الاثنين، 19 مايو 2008

وده بقي خازوق هدية من الحكومة بمناسبة المنتدى الاقتصادي

اولا في البداية انا عايز اشكر السيد الموقر المحترم الاب الحنون محمد حسني مبارك علي كل اللي بيعمله من اجل شعب ناكر الجميل ( اللي هو احنا ) يعني الراجل حيعمل ايه ولا ايه ده صارف 20 مليون دولار و10 مليون جنيه علشان يطلع شكلنا حلو قدام الدول الاوروبية المتقدمة اللي جايين يحضرو المنتدي الاقتصادي في شرم الشيخ
ثانيا عايز اقول للناس استحملو شوية الموضوع بدأ يتحل من عند ربنا لأنها انهاردة ضاقت اوي
( وضاقت ولما استحكمت حلقتها فرجت وكنت اظنها لا تفرج ) يعني طن الحديد خلاص هانت قرب يدخل علي 10000 جنيه
انهاردة طن الحديد سجل 7700 جنيه وكمان المصانع توقفت عن إنتاج حديد التسليح شائع الاستخدام، واكتفت بإنتاج كميات قليلة من مقاسات قريبة منه، وهو ما أكده أحمد الزيني، نائب رئيس الشعبة العامة لمواد البناء، بقوله: المصانع تنتج مقاسات غير مطلوبة للسوق، وحذر من انفلات الأسعار إذا لم تتدخل الحكومة والسؤال بقي هنا الحكومة مش عايزة تتدخل ليه ؟؟ حد عنده اجابة ؟؟
اجاوب وامري لله الحكومة الله يكون في عونها مش فاضية يعني السيد الرئيس والسيد رئيس الوزراء والوزراء كلهم في شرم الشيخ مش فاضيين عندهم مؤمتر اقتصادي بيحضرو الاله الامريكي جورج بوش وطبعا كلهم تحت امر سيدنا الاله اللي جاي علشان يغيظنا ويقولنا ان اسرائيل عندها ديمقراطة وانها عندما تحتفل بعيدها الـ١٢٠، وستكون عندها من أعظم الديمقراطيات في المنطقة، وستلحق الهزيمة بـ«حزب الله» و«حماس» و«القاعدة»، معتبرا أن هذه رؤية عالمية وليست يهودية أو أمريكية.
بس الريس عمل حركة عجبتني اوي لما غادر القاعة الرئيسية للمنتدي، الذي يستمر ثلاثة أيام، فور إلقاء كلمة الافتتاح، دون أن ينتظر سماع كلمة الرئيس بوش، . والشهادة لله اول ما عمل الحركة دي انا قولت الريس بتاعنا ده راجل وسيد الرجالة كمان بس لما عرفت ان بوش وصل إلي القاعة بعد ساعة من بدء الجلسة الافتتاحية قولت هو الريس بيردها ولا ايه وطلع فعلا كلامي صح واللي حصل أن الرئيس مبارك كان ينوي حضور الجلسة الافتتاحية للمنتدي كاملة، لكن عندما علم أن الرئيس الأمريكي سيحضر في منتصف الجلسة، ولن يستمع إلي كلمته قرر أن يكتفي بإلقاء الكلمة، ثم يغادر القاعة. وبيني وبينكم ده بقي ممكن نسميه شغل عيال يعني ايه رئيس دولة منظمة يقول هو مسمعنيش انا كمان مش حسمعه هو احنا في الفصل ؟؟
طيب ده بالنسبة للحكومة طيب والمعارضة ؟؟ كانو فين لما طن الحديد وصل للرقم الخيالي ده ؟؟ حد عنده اجابه ؟؟
برده امري لله واجاوب انا المعارضة بتاعنا كل اهتمامتها بالرقصات والدليل علي كدة ان في شهر واحد تقدم احد النواب المحترمين بطلب احاطة والمجلس بالفعل ناقشه عن مسرحية روايح لـ فيفي عبده وامبارح بس تقدم 17 نائب محترم بـ 17 طلب احاطة في مجلس الشعب علشان دينا فطبعا دينا وفيفي عبده اهم من العبارة اللي غرقت واللي المحامي بتاع ممدوح اسماعيل بيطلب من المحكمة المصرية عدم تطبيق القانون المصري بأعتبار ان ممدوح اسماعيل والضحايا والبحر الاحمر والحاجات دي كلها مش مصرية واكتفي بأن العبارة ترفع العلم البنمي، وطالب بعدم سريان قانون العقوبات المصري علي الحادث، لأن قانون دولة العلم هو الذي يطبق إذا وقع الحادث في المياه الدولية. و برده دينا وفيفي عبده اهم من حرب الرغيف التي تتجدد.. والمشاجرات والتحرشات التي تحدث للحصول علي الكيس ذي الـ«٨ أرغفة»
وطبعا كل ده والسيد رئيس مجلس الشعب عامل نفسه نايم ومكبر دماغه وبيكتفي بـ أنه يجدد تهديده للحكومة بعقد جلسة مغلقة لمناقشة غياب الوزراء ومننساش الجانب الديني مهو برده مش فاضي يعني كان الله في عون شيخ الازهر هو كمان كان بيحضر لـ لقائه التاريخي المهم مع السفيرة الأمريكية مارجريت سكوبي، وجاء مع الخبر صورة استقبال أو وداع فضيلته لسكوبي وهي كاشفة الشعر رافعة الحاجبين محمرة الوجنتين باسمة الثغر متمكيجة.. وفي الصورة فضيلته يسلم عليها بكلتا يديه واضعاً يدها اليمني بينهما وهذا لا يجوز من فضيلته والله أعلم معلش انا دخلت في 100 موضوع كلهم كانو خانقني بس كان لازم حد يبين الخوازيق وبعدين يعني كل الخوازيق دي عندنا وعايزينا نبقي
ضد الـحـكـومـة

هناك 13 تعليقًا:

Desert cat يقول...

انا صوعقت اول ما شوفت سعر طن الحديد
فى مصراوى امبارح بالليل ووقتها قولت يارتنى كنت حزب وطنى علشان اطلع فى التى فى واقول انا بشتغل فى حديد عز
بالنسبة لمهاترات شرم الشيخ فدى حدث ولا حرج
اما شيخ الازهر ففى فتوى صدرت حديثا انه حلال شرعا السلام على من لا تحملن الجنسية المصرية
من هى بالمواصفات اللى تفضلت وذكرتها
صبرنى يارب

رحاله يقول...

نفسى مرة اجى مش الاقى موضوع عن الحكومه بس اعمل ايه والمدونه اصلا ضد الحكومه
تحياتى على كل حال
جيلان

.:.-=- ELGaZaLy-=-.:. يقول...

انت شغال اية لا بجد...!!!!

انت مكانك مش هنا يا تامر لا خالص.,.

انت مكانك هناك يا حبيبى بالظبط مع القديسيين والشهداء
---------------------

عجبتنى موت حركة الريس ياتامر بس انا عارف انة جزمة ميعملهاش علشان كدة ماملتش زيك

بس الموضوع اعمق مما تتخيل انت وانا وامثالنا الموضوع ان قبل كدة كان حسنى وبوش بيلعبو ايوة يوم ما كانو راكبين العربية..حسحسح كان معاه قلمة ايوة يا اخى الى بيكتب بية علطول دة بوش خدة ومرجعهوش ومن ساعتها وحسنى مش بيكلمة خالص خالص وحالف لا يسرق منة الزمامية يا راجل دول حبة عيال

وبعدين طبعا وسط فيفى اهم من الحديد والعيش والحسنة الى على خد دينا وهل هي موجودة ولا لا اهم من ان الشعب يولع البلد دى ماشية بيهم دول بركة

وبالنسبة لعم الحاج شيخ الازهرالشريف

الشريف هو الازهر وليس شيخة

ياريت ياريت يفتيلنا فى حديث الرسول صلى الله علية وسلم
لأن يطعن في رأس رجل بمخيط من حديد خير له من أن يمس امرأة لا تحل له

وكل الاحاديث دى...

سلملى على التروماي...

رئيس جمهوريه نفسى يقول...

ولسه يا ما نشوف كتير من الحكومه الذكيه الاكترونيه المفتريه على خلق الله

غير معرف يقول...

عزيزي تامر

تجار الحديد هم ملوك هذا الزمن في مصر

و طبعا لما الحديد بيغلي اسعار الشقق حتغلي
مش عارفه ده حيودينا فين؟
و بخصوص اللي عمله الريس حركه مجدعه الصراحه
بجد شويه عيال اللي بيعملوه ولا هامهم منظرهم قدام العالم

ربنا يستر عليك ياتامر
تحياتي ليك

Empress appy يقول...

تعالى بقى دا انت قصه انا امبارح بالليل فتحت مدونتك وقعدتاقرى مصايب الحكومه كلها لغايه الساعه اتنين
لا بجد انت قنبله موقوته يا تامر
واللى بتقوله عجبنى
فى المذكرات هما اولا بيحاولوا ميبينوش ايه ما كانت باينه صلاح نصر بيعمل ايه وعليش برضه دخلوا الاغراض الشخصيه فى الحياه العمليه
وهو هو نفس اللى بيحصل دلوقتى
بس هى ما ضاقت الا ما فرجت
االحديد ده قولت انا قبل كده فيه اسعار اقل زى بشاى بس الناس مش بتسمع

ملحوسه سعيده ان كوكبى هو كوكبك المفضل اول مرة اخد بالى لما قعدت لغايه الساعه اتنين بالليل اقرى مدونتك كلها

الميكروباص يقول...

الحكومه مش عاوزة تتدخل لأنهم مش بيتدخلوا في الأمور العائليه بين المنتج و المستهلك ...

rovy يقول...

السلام عليكم
الحقيقه مش انت لوحدك اللى مخنوق من الحاجات دى كلنا مخنوقين وكل يوم الخنقه بتزيد .. حسبنا الله ونعم الوكيل
ليه تعليق صغير لو سمحت .. فى البروفيل انت كاتب للاسف مصرى وبيتهيقلى مهما كنت زعلان من ناس فيها مصر ملهاش دعوه دى ضحيه ومجنى عليها و يمكن نكون احنا اللى قصرنا فى حقها يعنى لازم نكون فخورين بها لاننا بنحبها ولأنها بلدنا .
وفقنا الله جميعا لما فيه الخير
خالص تقديرى
تحياتى
rovy

غير معرف يقول...

الحكومة عندها حاجات أهم مني ومنك
الحكومة أكيد مشغولة وسهرانه الليل من كتر التفكير في المشاكل اللي زامبيا وزائير وجنوب شرق آسيا
الحكومة هتلاقيها منين ولا منين؟

tamer.sala7 يقول...

desert cat
مش فخر اوي انك تشتغلي في حديد عز اقسم بالله كنت بشتغل في حديد عز ومشيت وانا كة احسن مليون مرة علي الاقل محدش بيدعي عليا من الناس الغلابة
مهاترات شرم الشيخ دي كأنهم زمايل في الكي جي وعم الحج شيخ الازهر ولا حيكسب ولا حيخسر حيفضل واقف في الاوف سايد
ربنا يصبرك ويصبرني
-----------------------------------
رحاله
هو يعني انا بفتري عليهم ولا بجيب كلام من عند امي مهو كله من مصايبهم ربنا ياخدهم كلهم
وبعدين انا مش ضد الحكومة علشان الحكومة مرات ابويا يعني الموضوع كله ان انا مش راضي عن اي حاجة هم بيعملوها والمفروض مكنش لوحدي
----------------------------------
:.-=- ELGaZaLy-=-.:.
بصي يا عم الحج انا شغال T support في شركة انترنت يعني مليش دعوة بالسياسة بس اللي بتعمله الحكومة ده كتير يخلي اي حد يطرشق حتي لو ملهوش في السياسة
انما مكاني اللي مع القديسين والشهداء ده انا بتمناه بس لما ربنا يكرمني برشاش كلاشنكوف روسي واخلصكم من السيد المحترم رئيس دولة ممبوزيا العليا
وبعدين لما هو من الاول راسم علي الزمزمية مقالش ليه والله كنت جيبتله كولمان مليان مية ساقعة بس ميعملش الحركة العيالي دي بس انت طلعت نمس واخد بالك من كل حاجة حتي الحسنة اللي خد دينا والطرطور الاكبر اكيد مسمعش عن الحديث الشريف لأنه ثقافته امريكاني
-----------------------------------
رئيس جمهورية نفسي
بمناسبة الحكومة الالكترونية انا سمعت انهم حيبعتو العيش للناس علي الميل
----------------------------------
اجندا حمرا
والله تجار الحديد الكبار ايوة زي ما انتي بتقولي انما تجار الحديد الغلابة اللي زيي وزيك قفلو مشاريعهم والحمد لله
بخصوص اللي عمله الريس ده عايز اقولك ان من سنتين تقريبا كان مكتوب في الجرايد الحكومية ان شيراك يتعلم الحكمة من مبارك وانا مكنتش فاهم لكن بعد اللي حصل ده تأكدت فعلا من الحكمة اللي عند الريس بتاعنا صحيح حكيم
حكيم اللي بيغني طبعا متفهمنيش غلط
----------------------------------
appy
انا جيت اهو :-
علي فكرة لو المدونة بتاعتي حتسهرك كدة وتخلي اسلام يزعل مني انا حقفلها من بكرة مع انه شرف ليا ان اي حد يشجعني في موضوع التدوين ده ويا حبذا ان التشجيع ده يكون من حد مخضرم زيك
موضوع صلاح نصر وليش انا ميهمنيش الاتنين لأنهم خلاص ربنا اخدهم وريحنا منهم انا اللي يهمني زفت الطين اللي لسة في السلطة ده ومحدش يعرف عنه حاجة
عايز اصحح ليكي معلومة بما اني كنت بشتغل في شركة الحديد والصلب اللي في الدخيلة عندنا عايز اعرفك ان بشاي والعتال وكل الشركات دي مش بتعمل غير حديد التسليح اللي هو في الاصل حديد مسطحات ومحدش بيعمله غير احمد عز بس يعني المادة الخام بتاعتهم عند احمد عز وبما ان احمد عز رفع سعر المادة الخام اكيد المنتج كمان سعره غلي بس هو ارخص في بشاي لأنه اردء في الجودة
بالمناسبة انا فعلا مش بدخل مدونات كتير ومشاركتي قليلة بس هم كام حد كدة اللي لازم ادخل عندهم كل يوم وهم دول اللي مكتوبين عندي وانتي واحدة منهم وده يشرفني طبعا
---------------------------------
لورانس العرب
الحكومة دي بتخليني امشي في الشارع زي عوكل واقعد اقول ايه اللي جاب القلعة جنب البحر
----------------------------------
rovy
انا اقصد بللأسف مصري (اني ائسف علي اني مصري عاجز شايف حقي بيضيع قدامي ومش قادر امد ايدي اجيبه) شوية مرتزقة شغاليين عندي لحم كتافهم من ضرايبي انا واهلي وبيسرقوني وفعلا مصر طيبة اوي بقالها قد ايه بتتسرق ولسة فيها خير ارجو اني اكون وضحتلك
---------------------------------
maha miho
عندك حق مهو نظيف قال : المخاوف من ارتفاع الاسعار نفسية وليست اقتصادية .. و أحمد عز قال : خوف المصريين من ارتفاع الأسعار مجرد فلكلور اقتصادي .. و الرئيس المركزي للاحصاء قال: رفع سعر السولار أحدث زوبعة مبالغ فيها يبقي صحيح الناس دي بتحكم شعب غيرنا وانا طول عمري بقول عليهم حكومة ممبوزيا العظمى مش مصر

mohamed يقول...

مينفعش أروح معاهم أصيف:D:D:D:D:D

سبهللة يقول...

اول مرة زيارة ليك
ومش الاخيرة ان شاء الله
ويا سيدى ماتحرقش دمك
هو فى ايه عدل فى البلد
البلد كلها سبهللة عالاخر
مولد وصاحبه غايب

tamer.sala7 يقول...

mohamed
يا عم روح صيف معاهم بس وانت هناك يا ريت تقنعهم يسيبونا ويخلعو علشان احنا زهقنا منهم كلم
----------------------------------
سبهللة
طيب واحنا ساكتين ليه علي المولد يعني وايه اللي يخلينا قاعدين نتفرج ؟؟