في انتظار حسن الهلالي

والله انا ولا بتاع تدوين ولا غيره مع اني متابع الموضوع ده من زمان وكان نفسي ادخل فيه بس كنت بقول يا واد بلاش سيب العيش لخبازه خلي الصحافة تاكل عيش لكن دلوقتي لا noooooo كدة كتير ربنا خلقلي مرارة واحدة انا مش قادر استحمل لازم اعمل اي حاجة علشان منفجرش بس مفيش اي حاجة اعملها غير اني اعلنها انا ضد الحكومة
الموضوع كله اني اتنفخت من اللي بيحصل في البلد دي وقررت اني اكتب اللي انا حاسه يعني مش لاقي مكان اطلع فيه زهقي قولت اطلعه علي النت
يعني كل اللي بيحصل في البلد ده والحكومة وعارفة وشايفة الاضرابات والحالة المستفزة اللي الشعب بقي فيها وبرده مصممة انها تحك مناخيره في الرصيف علي رأي نوارة نجم بس في كل الاحوال موضوع البنزين اللي ارتفع امبارح ده بجد ضربة معلم يعني الريس اتمطع وهوووووووب راح رازع القفي المتين للشعب كله
يعني هو نزل للشعب علاوة 30 في المئة وراح رافع سعر البنزين صايع صحيح منوفي علي ابوه منوفي اصلي يعني عرف ياخد حقه تالت ومتلت بس اللي هو ميعرفهوش اننا مش بلد اكسلانسات برده علي رأي نوارة نجم
( اعزروني علشان انا متأثر اوي بيها ) وبما اننا مش بلد اكسلانسات يبقي بكل بساطة ينتظر انتقام الناس اللي مش اكسلانسات علي طريقة أنور وجدي لما قال ( انا حسن الهلالي )
ونحن في انتظار هذا الهلالي