربعون عاما وهذا ما يعني انه قد يتشرد اكثر من نص مليون اسرة وقد واكد نواب المعارضة ان كل سيارات نقل الركاب بين المحافظات هى سيارات بيجو مضى على صنعها اكثر من اربعين عاما واكدوا ضرورة ان تكون الحالة الفنية للسيارة هى الفيصل. لكن كلام المعارضة مجاش علي مزاج المهندس احمد عز وحس ان كلام المعارضة في تعارض لمصلحته اللي هي طبعا مصلحة الشعب فرد علي نواب المعارضة وقال اننا يجب ان ننظر للامام ونتخذ قرارات شجاعة لان السيارات القديمة معدل استهلاكها للوقود اكثر وحالتها اصبحت تشكل خطرا على المواطنين وهناك قلة فى قطع الغيار وصعوبة صيانتها واكد ان التحديث صعب ولكن يجب ان ننظر الى مصلحة المجتمع وهناك دول عربية كثيرة اخذت بهذا الاسلوب منذ عشر سنوات . واضاف المهندس احمد عز علي كلامه ان هذا الجدل حول هذه السيارات انه نفس الجدل الذى ثار منذ ربع قرن حول الغاء العربات الكارو. وده بيأكد قد ايه ان المهندس احمد عز متابع التطورات من ايام العربات الكارو الي الان وطبعا كلنا عارفين ان بعض ما العربيات القديمة ما تتكهن وتبقي خردة حيتعمل بيها ايه ؟؟؟ بس المهندس احمد عز والحكومة مذكرتش ان اصحاب السيارات الاجرة حيجيبو منين الفلوس بتاعة الاحلال مع العلم بأن المصري اليوم انهاردة نشرت في الصفحة الاولي خبران
تقرير رسمي: كل مواطن مصري مديون للخارج بـ٣٩٨.٥ دولار
وهنا يكمن خوف بعض الشباب وانا منهم يعني أنا دلوقتي معيش غير 25000 جنية علشان أجيب عربية و دة بعد جمعيات و حوارات و حركات بهلوانية أعمل أية دلوقتي علشان أركب عربية؟؟ أسرقها و أغير رقم الشاسية زي ماناس كتير عملت ؟؟ ولا أدخلها من بورسعيد و أدفع10000 جنية رشوة لتسجيلها زي مابرضة ناس عملت ؟؟؟ ولا ..... نعمل حوار عربيات المعوقين التي هي بدون جمارك و متخافش مهو انت حتكون ممضية علي شيكات بالمبلغ !!! ولا أمشي مظبوط زي ماكنت عايز و أستني كمان 8 سنين ؟؟؟ بس ساعتها حيصدر قانون بمنع سيارات البنزين و أعطاء قروض ميسرة لشراء
السيارات التي تعمل بشخاخ البرغوث !!
ويلاحظ في دولتنا العظيمة ممبوزيا العظمي ( مصر سابقا ) ان القوانين بتتفصل من اجل مخالفتها فقط والكبار فوق القانون اى القانون عباره عن سقالة يرتفعوا بها على الناس وكذلك القانون بالنسبة للغلابة سيف بتار فهو لايعرف غيرهم ليطبق عليهم وايضا القانون بالنسبة للسلطة التنفيذية سبوبة للتربح وشراء الفيللات والشاليهات والجرى ورا الستات وانفاق الاموال عليهم انفاق من لايخشى الفقر لأنها احسن من بير بترول لاينضب .كذلك القانون بالنسبة للامن ماسورة يتدفق عبرها من تغضب عليه السلطة الى المعتقلات والسجون ومنها فرع الى ماوراء الشمس .وفى الاول والاخر نحن نعيش فى غابة ليس للقانون فيها وجود مطلقا .انظرو الى القاهرة ماهى الا اكبر قرية فى العالم كما قالو علينا الطلاينه زمان لما للعشوائية والقذارة واللامبالاه واللامسئوليه فيها من حضور
وهنا السؤال من احد الشباب المصريين جدا اللي مش عارفين يعملو حاجة غير انهم يحبو البلد من غير اي مبرر
س : يعني لا أكل و لا شرب و لا مصيف ولاعيش ولا شغل ولا جواز ولا عربية ولاأي حاجة نعمل ايه ؟؟
مع مراعاة ان .... مفيش بلد عايزة تدينا فيزا علشان نغور في داهية يعني اقتراح السفر غير متاح
يعني مفيش اي حل غير اننا نضرب للحكومة تعظيم سلام علي كل اللي بتعمله معانا من مد حالة الطوارئ لأقرار تعديلات دستورية ودلوقتي قانون مرور حيشرد اكثرمن نص مليون اسرة ويحبس اكثر من 2 مليون شخص بس يا ريت لما نضرب السلام يكون سلام مدور .....علشان السلام المربع بقة غالي!!.