الأربعاء، 7 مايو، 2008

وما زال استفذاذ الحكومة مستمر

الخازوق الثاني علي التوالي

اعلنت الحكومة المصرية والمتمثلة في الدكتور يسري الجمل وزير التربية والتعليم انه قد تقرر إلغاء الاعفاءات الضريبية الممنوحة للمدارس الخاصة وده طبعا حيزود في المصاريف المدرسية اللي بيتحملها رب الاسرة مع العلم بأن مش كل اللي بيتعلم في الدارس الخاصة من ابناء الاغنياء وهذا التصريح اللي قاله سيادة الوزير المبجل أكد فيه علي أن قرار الحكومة بإلغاء الاعفاءات الضريبية الممنوحة للمدارس الخاصة لن يكون مبررا لزيادة المصروفات المدرسية والتى تخضع لقانون وقرارات وزارية ووفق قواعد تحددها الوزارة من خلال الادارة العامة للتعليم الخاص بالوزارة وللعلم ان هذه الادارة تسمي بإدارة الكعب العالي يعني كلها هدايا ووسايط علشان كدة سيادة الوزير قال في التصريح بتاعه كمان إن أى زيادة للمصروفات الدراسية تريدها المدرسة عليها التقدم بها الى الادارة العامة للتعليم الخاص لتحديد أوجه الزيادة وفق معايير وأسس واضحة وطبعا كلنا عارفين المعايير دي اللي هي ايه ومحدش يقول رشوة وسيادة الوزير كمان شدد على أن الوزارة لن تسمح بالمساس بالبعد الاجتماعى الذى أصدرت من أجله الحكومة القرارات الاخيرة لتمويل العلاوة الاجتماعية وعلى أولياء الأمور دور هام فى ذلك وهو إخطار الوزارة بأية تجاوزات ضد الشرعية أوالتعليمات الخاصة بالمصروفات التى تحددها الوزارة وانشاء الله بعد ما تبلغ الوزارة محدش حيسأل فيك طبعا واضاف سيادة الوزير أنه اصدر توجيهاته الى المسئولين بإدارة التعليم الخاص بمتابعة ذلك بكل دقة وحزم ومتابعة مخصصات كل مدرسة من مصروفات ثم الموافقة عليها. يعني سواء وافقت او رفضت برده حيزود المصاريف ولما سألناه يا سيادة حضرة الوزير المحترم ليه حتسمع كلام الاكسلانسات اصحاب المدارس الخاصة تفضل سيادته واجاب لأن وزارة التربية والتعليم تقدر دور التعليم الخاص ورسالته لأنه جزء مهم من منظومة التعليم ،كما تشجع المبادرات الخاصة فى اطار اللامركزية فى التعليم لأن التعليم الخاص يشارك فى تعليم شريحة تمثل 5ر8% من التعليم. ودعا الى ضرورة الالتزام بالقواعد والقوانين وعدم الخروج عن الشرعية حرصا على التعليم الخاص ورسالته بإعتباره ركن هام فى الرسالة التربوية التى نتعاون معا فيها من أجل إعداد جيل يتحلى بالعلم والقيم والمبادىء. وقد وصل لنا من مصدر موثوق بيه وهو الاخت قطة الصحراء انه وكـ رد فعل طبيعي لقرار الحكومة السابق فقد قرر بعض الاهالي ان يستكفو بتعليم ابنائهم الي المرحلة الاعدادية فقط وده يعني الحكومة برده بتحك مناخيرنا في الرصيف ومش مهتمة بأي حاجة احنا بنقولها او بنعملها وده حصل في الوقت اللي صرح فيه المهندس محمد دمرداش مساعد اول وزير الاسكان بأن الحكومة سلمت الف قطعة ارض لحاجزى مشروع ابني بيتك وذلك فى مدن بدر والصالحية الجديدة واسوان الجديدة والعاشر من رمضان. وقال ان تسليم اراضى المشروع يتم وفق المخطط الزمنى الذى وضعته الوزارة وتم الاعلان عنه فى جداول للحاجزين بالمدن المختلفة. يعني برده بينيمو الشعب بمسكن زي بتاع العلاوة علشان يعملو كارثة تانية ومش عارف ايه اختيار التوقيت الزمني ده مقصود ولا غباء ولا انا اللي مش فاهم ؟؟؟ يعني الموضوع اصلا بدأ من 3 سنين والناس دفعت حق الاراضي وتقريبا كدة عددهم 91 الف شخص طيب انت سلمت ألف شخص يبقي فاضل تسعين ألف شخص طيب دول حيستلمو امتي يعني حتي القرار الصح بتاخدوه غلط هو انا بقيت
ضد الحكومة من شوية

هناك 8 تعليقات:

shaimaa samir يقول...

زىماحضرتك قلت بالظبط
استفزااااااااااااااااااااز

انا كنت جايةاعلق على اللى فاتت
لقيت حضرتك ماشاء الله نزلت بححاجة جديدةومكنتش اعرفها
متابعة جيدةوممتازة
جزاكم الله خيراااا

أحمد خفاجي يقول...

يا عزيزي هذا ليس إستفزازا
إنه إستعباط , إستكراد ضرب عال قفا لأننا لم نعد نستفز

أحمد خفاجي يقول...

قومو

لألهة الشمع المنصوبه

في قصر السلطه

بولو فوق مواكبها

لو كنتم أحياء

سيكون البول نارا

يذيب الألهة المصطنعه

وتنالون الحريه

أما إن كنتم أمواتا

وتبولتم ثلجا

أكلتكم قطط بريه

وتخلصنا منكم

يا بقايا الجثث العربيه

في إنتظار الأجيال المنتصره

أرفض أسباب الصمت لديكم

إنتفضو

يا قطع العزف الوتري

من جلسة لهو للوالي

أضع الجمرة تحت مقاعدكم

كي تنتصبو

كلمات ترفض زمن العسكر

تشق لجيل قادم

طريقا أخضر

يمر فوق خرائبكم

ويعود الوطن من المهجر

أحمد خفاجي

شاعر المستضعفين

بنت مصريه يقول...

ههههههههههههههه
دول يا تامر بيحاولوا يجيبوا فلوس من كل ناحيه
وكله ف الاخر فوق دماغ الشعب المصرى
عارف الجراد بيقضى عالاخضر واليابس
لنا الله

appy يقول...

لسه امبارح سامعه الكلام ده والناس متلخبطه ومعتز الممل المستفز الماسخ اللى ربنا يسخطه قرد ونسناس
بيتكلم فيه مع ناس ممله وولاد تييييييييييييييييييييييتتتتتتتتت
بس خلاص بقى

tamer.sala7 يقول...

shaimaa samir
جزانا واياكم بس في الوقت ده لازم تكوني متابعة لكل الاخبار وإلا حتروحي في الكازوزا مع ان الكازوزا دلوقتي ارخص من البنزين
-----------------------
أحمد خفاجي
والله يا دكتور انا زهقت من كتر الاستعباط ومبقتش فرقة معايا الاستكراد انما موضوع القفا ده بقي هو اللي يهمني وانا امي موصياني عاي قفايا علشان كدة انا ضد الضرب علي اقفا وبرده ما زلت ضد الحكومة
--------------------------
أحمد خفاجي
احسنت شعرا واحسنت صنعا بس المدونة بقت ريحتها وحشة جدا
--------------------------
بنت مصريه
ايوة اناعارف الجراد اللي بيقضي علي الارض واليابس بس الجراد ليه حل وليه علاج الحكومة بتاعتنا بقي ايه الحل بتاعها ؟؟
---------------------------
appy
والله انتي علي كدة تاخدي جايزة علي انك لسة بتستحملي تتفرجي علي ابن ماما نونا ارحمي صحتك حرام عليكي ويا ريت تقاطعي البرامج اللي بتنيم الناس

Desert cat يقول...

هو مش استفزاز اد ما هما عايزين يا اما ننتحر انتحار جماعى يااما نطق من جنابنا وبرضه هيبقى انتحار جماعى
موضوع توزيع الاراضى ده ممكن يكونوا بيسكنوا الناس لكن الناس مبقاش محوق فيا لا مسكنات ولا بنادول ولا حتى حشيش

tamer.sala7 يقول...

والله يا قطة اللي عايزك تعرفيه ان كل حاجة في البلد فعلا غليت ما عدا الحشيش
وده لأنهم عايزن الشعب يفضل مسطول وتايه ومش بيفكر في اي حاجة واللي هم تايهين عنه ان الشعب فعلا تايه ومسطول من اللي الحكومة بتعمله وعايز ابشرك بحاجة بس دي انشاء الله تقريها في البوست اللي جاي وعايز اسمع احلي تيييييييت للحكومة المصرية