الأربعاء، 21 مايو 2008

ده بقي مش خازوق ده خابور

يعني احنا لسة مفوقناش من اللي عمله الريس مع بوش ولعبة الاطفال اللي كان بيلعبها معاه دي اذ نفاجأ بأن في حاجة اسمها تسقيع الاراضي وده يعني ايه بقي ؟؟
ده يعني ان في بعض المستثمرين اللي هم اسمهم حيتان الاقتصاد بيشترو اراضي من الدولة بتراب الفلوس وبكل بسلطة ينامو عليها لغاية ما سعر الاراضي دي يولع ويبدأو يبيعوها مثال علي كدة ارض دريم لاند الارض دي ارتفع سعرها من ‏90‏ ألف جنيه إلى 12‏ مليار ازاي في حاجة يبقي مكسبها عشرومية في المية . ازاي ؟؟
وازاي برده بكل بساطة كدة ارض مساحتها ‏831‏ فدانا تتباع بالسعر الخايب ده 90 الف جنيه يا بلاش ده كدة المتر واقف بأقل من 50 قرش مع ان سعر متر الارض في عزبة الصفيح سعره وصل لاأكثر من 50 جنيه طيب السؤال هنا الناس دي بتعمل كل ده ليه ؟؟
والسيد جمال مبارك صفته ايه وبمناسبة ايه يصرح و يقول مصر ستاخذ مكانها بحلول2025 ومراته تقصد ايه لما ترد علي صحفي وتقول
و ده حصل في مؤتمر دافوس صحفي أجنبي سأل خديجة: انت مين؟ فأجابت: أنا زوجة جمال مبارك.. فعلق: إذاً أنت شخصية مهمة ليه شخصية مهمة علشان ايه يعني ؟؟ الله يخرب بيوتكم وبيوت اللي جنب بيوتكم سرقتوا البلد ونهبتوها من اول مامسك مبارك الحكم واحنا بنسمع شعارات وكذب من اول مصر 2000 وتبرعوا لسداد ديون مصر ومشروع 100مدرسة ومشروع1000مصنع ومصر بتتقدم بينا اقصدكم بتتنيل وتتنهب بينا وكله نهب في نهب احنا عايزين نعرف فلوس مصر بتروح فين المليارات اللي جات من قناة السويس والبترول والسياحة وتحولات المصريين والمعونة الامريكية كل ده راح فين لوضربنا الفلوس دي في30سنة مدة حكم نظام مبارك وعائلته الفاسد لوصلنا لمبلغ لايقل عن 10تريليون جنيه والتريليون 1000مليار والمليار الف مليون جنيه اين ذهبت كل هذه المليارات هل ذهبت لصالح هذا الشعب ام ذهبت لصالح حيتان النظام امثال حسين سالم صديق مبارك اللي اعطاه صفقة تصدير الغاز لاسرائيل ببلاش وكانه بيبقشش من جيبه وامثال احمد عز صديق جمال مبارك اللي كان شغال طبال واخد مصنع الدخيلة بتراب الفلوس عشان يحتكر الحديد ويوصل سعر الحديد من 1600 الى7700جنيه بجد دي مهزلة ولا ثروة الشعب المصري دي راحت لجيب نواب القروض اعضاء الحزب الوطني الفاسد اللي نهبوا اموال بالمليارات من البنوك بتسهيلات مباشرة من عائلة مبارك امثال رامي لكح وغيره وهربوا للخارج ماهي خبرة جمال مبارك الاقتصادية عشان يخطط لمصر 2025 ده كان مجرد موظف في بنك في بريطانيا وحسب كلام محمد حسنين هيكل انه كان لجمال مبارك تعاملات مريبة رصدتها اجهزة المخابرات البريطانية والكل يعرف موضوع متاجرته بديون مصر يبقى ابوه هنا يقول تبرعوا لسداد ديون مصر والواد بره شغال سمسرة بديون مصر نفسي اعرف ايه مؤهلاته لهو معه دكتوراة في الاقتصاد ولا حتى ماجستر ولا حتى دبلومة ولا حتى طالع بتقدير جيد جدا نقول ده عنده خبرة وممكن يعمل حاجة لكنه جاب اصحابه الانتيم وعملوا حاجة اسمها لجنة السياسات اللي خربت البلد وبدا يمسكهم الوزارة والرجل الكبير قاعد في شرم الشيخ في القصر اللي بناه له حسين سالم بتاع صفقة الغاز المصدر لاسرائيل وسط الجو الجميل والوجه الحسن اصل هو شبع يخلي ابنه بقى ياخد حظه ويشبع هو كمان ويظبط الوضع لنفسه عشان ينط على كرسي الحكم ساعة ما الرجل الكبير يودع مبارك كان له جملتين اول مامسك الحكم الكفن مالوش جيوب وانا ماورثتاش عشان اورثها هل لما ياخد قصر من حسين سالم ويعطيه مقابله صفقة تصدير الغاز لاسرائيل يتفق مع مقولته الكفن مالوش جيوب وهل اللي بيتم الان من اطلاق يد جمال مبارك في كل شئ في البلدلدرجة ان البلد اصبح لها رئيسين يتفق مع مقولته انا لم اورثها لاورثها حسبي الله ونعم الوكيل اللهم ارنا عجائب قدرتك في كل ظالم وكل مفتري وكل واحد مش ضد الـحـكـومـة

هناك 14 تعليقًا:

Empress appy يقول...

طبعا تسقيع الاراضى لعبه من بدرى حتى الشعب اتعلمها ههههههههههههه مش جديده
انما ليه يتكلم وليه هى تتكلم ما تخليهم المهم دورنا يا تامر زى ما قولت لك قبل كده اننا طبعا نتحرك ونقول لا مش ممكن مش قادرين عليهم ما انت شوفت كلامه مع المذيعه واحرجته ازاى ده عاوز لسه يطلع ان الشعب المصرى غبى وانه هو بس اللى صح
موضوع الغاز بدئوا يشموا على دمهم ويتفاوضوا مع زفته الطين على انهم يغلوا السعر لما نشوف اخرتها كويس ضغط الشعب والكلام بيجيب نتيجه معاهم عقبال الحديد

Wael Salem يقول...

أنا سمعت بموضوع تسقيع الاراضي في دريم لاند
بجد يعني حرااااام
وموضوع خديجة الجمال ده مشكله بجد .
بصفتها ايه تحضر مؤتمر دافوس ... للمره الثانية علي التوازي .
مصر بجد بلد العجايب

تحياتي

.:.-=- ELGaZaLy-=-.:. يقول...

يا تامر طوب الارض بيسقع اراضى دلوقتى..

وبعدين اذا كان يا مؤمن ابن خال خطيبة جمال مبهدل الدنيا مش عايزها هي تعمل كدة...

يا عم عيب بقى عيب الحقد دة...دى ناس تعبت وجاهدت علشان توصل للمكانة دى...ومتسالنيش تعبو وعملو اية لان انا شخصيا مش عارف بس هما تعبو ...

فى مثل فلاحى شيك جداا عارفة

ايوة دة

اياكش تولع

Desert cat يقول...

ايه ده يا تامر انت بتقول مؤهلات جمال ايه انت بتسال على مؤهلاته
مؤهلاته انه ابن الريس
هى دلى ولحدها مش مؤهلات تطلعه المريخ مش تخليه يتاجر بديون مصر بس

الميكروباص يقول...

مش تسقيع الاراضي وبس
ده حتى الناس العاديه بتسقع الشقق لما أصبح سعرها نار
كله عاوز يسرق
وكله عاوز يستغل كله
وكله طماع وحرامي
ربنا ينتقم من كله

غير معرف يقول...

انا زوجة جمال مبارك؟ انا مراته يا خويا؟ انا المودام!! يا نهار انا عماله اتخيلها وهي بتتسئل ووهي بتجاوب

شوفوا هو نفسه بص عليهو وهو في المؤتمرات بتكلم ازاي ،، خلاص برقع الحياة اتشال ولا اتكشف ولا ما اعرف بيتقال عليه ايه؟

بلد بريسين،، يا خوفي يا بدران

يوميات فنانه مفروسه جداا يقول...

أوبا ا ا ا ا ا أيه الكلام الكبييييير ده يا عم تامر.


ملحوظه: أنا لا أسمع لا أري لا أتكلم

الحياه زي الفل والدنيا جميله والاشيه معدن وبناكل وبنشرب الحمد لله هننهب

مفيش كلام تاني سلام

حلم الحرية يقول...

احم
مين
فين
ازاي
ايه الكلام الجامد ده
انا مش تبعهم يا باشا
....

علي فكرة تسقيع الاراضي مش حاجة جديدة
لكن الجديد اننا بدانا نفوق ونلاحظ وننقد الوضع ده
وده الحاجة الوحيدة المبشرة في الموضوع ده كله

اما حكاية طنط ديجة
هيه حفلة خيرية رايحاها معاه
ده مؤتمر اقتصادي تروح بصفتها ايه
صحيح اللي اختشوا ماتوا

سعيدة باول زيارة ليا هنا
وان شاء الله متكونش الاخيرة

تحياتي

غير معرف يقول...

عارف ياتامر
موضوع تسقيع الأراضي ده مش بس أحمد بهجت اللي بيعمله كتير زيه و كتير مواطنيين عاديين بيتسغلوا ارتفاع اسعار الأراضي و يفضلوا نايمين عليها
لسه كنت بسمع اتنين زمايلي بتكلموا واحد بيقول للتاني اللي كان بيفكر يبيع شقته و يحط فلوسها في البنك تطلعله قرشين لحد مايجي يتجوز قاله اوعي خاللي الشقه حتجيبلك اكتر من اللي حيجيلك من البنك
شوف عشان كل اللي بيحصل ده اسعار الأراضي و الشقق بتعلي و حتفضل تعلي
و اللي بيتكلم عن التطبيع مع اسرائيل كان بيسلم علي اولمرت في منتدي دافوس
يعني كلام بيتغير حسب الشخص اللي بتتكلم معاه
اللي نرفزني بقه كمان حاجه ان صاحب مصنع اجريكوم طلع في دريم يقولك انه ادي 25 مليون دولار رشوه عشان المشروع يمشي مش عاجبكم ادفعوا الشرط الجزائي اللي هو 680 مليون دولار
مش بس كده ده احنا مش طالعلنا اي حسنه من المشروع ده اللي العائد و الأرباح بتاعته كلها للمستثمر الكندي بس للأمانه النفايات بتاعت المصنع لينا بقه لازم نتخلص منها
شوف حال البلد وصل لفين ياتامر
:(

tarek momen يقول...

عزيزي المتوفي
نقدم لك اخر صيحة في عالم الأكفان
كفن بدون جيوب
لكن لاتقلق انه كفن مصنوع من اوراق دفتر شيكات علي حسابك بسويسرا
ويمكنك بسهولة ان تقطع منه ورقة لكتابة شيك لحارس الجنه ليضعك في مكانة متقدمة
اما اذا ذهبت الي النار لاقدر الله فتستطيع ان تكتب شيك للحارس لكي يضعك علي شعلة البوتاجاز الصغيرة
زورونا تجدوا ما يسركم
تخفيضات هائلة لرؤساء الدول

رئيس جمهوريه نفسى يقول...

بص يا ابا صلاح سيادتك انا تابعت موضوع دريم لاند ده من زمان قوى اصلى صاحبك عجز خلاص وبيدور على حسن الخاتمه المهم احمد بيه بهجت اشتر الارض من الحكومه بسعر لا يعادل 2 جنيه فى المتر للمساحه كلها ولما جه يمول المشروع وحد يدخل بنوك معاه ركز بقاء والنبى بعد شهور من ما خلص الارض ودفع تمنها قيم الارض عن طريق مكتب استشارى بمبلغ 180 تقريبا للمتر ودخل بعض البنوك شركه معاه يعنى الباشا مول المشروع وكسب من جيوب المصريين وفلوسهم من البنوك والارض الى حتتباع دلوقتى زياده مكسب كام مليار على جنب
وبالنسبه للى ردت اوجزت فا انجزت العالم كله بيراقب حركه الثوريث الى ماشيه على قدم ورجل مش وساق فى خلاس سنين موظف فى بنك بيوصل لمنصب الرجل الثالث فى الحزب الحاكم وبيتكلم مع الحكومه وبيملى شروطه على الحكومه العالم كلها عارفه ان الرئيس القادم لمصر جمال واحنا ايدينا فى الثلج مش فى المياه المتلجه

حـــــدوتـــــة يقول...

يا باشا بالراحة شوية
وخد بالك من نفسك
العملية دلوقتى مبقتش مضمونة
واللى بيروح مبيرجعش
الكل بقت عينه على المدونين دلوقت

سلالالالالالالالالالالالالالالالالالالالالام

واحد من البلد دى يقول...

أنا أول مرة أدخل هنا و شكلها كده ياباشا مش حتكون آخر مرة ..
برافو عليك ..
البلد دى مش حينصلح حالها غير لو غيرت إسمها..
لأن يظهر كده إن النصايب كلها مبرمجة على إسم مصر..
نغير إسمها و نشوف.؟؟
ربنا يرحمنا

tamer.sala7 يقول...

appy
الموضوع دلوقتي بقي كتير علينا مش مهم هو غبي او احنا اللي اغبية المهم دلوقتي نتحرك
---------------------------------
المهاجر
خديجة حضرت مؤتمر دافوس علي اساس انه عيد ميلاد او حفلة طهور
---------------------------------
الغزالي
يا عم طيب مهو انا كمان تعبت وجاهدت زيهم ومتقوليش عملت ايه علشان برده مش عارف بس المهم يعني مش عايزين كلنا نقول اياكش تولع
---------------------------------
قطة الصحراء
ونعم المؤهلات بصراحة طيب انا عايز اتخرج من كليه ابناء الريس اعمل ايه يعني ؟؟
----------------------------------
لورانس العرب
لا يغير الله بقوم حتي يغير ما بأنفسهم
---------------------------------
مها ميهو
شر البلية ما يضحك وبعدين البلد مش بريسين دي بأربعة الكبير ومراته وابنه وديجة
---------------------------------
الفنانة المفروسة
يا ريت متكونيش كدة علشان ربنا خلقنا بنسمع وبنشوف وبنتكلم و الساكت عن الحق شيطان اخرس
--------------------------------
حلم الحرية
ديجة كانت رايحة تصيف وقالت تدخل تتفرج علي شرم واللي بيحصل فيها
---------------------------------
اجندا حمرا
مكنتش عايز اتكلم عن اجريوم علشان انا مقهووور بسبب المصيبة دي منهم لله
---------------------------------
طارق مؤمن
انت جاي تعمل اعلان عندي عن الاكفان طيب فين الترب ؟؟
---------------------------------
رئيس جمهورية نفسي
محمود باشا عايزين كارت من سعادتك علشان نترقي يعني الراجل جاب واسطة وبقي من موظف في بنك للرجل الثالث انا موافق حتي ابقي الرجل العاشر
---------------------------------
حدوتة
نسيت تقول ان العيد الصغير بيجي قبل العيد الكبير بس الموضوع خلاص بقي يخنق بطريقة تودي في ستين داهية
--------------------------------
واحد من البلد دي
طيب تفتكر وبعد ما نغير اسمها ايه اللي حيتغير انا موافق علي اي حاجة بس تتغير واذا كان تغيير اسمها هو الحل يا رب حتي تسميها بلد الجرابيع انا موافق