الأربعاء، 28 مايو، 2008

العلم نور فعلا ولا ( يكيل بالبادنجان )



قبل كل شئ برجاء كلنا نصلي علي النبي ( عليه افضل الصلاة والسلام )
الموضوع ده يا حضرات كبير فقد صرح الدكتور مفيد شهاب بصيغة الامر المغلظة وقال < احمدوا ربنا علي «الطوارئ».. والبلد لا يستطيع الحياة دونه لشهر واحد > وده يثبت ان الدكتور مفيد شهاب فاهم حاجات كتير اوي احنا كلنا موش فاهمنها وده طبعا بصفته راجل متعلم ومتنور ومخه شغال موش زينا احنا القلة المندسة اللي محدش فينا فاهم حاجة وبرده موش قادرين نفهم أهمية الحكومة الذكية الالكترونية وكلام الدكتور مفيد بيثبت ان العلم نور فعلا ولا ( يكيل بالبادنجان ) ... أشكر الدكتور مفيد جدا شهاب انه فهمنا الوضع وجاب التايهه وبحمد ربنا وببوس ايدى ( شعر ودقن ) ان انا عايش فى بلد الامن ( المركزى ) ... يبدو ان قانون الطوارىء ده طلع مهم وما نقدرش نعيش من غيره واحنا اللى طلعنا شعب غشيم وموش فاهم وظلمنا الطوارىء وسوأنا سمععتها ... وعندى رجاء من الدكتور شهاب لما الحكومة فى المستقبل - يعنى يديك طولة العمر - تفكر تلغى قانون الطوارىء ياريت يبقى بالتدريج و على مراحل مش مرة واحدة ليحصلنا صدمة
( اللاطوارىء) ودى ممكن تضرنا بجد وتأثر على الاصلاح والشفافية واحنا مش ناقصين
والسؤال هنا يعني حجة الدكتور مفيد ان قانون الطوارئ بيمنع الجريمة قبل حدوثها يا صلاة النبي
طيب اي محامي بيفهم او حتي مبيفهمش يعرف ان القانون يتعامل مع الجريمة ساعة حدوثها ( حالات التلبس ) او بعد حدوثها او عند الشروع فيها وده كلام ناس محامين كبار زي الاستاذ حافظ ابو سعدة انما قانون يمنع جريمة قبل حدوثها طيب ازاي ؟ مش فاهم يا جدعان
والمفروض كمان ان الدكتور مفيد كان يكمل جميله ويقولنا اذا كان هذا الكلام صحيح بمعنى انه كانت هناك جرائم تخريبية اجهضت فلماذا لم تقم الحكومة بالكشف عن تلك الجرائم واعلانها على الشعب حتى يكون على بينة من الامر وحتى لا يقولون ان هذا كلام مرسل لا اساس له من الصحة خاصة وان الثقة منعدمة بين الشعب والحكومة , اما قولكم انه لم يتم الاعلان عن هذه الجرائم منعا للشوشرة على سمعة مصر وحتى لايقال ان مصر غير مستقرة , فهذا القول لايصلح مبررا لعدم النشر اذ ان كلامك الان يفيد ان مصر غير مستقرة ولكن الحكومة تتستر على ذلك وتخفيه حتى لاتشوشر على نفسها , فكان من الافضل الكشف صراحة عن تلك الجرائم المبهمة اجلاءا للحقيقة وليس فى ذلك عيب بل ان فيه الدليل القاطع على وجود الارهاب وان الدولة تتصدى له بالمرصاد , اما التعتيم فليس فى صالح مصر , بقيت نقطة هامة جدا وهى ان قانون الطوارىء ليس معناه ارهاب المواطنين والبطش بهم وباسرهم بحجة ان البلد فى حالة طوارىء اقصد انه يجب الا يساء استعمال السلطة باسم قانون الطوارىء اذ ان قانون الطوارىء معناه انه لاتوجد ضمانات ولا حماية قانونية لاى مواطن فهو معرض فى اى وقت لان يجد نفسه تحت سيطرة الامن باسم الطوارىء والدليل علي كدة كريم البحيري وزمايله ايه تهمتهم وفين قرار حبسهم وايه حجة الامن لإعتقالهم غير قانون الطوارئ وبعدين يا دكتور مفيد حضرتك بتتكلم علي سمعة مصر عايز اقولك ان مد قانون الطوارئ فعلا دمر سمعة مصر وخير دليل علي كدة كلام شون مكورماك المتحدث باسم وزارة الخارجية الامريكية إن الرئيس حسني مبارك تعهد في حملة إعادة انتخابه عام 2005 ان يلغي حالة الطواريء. وقال مكورماك للصحفيين "إنه أمر مخيب للآمال أن يقرروا مد حالة الطواريء." يعني امريكا اللي حبيبة حضرتك مش عاجبها طيب وحنفترض ان كلام سيادتك صح والبلد تخرب لو الطوارئ اتلغت تفسر بأيه كلام سيادة اللواء أحمد ضياء الدين محافظ المنيا عندما اعترضت أكثر من 200 سيدة من قرية ميانة بمركز مغاغة في المنيا موكبه وطلبو منه طريقة لكي يوفر بها الخبز لأهل القرية رد عليهم الباشوات دخلوا في مجال المخابز ونجحوا منذ فترة في تشغيل عدد منها والاستيلاء علي الدقيق وبيعه في السوق السوداء.. ومين يقدر يقرب من الباشوات احب اعرف من سيادتك مين البشوات اللي يقصدهم سيادة اللواء مروج الشائعات وليه قانون الطوارئ لا يطبق علي هؤلاء البشوات ولا الموضوع فيه خيار وفاقوس مع كل الاعتزار لقطة الصحراء وكل اهالي فاقوس انما الموضوع لازم حد يفهمهولي ومعلش الحد ده لازم يراعي ان انا تعليم مجاني وفهمي علي قدي ويشرحلي نحمد ربنا علي ايه
( المفروض نصبر علي الابتلاء مش نحمد ربنا عليه ) ولو انا كلامي غلط حد يفهمني على ماذا يحمد المصريون الله على اتهام الشعب المصرى كله فى اى وقت وفى اى حين على انه متهم بالارهاب ؟ أم على معدلات التضخم التى يصرخ منها الجنين فى بطن أمه بفضل تلك الطوارئ ؟ أم على حكم العسكر للوطن بدلا من السياسيين ؟ أم على قتل الولاء لدى المواطن بسبب تلك الطوارئ ؟ أم على ضرب القاضى بالحذاء ( الجزمة ) بفضل الطوارئ ؟ أم على ضرب احكام القضاء عرض الحائط . بفضل الطوارئ ؟ أم على تأميم النقابات المهنية . وذلك بفضل الطوارئ ؟ أم على منع المرشحين من الترشيخ فى أى انتخابات قادمة . وذلك بفضل الطوارئ ؟ أم على تزوير ارادة الشعب فى اى انتخابات بفضل الطوارئ ؟ أم بسبب تجميد الاحزاب فى مقارها بدلا من تواجدها فى الشارع المكان الطبيعى لاى حزب فى العالم وذلك بفضل الطوارئ ؟ أم على توقف الحياة الطبيعية للمصريين من قضاء واساتذة جامعة وعلماء ومفكرين بفضل الطوارئ ؟ لاننا نعيش حياة طوارئ ؟ أم على تحويل مجلس النواب الى سكرتارية حزبية بدلا من نواب وطنيين يناقشوا مصلحة الشعب . بفضل الطوارئ ؟ أم على قتل اى ابداع يمكن ان ينتج فى يوم ما بفضل الطوارئ ؟ أم على تحويل مدنيين الى محاكمات عسكرية فى ظل الطوارئ ؟ أم على الاحتكارات التى سادت مصر فى كل مناحى الحياة . بفضل الطوارئ ؟ يا د مفيد ان كان الطوارئ لمكافحة الارهاب كما تدعى فاقول لك ان الطوارئ اكبر زريعة للارهاب . وأسأل حضرتك سؤال استحلفك بالله ان تجيب عليه بصراحة شديدة امام الله وامام الشعب . هل انت مقتنع بالطوارئ ؟ واذا كنت مقتنع بيها طيب ما تفسر لنا مقتنع بيها ليه ؟؟ ويمكن نقتنع احنا كمان ونبقي مش ضد الحكـومـة

هناك 20 تعليقًا:

Desert cat يقول...

ايه يا تامر جايب سيرة بلدنا ليه فى وسط كلام الراجل الخرفان ده
ده واحد بيسقف للنظام حتى لو قال اجلدوا الشعب 3 مرات فى اليوم زى الدوا كدا ... والكلام ده للشعب مش لسيادته ولا لولاده لان البلد دلوقتى بلدهم هما بس الوزراء واولادهم وبالتالى عنده حق يقول قانون الطوارئ ده زى الفل ولو اتلغى مش هنعرف نعيش شهر هو بيتكلم عليهم برضه طبعا لو اتلغى الناس هتبتدى تفكر ويمكن تثور ماهو مفيش اى حاجه اسمها طوارئ وبالتالى مستقبله اهم ومن مصلحتة يبقى القانون كما هو عليه
منهم لله نفر نفر
تحياتى

Tamer Nabil يقول...

ياتامر ياصاحبى

وعد اية اللى يتصدق

مش انا وعدتك اجيب ليك كيس كراتية من يومين ومش جبت

يعنى ضحكت عليك ودة بقى على طول

ربنا معانا

خلينا نشوفك

تحياتى

appy يقول...

تامر انا هقولك انى بدأتاقتنع ان قانون ام طارق افضل بكتير من قانون ام ايهاب
عارف ليه بقى لان الاتحاد الارومتوسطى بيقال انه مش موافق على القانون بما انهم عاوزين يدخلوا مصر فى لاقصه
فقالك نمشى ام طارق شويه لغايه لما نظبط ام ايهاب
ربنا يستر الناس دى بتفهم بتفهم واحنا بامياجيه من يومنا هههههههههههههه

همس الاحباب يقول...

سعيد بزيارة مدونتك
واتمنى التواصل
يا باشا ولا اتفرق صؤارى ولا ارهاب
كده اناخد على قفانا
وكده اناخد على قفانا
ويمكن ربنا ياخدهم وريحنا منهم ومن كلامهم وتصريحاتهم وقوانينهم المطبوخة
تحياتى

همس الاحباب يقول...
أزال المؤلف هذا التعليق.
بنت مصريه يقول...

ههههههههههههههه
اسلوبك حلو قوى
بس عايزهم يلغوا قانون الطوارىء ليه
امال ضباط الشرطه
يفتروا عالناس ازاى
احييك

MATRIX يقول...

والله انا نفسى اهج واسيب الدنيا كلها علشان البلاوى دى..
شكرا لحضرتك على زيارة مدونتى واتمنى تزورنى دائما ..وعلى فكرة الفكرة بتاعتى انا بس وانا الى بنفذها ..

استراحة محمد يقول...

اغبى قانون فى الدنيا هو قانون الطوارىء ده
قانون اتعمل عشان يخالفوا من خلاله القانون
بدعلنا بالرحمة وبدعى ليهم بالهداية

.:.-=- ELGaZaLy-=-.:. يقول...

فى اية يا تامر بس مالك داخل غميق كدة...

يا عم قانون الطوارئ دة نعمة والله نعمة يا جدعان بالنسبة لقانون الارهاب الجديد دة...ربنا لا يكتبة على حد قول امين

بس الراجل دة بيتكلم نظريا صح يعنى تقريبا كات قالت وجة نظرى ..

لو مفيش خوف مش هايبقى في امان ليهم بس كدة

تحياتى يا جميل

tamer.sala7 يقول...

قطة الصحراء
الراجل الخرفان ده زهقني بتصريحاته اللي كلها نفاق ونفسي بدأت تتسد
----------------------------------
تامر نبيل
رسالتك وصلت يا تيمور بس كيس الكراتيه بتاع الحكومة شكله مش حيجي
---------------------------------
apyy
انتي فاهمة الموضوع غلط قانون الارهاب لو اتطبق يبقي لازم الحكومة تفرج عن المعتقلين السياسين لأنها كانت معتقالاهم بمقتضي قانون الطوارئ ومع الغائه يبقي مفيش مبرر لأعتقالهم وبما ان المعتقلين دلوقتي بقي فيهم عمال وطلبة وناس محترمة وتهمتهم انهم فكرو وقالو رأيهم والحكومة حست ان قانون الارهاب الجديد مفيهوش ولا بند او حتي مادة واحدة بتنص علي عقاب المتظاهرين والمربين علشان كدة مدو حالة الطوارئ تاني لغاية ما الترزي بتاع قانون الارهاب يشد حيله ويضيف الحاجات اللي هم مكنوش عاملين حسابها زي الفيس بوك والمدونين والمضربين والقلة المندسة
---------------------------------
همس الاحباب
نفسي ربنا ياخدهم ويريحنا علشان انا جدي الله يرحمه موصيني اوي علي قفايا
--------------------------------
بنت مصرية
ظابط الشرطة ده بياخد مرتب من الضرايب اللي بدفها انا وانتي وغيرنا المرتب ده علشان يشتغل عندنا مش علشان يفتري علينا
----------------------------------
ماتريكس
تفتكر لو الحل في الهجرة كان في حد فضل قاعد
هم بيعملو كل ده علشان يطفشونا ويوصلونا للحالة اللي انت فيها دي
مش حنسافر - مش حنسيب البلد - بنحب مصر
----------------------------------
محمد
والله قانون الارهب حيبقي اغبي منه والاغبي منهم هم الاتنين الشعب اللي راضي وساكت ومش عايز يتحرك
---------------------------------
الغزالي
انا عارف انه بيتكلم نظريا صح بس الحسنة الوحيدة في قانون الطوارئ انه كان حيجبر الحكوة انها تفرج عن المعتقلين وبعدين ده عامل قانون الطوارئ شمعاهة يعلق عليها كل اخطاء الشرطة

المـــفـــــــقــــــــوعـــــة مــرارتـهــا يقول...

طبعا قانون الطواريء مفيد جداً
عارف ليه ؟؟
لانه لو أتلغي مش هايبقي للحكومة أيد علي اللي يخالف السلطة .. والسلطة دي تبقي مييييين ؟؟
تبقي مبارك وأبنه وحبايبه ... يعني ساعتها لو حد اتجرأ وأتكلم هايبقي مافيش للأمن سلطة عليه ... ودي كارثة عشان أحنا شوية صعاليك لازم نتحرك بالكرباج ... ولساننا لازم يبقي مقطوع عشان نحافظ علي الأمن
بلد تخنق وريس يخنق ... وربنا يسترها علينا من قانون الطواريء

اجندا حمرا يقول...

شوف ياتامر جريده الدستور الأسبوعي قالتلها حكمه قانون الطوارئ ده محطوط من سنه 1981 و من ساعتها لا ساهم و لا حاجه في منع الارهاب بالعكس الارهاب زاد و حيفضل موجود للأسف

و اضافت الدستور ان القانون ده الحكومه بتقول حطبقه علي الارهابيين و الدستور بتقول انها حطبقه علي اصحاب الرأي المعارض و الايام بينا و حنشوف مين اللي كلامه صح

طبيعي مفيد شهاب يقول كده و اكتر من كده مش من الحكومه

appy يقول...

وهما هيغلبوا يعني يا خويا كون الانحاد رفضها يبقوا عاملين حسابهم لو شميت خبر عن القانون ده هقول على طول وانا ما اكتر التسسيح للناي دي عندي

باب النجار يقول...

الراجل كلامه زى الفل
عندك حق العلم نور
ودة واحد متعلم تعليم برة هو وعيلته واللى جابوه
وبيتكلم مع ناس لا قين تعليم برة ولاجوة ولا لاقيين حتى ياكلوا
انت ناسى ان مستوى الامية عندنا فى ازدياد عكس كل دول العالم
طبعا ماحنا لازم نكون سباقين فى حاجات محدش تانى غيرنا فكر فيها
احنا دولة خارج المنافسة يا تامر
ويجلعه عامر قانون ام طارق على قانون ام ايهاب على رأى آبى
وبعدين قاهرة المعز تم تعديل اسمها لقاهرة احمد عز واللى من مصلحته هو واللى مشغلينه ومشاركينه انهم يبصموا على اى قانون يمشينا بالجزم عشان يعرفوا يشوفوا شغلهم كويس
طبعا انت عارف ايه شغلهم
شغلهم نهب البلد لاخر مليم ولاخر مواطن
تحياتى ليك
وقبل ما تتكلموا اتعلموها بئى
جاتنا نيلة ملينا البلد وبقينا اكتر من البنى ادمين
=====
بمناسبة مدونة باب النجار تم تصليح الباب مؤخرا ياريت تروح تشوفه وتقولى رأيك

د/أبويحيى وادم يقول...

السلام عليكم ورحمه الله وبركاته
جزيتم خيرا على تحليلك لمجمل اخبار اليومين السابقين
اسلوبك طريف وجميل
وان شاء الله بيك وبينا كلنا يتغير بالعمل والعلم ان شاء الله

رئيس جمهوريه نفسى يقول...

بص ياابوصلاح المشكله مش مشكله علم والعيب مش فينا احنا الى مش فاهمين يحضرنى قول الفقيه مستر برايز فى الرائعه الخالده فيلم ثقافى
العيب فى النظام
العيب فى النظام
العيب فى النظام
العيب فى النظام

tarek momen يقول...

اذا كان هذا امر واجب النفاذ و يطبق علي الممتنع قانون الطوارئ
فاديني بقول بعلو صوتي "الحمد لله. الحمد لله . الحمد لله ثلاثا للتاكيد
مبسوط يا عم مفيد "مش عارف مفيد في ايه مع انه فشل يعمل قانون الأرهاب في الوقت المطلوب"
المهم بالنسبة لقانون الطوارئ
اعلان هام
بالأصالة عن نفسي و بالنيابة عن كل من يسمي طارق
احب ان اعلن انه لايوجد اي صلة بيننا و بين قانون الطوارئ
حيث دابت قلة مندسة علي محاولة الربط بين القانون المذكور والمكروه وبين اسمائنا
واني اذكركم "للتذكرة و ليس للعلام" انه هناك فارق كبير بين "طارق"و"طارئ "
واني احتفظ بالحق القانوني لمقاضاة كل من يحاول ذلك مرة اخري
زعيم الطوارق
طارق مؤمن

tamer.sala7 يقول...

المـــفــقـوعـــــة مــرارتـهــا
مش لازم يكون للسلطة اي ايد وبعدين عمر الخوف ما ولد احترام بس ديما الاحترام بيولد خوف ومصر مفيها ولا مسئول ممكن الواحد يحترمه غير محمد عبد السلام المحجوب وعمرو موسي
----------------------------------
اجندا حمرا
انا موافق علي قانون الطوارئ بس مجبر علشان مش عايز قانون الارهاب بس في كل الاحوال الاتنين مكروهين ومفيد شهاب عامل زي عرايس الماريونت
----------------------------------
appy
بالله عليكي تسيحي علي طول وربنا يكفيكي شر الكمين
----------------------------------
بابا النجار
فعلا بقت بلد احمد عز مش قاهرة المعز وبس
---------------------------------
د/ ابو يحي وادم
جزاك الله خيرا بس يا ريت وانت بتصلي تدعي علي كل ظالم ومفتري من المسئولين
---------------------------------
طارق مؤمن
اكيد الكلام ده موجه لأبي زعيمة القلة المندسة وصاحبة السبق في الربط بين الطوارق والطوارئ

همس يقول...

يا سيدى انت متخيل يطع يقول ايه

لا انا قانون الطوارئ وحش


دا ضربة السلك اصلا


خربها فى التعليم وجى يقرفنا بالطوارئ


عالم حولة وربنا


مدونة لذيذه

تحياتى

will يقول...
أزال أحد مشرفي المدونة هذا التعليق.