يوم التدوينة البيضاء

تضامنا مع مدوني تونس الخضراء

معاً ضد سياسة الحجب في تونس

ثقافة الحمامات

مسؤول في «الإسكان»: غياب ثقافة استخدام الحمامات سبب كارثة الدويقة

*

ده كان عنوان في المصري اليوم والمختصر بتاعه أن «السلوكيات الخاطئة وسوء التعامل مع دورات المياه بين الكثير من مواطني المنطقة المنكوبة، تسبب في (تلف مواسير الصرف الصحي)، مما أثر سلباً علي الهضبة.وأدي الي انهيارالصخور ................................................

انا حطيت نقط بدل الشتيمة علشان محدش يقول عليا قليل الادب . يعني بالصلاة علي النبي الناس الفقيرة الغلبانة اللى مش لاقيين ياكلوا طلعو هما السبب فى انهيار الهضبة عشان هم معندهمش ثقافة فى استخدام الحمامات

يعني سؤال رفيع كدة يا حضرة ( المسطول ) قصدي يا حضرة المسئول هو حضرتك متعرفش ان الناس دي مش لاقية الرغيف الحاف طيب حضراتكم ممكن توفروا ليهم رغيف العيش وبعد كدة اعمل ثقافة ازاي يتخلصو من الفضلات

يا رب حتي تعمل كتيب وتسميه ثقافة الحمامات والكتاب ده يتطبع ويتوزع علي طلبة المدارس والجامعات ويكون الامتحان فيه عملي ونظري وياريت حضرتك كمان توضح وجه الاختلاف بين دخول الحمام في الدويقة ودخول الحمام في مصر الجديدة ومنكم نستفيد يعني .

الكلام فكرنى بعضو مجلس الشعب الى قال على شهيد المحلة الذى استشهد داخل حدود منزله"عشان معندوش ثقافة اين يقف" وطلع الواد هو اللي غلطان

وبعدين هي الثقافة بقت في كل حاجة كدة حتي في دخول الحمام يعني حاشرين الثقافة في كل حاجة وبقت الحجة الوحيدة لأي مسئول ان الناس بقت مش مثقفة طيب يا حضرات المسئولين يا ريت بقي تعرفوا

ان احنا مش شعب اكسلانسات يعني مش مثقفين ومش ناوين نبقي شعب اكسلانسات يعني مش ناوين نبقي مثقفين ومش عايزين نبقي شعب اكسلانسات يعني مش عايزين نتسقف يعني خلينا الثقافة لأهل الثقافة وحوار الثقافة اللي طالع جديد وعايزين الشعب كله يبقي متثقف ده مش حينفع معانا

وموضوع ثقافة استخدام الحمامات ده مستفذ جدا يعني يا ريت بلاش يتكرر تاني ويا ريت متعترفوش بغلطكم اللي هو سوء حال البنية التحتية بس برده بلاش ترموها علي الناس وتقولو ان هما اللي مش عارفين يستخدموا الحمامات

ويا ريت يا حضرة المسئول الكبير تبقي تقولنا حضرتك بتستخدم الحمام ازاي يمكن احنا بنشخ غلط

*

انا مش مستغرب من تصريح المسئول اللي ألقي المسئولية علي اهالي الدويقة الغلابة لأن ده مبدأ وثقافه الحكومات الفاشله والتى تلقى بالوم على شعوبها وهى ثقافه ابتدعت منذ ثلاثون عاما لحفظ ماء وجه المسؤليين الفاشليين والعاجزين لكني استغربت من حجته هذه المرة فقد اقحم الثقافة في وسط لا يجوز ان ينطق هذا المصطلح بداخله

فكيف له ان يذكر الثقافة مع الحمام في جملة واحدة ؟؟

وسأضرب لكم مثال علي طول عمر المبررات الفاشلة الضعيفة الغير مقنعة : عندما وقف يوسف والى امام مجلس الشعب واعلن ان الاكتفاء الذاتى من القمح سيتحقق بعد سبعه سنوات. وبعد انقضاء السنوات السبع سئل والى لماذا لم نحقق هذا الاكتفاء فأجاب ان الزياده السكانيه هى السبب.

وهنا يهمث في أذني احد الخبثاء بأن هذه اللهجة ما هي الا تثبيت لمبدأ العجز

فـ يا ايها المسؤل أين كنت سيادتك عندما انهارت اول صخره عام اربعة وتسعون ولماذا لم تقم بالتوعيه المنشوده منذ أربعة عشر عاما . ام انك كنت منتظر ان تعاقب القتلى حتى لايفعلوا ذلك مره اخرى.

ماتقوله يعتبر هراء بكل معنى الكلمه ولايوجد مسؤل فى العالم يجرم شعب إلا فى مصر.

ثم أضاف المسئول: قررنا عمل حملات توعية للمواطنين في المنطقة بعد نقلهم لمساكن التطوير خلال المرحلة المقبلة، وذلك لتعريفهم بكيفية استخدام الحمامات والأحواض طيب حضرتك الحملة دي ح تبقي عاملة ازاي؟ ومين رئيسها ؟؟ ومين اللي حيشارك فيها وحيتسرق عليها قد ايه قصدي حيتصرف عليها قد ايه ؟؟ ومين ح يبقي الراعي الرسمي لحملة التوعية بثقافة الحمامات و يا تري لو جيبنا

الواد بتاع ميلودي يعمل اعلان تضامنا مع الحملة حيبقي شكله عامل ازاي ؟؟

***

نصيحة لكل مواطن برجاء استخدام البامبرز لحين الانتهاء من وضع أسس

الحملة القومية لثقافة الحمامات

عيد مبارك

كل سنة ومصر كلها بخير مسلمين ومسيحين بمناسبة العيد اللي هو ح يبقي يوم الاربع علي حسب ما اعلنت دار الافتاء المصرية ومنعرفش طبعا هم اعلنوا كدة ليه ؟؟ يعني بناء علي توجيهات الرئيس ولا حد تاني

مع العلم بأن اول ايام العيد هو الثلاثاء في كل من

السعودية والإمارات والكويت وقطر والعراق ( السنة فقط ) وفلسطين وليبيا والسودان والأردن واليمن والصومال وجيبوتي وجنوب نيجيريا و تركيا وبلغاريا والتشيك وسلوفاكيا وكوسوفا وسلوفينيا وإيطاليا والمجر ورومانيا ومقدونيا وصربيا والبوسنة والدنمارك وكينيا وأوغندا وتنزانيا وإثيوبيا والبرازيل وأمريكا الجنوبية وروسيا والصين.

وده طبعا بيدل علي تمسكنا وثبوتنا علي المبدأ وهو التأخر في كل شئ حتي العيد لازم نبقي متأخرين عن الناس كلها حتى الفرحة لازم تجيلنا آخر ناس , مع إننا أول شعب نفسه أى حاجه تفرحه وتخرجه من الذل والقهر اللى هو فيه

وللعلم فقط
U.S. Naval Observatory Astronomical Applications Department Sun and Moon Data for One Day The following information is provided for
Egypt - Cairo (longitude E30.1, latitude N31.2): New Moon on 29

September 2008 at 08:12 Universal Time.

نقلا عن موقع مرصد البحرية الامريكية

ولو ركزنا في الجملة الاخيرة
.. بتقول أنه فلكيا يولد القمر الجديد في القاهرة التي تم تحديد احداثياتها (خطوط الطول و دوائر العرض) بالاعلى في يوم 29 سبتمبر الساعه 8:12 وفقا للتوقيت العالمي ( نقدر نقول جرينش ) يعني الساعه 10 الصبح في مصر يوم الاثنين يعني الثلاثاء عيد

بس هم مرضوش يقولولنا علشان الحسد

سؤال يفطر

طبعا كلنا تابعنا الكارثة بتاعة الدويقة وشوفنا تقاعص الحكومة او عجزها في مواجهة الازمة باجهزة الدفاع المدني او جهاز مواجهة الكوارث

وكلنا برده شوفنا حريق مجلس الشوري واللي برده عجز الدفاع المدني وجهاز مواجهة الكوارث في السيطرة عليه ؟؟

وقبل كل ده كان برده في غرق العبارة وبرده عجزت الحكومة واجهزتها المدنية في السيطرة علي الموقف وانتشال الجثث

وغيره وغيره وغيره وكانت الحكومة في كل مرة تستدعي فرق من الجيش يعني في حادثة العبارة الحكومة استدعت لانشات الجيش ومروحيات المسح والاستكشاف التابعة للجيش والقوارب المطاطية الخاصة بالجيش والفرق الطبية المرسلة من مستشفيات الجيش ويتم انقاذ المصابين عن طريق ضباط الجيش ومستشفيات الجيش وفي حريق مجلس الشوري برده كلنا شوفنا الطيارة اللي كان نازل منها الجردل البدائي اللي برده تابعة للجيش بس ماشي اهو عرفو يعملو حاجة بعد اشتعال النيران لمدة 8 ساعات و اخيرا في الحادثة بتاعة الدويقة حتي المخيمات اللي اتعملت علشان ينام فيها اهل الدويقة برده كان الجيش هو اللي عملها

طيب يعني من كل اللي فات ده شوفنا الجيش ينقذ الغارقين الجيش يسيطر علي الحرائق الجيش يأوي الجيش يعمل كل حاجة طبعا ده مش غريب علي قطاع بتنفس بالامر والنظام هو السمة الاجابية الوحيدة فيه وطبعا ده مش بيقلل من قيمة الجيش خالص ومش ده موضوعنا اصلا

طيب فين بقي اجهزة الدولة ؟؟؟ فين معدات الدولة ؟؟ في الموظفين اللي بيتصرف عليهم من خزينة الدولة ؟؟ فين فرق الاغاثة والطوارئ ؟؟
فين جهاز مواجهة الكوارث ؟؟ فين فرق وزارة الصحة ؟؟
فين اي حاجة مش بتاعة الجيش ؟؟
ده حتي شرطة المرور عجزت عن السيطرة علي الموقف في الشارع واستدعت الشرطة العسكرية علشان تسيطر لها علي المرور اللي هو شغلتها الاساسية

في اي دولة محترمة في حاجة اسمها إدارة الأزمات والطوارئ ولو اخدنا مثلا امريكا حنلاقي في كل ولاية ادارة للآزمات ولما تحصل مصيبة كبيرة يستدعو ادارة الازمات بتاعة الولاية ولو المصيبة كبيرة اوي وادارة الازمات بتاعة الولاية مش قادرة تسيطر علي الكارثة يستدعو ادارة الازمات الفيدرالية وكل ده بعد ما يفشل جهاز الدفاع المدني في مواجهة الكارثة
يعني مستحيل نلاقي واحد من المارينز اتدخل في حل اي كارثة داخل الولاية مهما كانت الكارثة دي ايه حتي لو كانت ضرب برج التجارة العالمي

طيب نرجع لمصر تاني
دلوقتي الفلوس اللي بتتصرف علي كل الاجهزة دي لزمتها ايه ؟؟
القوات المسلحة وظيفتها انها تعمل مخيمات للمشردين ولا تنقذ الغارقين ؟؟
ولو افترضنا ان وظيفة القوات المسلحة هي كل شئ حتي انقاذ الغارقين والمشردين . طيب مين اللي ح يحمي الحدود الخارجية ؟؟

انا حاولت الاقي اجابة ملقتش غير شتيمة في الحكومة و النظام السؤال بقي ..
****

هو الشتيمة في الحكومة و النظام بتفطر ؟؟؟؟

ماذا يحدث في مصر؟؟؟؟

بسم الله الرحمن الرحيم

"ظهر الفساد في البر والبحر بما كسبت ايدي الناس لنذيقهم بعض الذي عملته ايديهم لعلعهم يرجعون "

" بما كسبت ايدى الناس "

" بما كسبت ايدى الناس "

" بما كسبت ايدى الناس "

" بما كسبت ايدى الناس "

هو في ايه ؟؟؟

سؤال صعب اوي ليه كل الكوارث دي ورا بعضها وليه كل ما نحاول نفوق من كارثة تحصل كارثة تانية اكبر من الاولي ؟؟؟

*

هو ده غضب من ربنا ولا سوء استخدام مننا ولا نعمل زي كل مرة ونقول الحكومة مش شايفة شغلها

يعني مش طبيعي اني افتح الاخبار اسمع انهيار جبل علي ناس ويموت العشرات ويفضلو 3 او 4 ايام بينتشلو الجثث

ومش طبيعي ان قبليها بيوم اسمع انه اتقبض علي رجل اعمال كبير ويطلع سفاح وقتال قتله ومطلوب من الانتربول

ومش طبيعي برده اني اسمع ان في حرب بين الشرطة والمساجين بالرصاص الحي ومسرح الجريمة سجن اسيوط وناس ماتت وناس هربت وناس اتصابت وعساكر استشهدت وكل ده بسبب واحد مات من التعذيب

*

طيب والمساجين اللي بيقضوا عقوبة في سجن ازاي يبقي معاهم سلاح ؟؟

ومن اين حصلو علي هذا السلاح ؟؟

وهل هذا السلاح بكفائة اسلحة الشرطة ؟؟ تبقي مصيبة .

وهل كل المساجين مدربين علي استخدامه ؟؟ تبقي مصيبة اكبر

*

انا واحد بضرب نار بسلاح وعارف اكبر خزنة في تاريخ الطبنجة 20 وده غير صعوبة وجودها معاهم اللي احتمال ان تكون معاهم خزنة ثمانية او 15 لا اكثر طيب هل هما جابو خزن كمان ولا جايبين ار بي جي ولا رشاش ولا مخبيين الاسلحة بتاعتهم داخل قوالب الحلاوة ؟؟؟

*
حتي لو كلامهم صح وفي تبادل اطلاق نار فاطلاق النار يجب ان يكون متكافئ او قريب من التكافئ لكي اسميه تبادل لكن 4 مقابل 22 ده حتي حرام في توازن القوي إلا لو كان فعلا في تكافئ وعدد المساجين اللي معاهم سلاح يساوي عدد الشرطة اللي معاهم سلاح ودي تبقي كارثة طبعا

*

طيب لو طبقت نظرية المؤامرة الشهيرة لصاحبتها نوارة نجم وقولت الحكومة بتقول ان فيه ناس دخلت سلاح فى محاولة لتهريب بعض المساجين كل ده علشان يداروا الفضيحة الكبيرة وهى التعذيب والتنكيل بالمصريين ومساجين المصريين طيب والناس اللي اتقتلت التانية دي ذنبها ايه والعساكر اللي ماتت دي ذنبها ايه ؟؟

طيب وحنفترض ان كلام الحكومة صح والناس اللي هم اهل المساجين كلهم ولاد كلب طيب دخلو السلاح السجن ازاي دول لو كانو رايحين كارفور ولا سيتي ستارز كان اتمسكوا غير ان السلاح في الصعيد معروف انه سهل بس مش سهل لدرجة انه ممكن يدخل السجن للمساجين كأني بتفرج علي

PRISON BREAK وحسيت ان فى مسجون اسمه هريدى سكوفيلد هو اللى خطط ومعاه اخوه جعيدى بوروز ومعاهم عباس سوكري والله العظيم ده مش بيحصل في الافلام الاجنبي كان زمان اهل المسجون بيهربو سجاير في الاكل مخدرات في الفراخ انما سلاح في اللحمة ح يتهرب ازاي .؟؟ انا حسيت ان الخبر ده عن سجن الهند المركزي مثلا واللي صرح بكدة المحافظ بتاع نيودلهي

*

طيب لو حبينا نعد الكوارث الدويقه وغلاء الأسعار والحديد وأزمة الأسكان وازمة البطاله وانقلاب فى السجون وسوق العقارات الى حايوقع لو طلعت مصطفى اتسجن واتحجز على فلوسه والدوله أممت مشاريعه وغيره وغيره أنا مش عارف ايه اللى بيحصل ويقولك الى سربوا الامتحان خدوا 10سنوات واللى غرق العباره أخد برأه وبتاع اكياس الدم الفاسد طلع برده براءة وكل ده علشان القضاء بتاعنا النزيه اللي عيين ابن مقبل شاكر في النيابة رغم تخرجه من كلية الحقوق بتقدير مقبول يعني التعليم والقضاء برده بقي فيه فساد

*

افتكر لما شارل ديجول وصل قصر الإيليزيه كان في فساد كتير في كل ارجاء فرنسا فسأل عن التعليم والقضاء هل وصل لهم الفساد فرد رجال الدولة لا

فقال لهم اذا هناك امل من الاصلاح

*

طيب احنا نعمل ايه بقي ؟؟؟ القضاء بقي فاسد والتعليم بقي افسد كدة يبقي مفيش امل من الاصلاح

يعني ناخدها من قصيرها ونسافر ولا اللي يطول حاجة ياخدها ونسرق وننهب زي ما بيحصل ؟؟

*******

ليه بعد كل كارثة لا تخرج تصريحات حكومتنا الرشيدة إلا عن ان الحادث قضاء وقدر وان الاهالي هما اللي غلطانين وصرف تعويضات للمتضررين وتشكيل لجنة لحصر المخالفات ومنع تكرار الكارثة، لكن مفيش حاجة على الارض بتتغير ..

واللي مش مصدقني هايتأكد بنفسه الكارثة الجاية

رمضان كريم

كل سنة وكل الناس طيبين


حتي الحكومة اللي بدعي عليها ربنا يا يهديها يا ياخدها برده طيبة


كنت ناوي اتكلم علي الكراتين والفلوس اللي فرقها الحزب الوطني وسيادة الرئيس من فلوس الشعب وفي الاخر فضحوهم بمناسبة رمضان



وموائد الرحمن اللي اتلغت وكانت الحجة هي ترشيد الاستهلاك وفي نفس الوقت طبعا سرقة الفلوس


وحملة ترشيد الاستهلاك في رمضان والفوانيس والياميش والبلح اللي وصل 24 جنيه واللحمة اللي بقت بـ 56 جنيه

والصعايدة الرجالة اوي اللي ضحكو علي الجزارين وباعو اللحمة البلدي بـ 25 جنيه

والمسلسلات والتلفزيون والبرامج التافهة اللي بيتصرف عليها من فلوسنا




بس قولت بلاش نكد في رمضان وكفاية علينا دخلت رمضان والمدارس والعيد في شهر واحد وربنا يقدرنا علي الصيام والقيام وختم القرأن

كل عام و أنتم بخير

حدوتة الكادر

اهلا بكم
بعد الفاصل الطويل والحاجات الكتير اللي حصلت مش حتكلم عن الانجازات اللي عملتها الحكومة وبراءة هاني سرور وممدوح اسماعيل وحريق مجلس الشوري اللي حيترمم علي حسابنا وبفلوسنا لكن عايز اجابة لأسئلة من بعض المدرسين عن الكادر
بس الاول قبل اي حاجة هو ايه حدوتة الكادر دي ؟؟؟
من حوالي 3 سنين كدة الرئيس مبارك اتمطع وراح رازعنا قرار من قرارته الصائبة دائما وقال ايه حيخلي الحد الادني لمرتبات المدرسين الف جنيه والحد الادني لمعاش المدرسين 500 جنيه والحافز 150% وطبعا القرار ده كان زي قرار العلاوة اللي فاتت يعني من الاخر اشتغالة
بس مع الوقت المدرسين حالتهم ادهورت اكتر من الاول فعملو بالمثل بتاع اليهودي لما بيفلس بيدور في دفاتره القديمة
ولما نكشوا في الدفاتر القديمة ايدهم جت بالصدفة علي قرار الكادر ومسكو فيه واخذو يطالبون بتحقيقه

وطبعا علشان الحكومة بتاعتنا ماشية علي مبدأ ان هي مش حتنفذ اي كلمة بتقولها راحت اخترعت بقي حاجة اسمها اختبارات الكادر

ونزلت نماذج امتحانات وكمان نزلت نماذج اجابة للامتحانات دي علي النت وبكدة تخلي المدرسين بالعافية يتعلمو كمبيوتر وانترنت علشان يقدموا علي النت في اختبارات الكادر وعلشان ينزلو نماذج الامتحان واجابتها من علي النت
طيب يعني ايه اختبارت الكادر ؟؟
الاجابة من احد المدرسين وهو انه حيختبر المدرس في 3 حاجات
( اللغة العربية - اختبار تربوي - مادة تخصص )
السؤال بقي اللي سألهولي احد اصدقائي من مدرسين مادة التربية الرياضية

( يعني الالعاب )
قالي بالنص انا راجل متخرج من اكتر من 10 سنين ولما كنت في الكلية دخل دكتور لغة عربية علشان يدينا مادة العربي اللي كانت مقررة علينا في التيرم الاول من سنة اولي كلية ضحكنا عليه ومرضناش نحضر ومن ساعة ما خلصت ثانوية عامة وانا ما فكرتش ابص في كتاب عربي جايين دلوقتي يختبروني في مادة اللغة العربية طيب انا بقي حستفاد ايه يعني وانا بوقف العيال في الطابور الصبح حقول زراعين امام رفعا مع وضع فتحتين علي حرف الألف ولا حعرب الجملة قبل تحية العلم ؟؟؟ ده السؤال الاول
السؤال الثاني قالي انا تخصص جمباز في الكلية جايين دلوقتي بعد ما طلعلي كرش يسألوني الاعصاب اليمفوية البيضاء سريعة الانقباض ولا بطيئة الانقباض ؟؟ ده السؤال الثاني
السؤال الثالث قالي ليه بقي الدكتور يسري الجمل وزير التعليم مدخلش الاختبارات دي ليه مش المفروض ان هو((( رأس الافعي ))) قصدي الرأس المدبر للوزارة ؟؟؟
السؤال الرابع علي لسان احد اساتذتي وهو مدرس لغة انجليزية والاستاذ ده كان مشهور ان هو في البيت كان بيكلم مراته انجليزي لأن هي كمان مدرسة انجليزي وفي الفصل مش بينطق ولا حرف عربي ناقص يشتري الخضار من السوق بالانجليزي قال طيب انا اصلا قربت انسي العربي ومش حستفاد بيه في الشغل خالص يبقي ليه بقي حتخليني امتحن عربي ؟؟
بالنسبالي انا بقي عايز اسأل سؤال هو حضرتك يا سيادة الوزير فاضي ومش لاقي حاجة تعملها؟؟ علشان كدة اخترعت حوار الكادر ولا بتحل مأزق وقعك فيه الرئيس مبارك ولا الموازنة العامة للدولة فلست ومفيش فلوس تصرفوها للمدرس
بلاش افترا على الناس الغلابة وبعدين مين اللى خرج الوزراء والريس مش هما المعلمين اللى انتوا بستهزءوا بيهم دلوقتى ؟؟
سوال اخر سيادة الوزير

ما رايكم عندما يقول طالب ابتدائى للمعلم انت هتروح تمتحن ثم يضحك ؟؟
علي فكرة حرام عليكم والله اللى بتعملوه فى الناس انتم قلتم كادر المدرسين قالت شكرا لكن عينكم فيه ده حرام مش قادرين عليه انتم احرار تقولوا كلام وانتم مش قده برضه انتم أحرار لكن تلعبوا بالغلابة ده ممنوع يا حكومة مش فاهمة حاجة وفى الآخر تقولوا برنامج الريس طيب ابقي سلملي علي الريس
واسأله هو المدرسين بتوعه اللي درسوا له السنين دي كلها وخلوه وصل لرئيس جمهورية امتحنوا كادر ولا لا ؟؟
غير بقي ان في حاجة قالهالي اخصائي اجتماعي ومحدش واخد باله منها
التربية الاجتماعية خلت اسئلة النماذج المرحلة الثانية من كادر المعلمين بأسئلة خاصة بها وهذا يعنى حرمان الاخصائيين الاجتماعيين من حصولهم من كادر المعلمين للمرحلة الثانية فهل هذا مقصود من وزارة التربية والتعليم ؟؟؟
ولما سئلت ناظر مدرسة اعدادية عن الكادر مكنش عايز يرد عليا ولما عرف اني حنشر الكلام علي النت رد عليا كادر ايه اللى انت جاى تقول عليه...يكفى احراج مكانة المعلم المصرى على مستوى العالم بعد ان كان يشار اليه بالبنان..جميع دول العالم كانت تتعاقد مع الحكومة المصرية على استعارتنا باغلى الاسعار فتشفط الحكومة اكثر من النصف ..اما الان..........حسبنا الله ونعم الوكيل ..ضاعت هيبة وشرعية وشرف المعلم المصرى ..من اجل 100 جنيه....اهوووو..مخرج وخلاص من قرار رئيس الجمهورية ...ولكن ما يحزننى اننا ثمار هذا القرار فى عقود قادمة من الاهانات والتجريح فى الدول العربية على وجه الخصوص ...ناهيك عن وقف الاعارات والتعاقدات الا بشرووووووط قاسية....ارجو من سيادة رئيس الجمهورية السيد\محمد حسنى مبارك بسرعة التدخل لايقاف هذه المهزلة الهزلية المبكية فى حق التعليم المصرى والمعلم المصرى

طبعا لو الكلام ده منفعش كالعادة والوزير عمل اللي في دماغه

فإليك ايها المعلم بعد النصائح

فى مقولة بتقول (يعيش المعلم ويتعلم) ودى الى ماشى بيها سيادة الوزير

1-لازم تذاكر كويس

2-تجهز قلمك ومسطرتك واستيكتك وقلم رصاص

3-لازم تسطر ورقة الاجابة كويس

4-تحسن خطك وتوضح الاملاء

5-لازم تقرا الفتحة واية الكرسى علشان تبعد عنك الشطان

6-اقرأ ورقة الاسئلة كلها الاول

7- لولقيت سؤال صعب سيبة للاخر

8-اكتب اسمك على ورقةالاجابة بوضوح

9-اكتب رقم جلوسك بوضوح

10-اعتمد على نفسك بس

11-اياااااااااكم ... والغش

12-لما تخلص سلم الورقة واخرج للى جاى يوصلك للامتحان واوعى تقلة الامتحان صعب (عييييب) وفى النهاية ربنا يوفق الكل

***

اخر الكلام خالص سألت واحدة جارتنا والدتها مدرسة قالتلي حرام عليهم مش عارفين ناكل كل ما نقول لماما اطبخي تقولنا انا بذاكر