الأحد، 25 مايو 2008

حد يصوط معايا



تحديث 26/5/2008
بكل بساطة نقول مبروك علي حالة الطوارئ اقروها دلوقتي في مجلس الشعب علي طريقة اعلان روابي مش بس زادت ربع كيلو ولا نص كيلو دي زادت كيلو بحاله نفس الطريقة قانون الطوارئ مش بس 6 شهور ولا سنة واحدة لأ دول مدوها سنتين كاملين هيييييييييييييييييية


تمديد حالة الطوارىء في مصر لمدة عام
ده كان اول خبر علي الريق كدة قريته . وطبعا اليوم باظ وربنا يستر علي اللي جاي يعني بعد ما قولنا خلاص والدنيا حتبقي حلوة واحلي سنين دلوقتي رجعنا في كلامنا زي الريس مهو برده رجع في كلامه بصراحة جامد يعني الله ينور يا ريس يا بو كلمه واحده . هي دي الرجوله الغي الطوارئ ورجعها تاني . ادي علاوه وارفع الأسعار . ادي حريات واقبض علي نص الشعب مع ان لسة مفكرينه بكلامه
بس تقول ايه من برة شهامة واصالة تشوفه تقول احسن انسان انما من جوة يا عيني عليه بياع ويبيع حتي والديه
وعلي رأي الدكتور إبراهيم درويش، الفقيه الدستوري الكبير ، «الطوارئ» باق بالثلاثة لأن النظام يتصور أنه يحميه
ياسادة ياكرام اللى كان بيحلم أن الطوارئ ستلغى من مصر فهو واهم لأن هذا النظام وعلى رأسه لافاش كيرى لايمكن بأى حال من الأحوال أن يظل على قمة هذا البلد بدون طوارئ ، نظام لايؤمن بحرية الرأى على عكس مايتشدق علينا نهارا جهارا بأنه مع حرية الرأى ومع الديموقراطية وبقية العبارات الرنانة من هذا القبيل ، كل ذلك من أجل الرأى العام العالمى فقط لاغير ، أما هو فمن أعماق أعماقه لايؤمن بأى رأى سوى رأيه هو ولايسمع أى إنسان سوى نفسه فقط ، وكل من حوله جعلوه إلاه لأن بقاء هذا الوضع من صالحهم ، أتحدى أى إنسان أن يحلم بإنتهاء قانون الطوارئ طالما أن الحزب الوطنى فى الحكم ومسيطر على كافة مقاليد البلد ، أى حرية رأى يتحدثون عنها والصحفيون يسجنون وإسراء عبد الفتاح تعتقل لمجرد رأى ، القضاة تنتهك كرامتهم لمجرد أنهم يريدون بلدهم فيها العدل مطبق على الجميع ، غلاء فاحش فى البلد لم نرى له مثيل منذ قيام ثورة 1952 م ، اللى بيحصل فى مصر الآن فجور فجور فجور ، السلع الإستراتيجية ملك البلد تباع لشخص واحد لم يدفع من ثمنها سوى 10 % فقط والباقى ديون عليه للبنوك أى للشعب الغلبان ، واحد تانى يبيعوا له أرض دريم مساحتها 831 فدان بسعر 90 ألف جنيه فقط لاغير يابلاش مع أن أقل شقة الآن فى أفقر الأحياء لايقل ثمنها عن 200000 جنيه والآن هذه الأرض قيمتها 12 مليار جنيه ياحلاوة ، الغاز يباع لعدونا برخص التراب ويغلوا البنزين والسولار للشعب ، كل ذلك ماكان يحدث إلا فى ظل قانون الطوارئ لو فيه دستور وديموقراطية حقيقية فى البلد ماكان يحدث هذا الفساد الذى قال عنه أحد أركانهم أنه اصبح للركب وأنا أصحح له ذلك وأقول له أن الفساد أصبح للرقاب وليس للركب ، التاريخ سوف يضع هذا النظام وأركانه فى مزبلته ، وعموما فى النهاية أتذكر قول المولى عز وجل ( إن الله لايغير مابقوم حتى يغيروا مابأنفسهم ) طول ماهذا الشعب على حاله هذه فلن يتغير أى شئ فى البلد بل ستسير الأمور الى الأسوأ ، وأبشروا ياشعب مصر وزير مالية هذا النظام يصرح بأنه هناك زيادات أخرى قادمة ، مش عارف عايزين إيه تانى من البلد خلاص أصبحت خراب ، ويصرح النظام بأن النمو فى إزدياد وتقدم كانوا عايزين 2.6 مليار لتغطية زيادة الرواتب جمعوا من زيادة الأسعار الماضية 26.2 مليار شفتم النظام الرشيد بيعمل إيه ، بيشغل فلوسه معانا يعني يدينا 30 جنيه ياخدهم 50 جنيه بصراحة ناس بتفهم
بس المهم اننا عارفين ان يطبق قانون الطوارئ في حالة الحرب والكوارث والمصائب في البلاد هي مصر فيها حرب ؟؟ طيب مصر فيها كوارث ومصايب ؟؟ انا مش شايف اي كارثة او مصيبة غير الحكومة مع ان في ناس بتقول «إن الحكومة ستفاجئ الجميع بإلغاء الطوارئ، علي أن تصدر قانون مكافحة الإرهاب في الدورة البرلمانية الحالية، وتكون بمثابة مفاجأة وهمية مثل قرار زيادة الأجور ٣٠%، وتعديل المادة ٧٦». بس انا بالنسبالي لو خيرت بين خيارين كلاهما مر، بين تجديد الطوارئ أو إقرار قانون الإرهاب.. أفضل الاستمرار في تجديد الطوارئ لأنه في حالة إقرار قانون الإرهاب سيعتبر القانون الثاني في البلاد لمكافحة الإرهاب بعد قانون ٩٣»، ,وده معناه أنه سيحول مصر إلي حالة طوارئ دائمة ويومية وليست استثنائية. لكني بتمني ان مصر يجي عليها وقت وتبقي من غير طوارئ ولا ارهاب بس علشان ده يحصل ممكن نعمل ايه ؟ غير اننا نبقي ضد الـحـكومة

هناك 20 تعليقًا:

Empress appy يقول...

هو مين يا تامر كان بيحلم انه يتشال القانون ده انا عن نفسى عارفه انهم عيال وبيرجعوا فى كلامهم المشكله مش فى قراراتهم المشكله دلوقتى بقت بجد فينا احنا بقى لازم يبقى فيه اعتراض قوى مننا مش بهيافه وهتافات فاضيه وقصص عبيطه يعنى لازم واقفه اتفرج على بتوع اللى ضد تصدير الغاز والمسخرة اللى عملوها فى نقابه المحاميين
يعنى يرضى مين بجد

غير معرف يقول...

ولا نقدر نعمل حاجة انا عن نفسي حكشف راسي وادعي علييهم بعد الفجر

Wael Salem يقول...

تامر انت كنت متوقع انهم يلغوا قانون الطورئ قبل ما يفصلوا قانون الارهاب علي مقاس النظام؟
دانت رومانسي وحالم كمان يا راجل يا طيب
بلاش أحلام اليقظة دي يا كابتن .


والله كنت متوقعها من أول التمديد اللي فات .

تحياتي

Desert cat يقول...

قانون طوارئ مين الى يلغوه يا تامر
ده حجه اى مخبر مش امين شرطة حتى
لو قالك تعالى شرفنا خمس دقايق وانت حاولت تعرف تهمتك ايه يقولك ايه ده انت مش من البلدى ولا ايه ده قانون الطوارئ يا ريس
يبقى يلغوووه
دى احلام ياباشا ولا اوهام اى حاجه بقى والسلام
تحياتى

روينا يقول...

اول زياره لمدونه حضرتك بس
من اسمها ممكن افكر قبل مدخل تانى
مهو العمر مش بعزقه
والجبن برده سيد الاخلاق

رئيس جمهوريه نفسى يقول...

احلى ما فى الحكومه دى انها بعيده النظر اه وربنا بتمد فى الطوارى استب باى استب خطوه خطوه زى لعبه الون ثرى والون تو الى بيعملوها اللعيبه مع بعض وتبص تلاقى الكوره فى الجون يا حلو وانا واقف بتشجع
اولا قانون الطوارى او الارهاب اى ما كان المسمى مالهوش اى لازمه ليه بقاء الاخوان وانضربو يوم اضراب 4/5 والاضراب فشل بمشاركتهم ودول كانو العفريت بتاع الحكومه وطلع عفريت من ورق الارهاب وانحسر حد فكر ليه قانون الطوارى بيتمد مش علشان يحكمونا لانى احنا لو فكرنا فى كده نبقى هبل احنا حنتكم حنتكم والانظمه الفرديه الشموليه مش بتحتاج قانون علشان تحكم بس كل ما فى الامر الفكره كده بخلو منصب الرئيس لاى سبب تعلن حالة الطوارى القصوى فى البلد والى بيصاحبها نزول الجيش من الثكنات للشارع المصرى والهدف من كده ايه تامين حالة البلد وتوريث الوريث لانى اكبر عدد من قيادات الجيش منايفه ده غير الامتيازات الى خدوها فى عهد المبروك مبارك فخمتو خاجه يا ابو صلاح

Tamer Nabil Moussa يقول...

ياتامر ياصاحبى

مفيش الغاء انسى

حاجة بقلها اكتر من 30 سنة موجودة تتلغى كدة صعب عليهم

ربنا معانا

اتمنى اشوفك المرة الجاية فى لقاء المدونين

تحياتى

tarek momen يقول...

يابني ماتظلمش
هما دلوقتي قاعدين في مجلس السرور بيناقشوا الموضوع ولسه ما اخدوش القرار وده يتوقف علي ايه بقي
هما بيقولوا حادي بادي كرنب زبادي
الي اخر الأنشودة المعروفة
ولما يوصلوا لكلمة (ادي الناب اللي احنا حداه )
انت وحظك يا اما طوارئ يا اما ارهاب
وعيش يا باشا

tamer.sala7 يقول...

apyy
والله يا بنتي انا كنت بحلم بس خلاص صحيت وصحيت علي كابوس اسمه سنتين تاني
وبعدين انا كنت فاكرهم كبرو بقو رجالة وكل اللي نقدر نعمله اننا نصرخ في الشارع يمكن حد يسمعنا
------------------------------
غير معروف
بس لما تكشف راسك ابقي ادعي من قلبك يمكن ربنا يستجاب وتتشال الغمة من علي قلوبنا
--------------------------------
مهاجر
والله انا قولت قانون الارهاب حيتسلق زي التعديلات الدستورية وزي المحافظتين بتوع اكتوبر وحلوان بس متوقعتش يمدوه تاني والله مكنتش احلام يقظة ده في واحد في مجلس الشعب حلف بالطلاق ان قانون الطزارئ خلاص اخره مايو ومش حيتمد تاني
--------------------------------
قطة الصحراء
يعني كلكم كنتو متوقعين انهم يمدو حالة الطوارئ الا انا اللي كنت نايم ؟؟؟
---------------------------------
روينا
انتي لسة صغيرة يا بنتي وعندك مستقبل وعندك وحلم انك تشتغلي في حضانة احنا بنكتب وبنقول علشان نحقق الاحلام بتاعتك وبتاعتنا ربنا معانا
--------------------------------
رئيس جمهورية نفسي
الاستاذ محمود المحامي الكبير انا مليش دعوة بالاخوان ولا بحبهم ومليش دعوة بالمعارضة ولا عايز اعرفهم انا عايز اعرف بأي ذنب يعملو قانون متفصل علشان التوريث ليه يطلع ابن مين في مصر اللي حيورث يعني ؟؟
--------------------------------
تامر نبيل
كنت بتمني انهم يلغو حالة الطوارئ علشان يفرجو عن المعتقلين والواحد يعرف ياخد نفسه وياخد حقه من اي كلب لابس بدلة ميري
انا كان نفسي اشوفك في حفلة عمر بوك ستور بس ظروفي منعتني من الحضور انشاء الله حاجي اللقاء اللي جاي بس حد يقولي معاده أمتي
---------------------------------
طارق مؤمن
عايز اقولك ان الموضوع بقي خلاص يا حبيبي المجلس الموقر صدق علي القرار وخالتك ام طارق علي رأي أبي قاعدة معانا سنتين كمان وانكل فتحي سرور عملنا حركة وحشة بصباعه وطلع لنا لسنانه وقال باي باي كمبورة

اسلام صديق يقول...

الف مبروك ياباشا


وعقبال قانون الارهاب

رئيس جمهوريه نفسى يقول...

لو انا وانت الى محمد منير فى اغنيه اتكلمى بيقول عليهم
انا ابن كل الى صانك رمسيس واحمس ومينا كل الى زرعوا فى وادينا حكمه تضلل علينا
وليه تسكتى للزمن اتكلمى ليه تدفعى وحدك التمن اتكلمى وتنامى ليه تحت الليالى اتكلمى
دى المشربيه عيونك بتحخكى ع الى خونك جوالبيبان سلسلوكى وليه تسكتى
عرفت ولاد الشعب ولاد مين
وهو بيطلع ابن مين

الميكروباص يقول...

انا اتولدت سنه 78، وقانون الطواريء معنول به من سنة 81، وبعد الانتهاء منه سيتم تبديله بقانون مكافحة الارهاب، فالحمد لله اني لحقت من عمري 3 سنين لم يوجد بهم قانون للطواريء

غير معرف يقول...

طبعا ياتامر يرجع و يتمد كمان و كل مايخلص يمدوه سنه كمان

اوعي كنت مفكر انهم يلغوه؟

ده بقه شئ طبيعي في بلدنا
الحقيقه مابقتش بستغرب من اي حاجه غريبه بتحصل هنا
لو شوفت حاجه غريبه تبقي انت اكيد في مصر

:(

غير معرف يقول...

نسيت اقولك ياتامر ان مفيش اكتر من القوانين اللي بتتفصل علي حسب الحاجه و اعتقد ان الحكايه ديه بتحصل عندنا هنا كتير اوي

يوميات فنانه مفروسه جداا يقول...

أستاذ تامر انا قريت ردك علي التعليق باتعي ولاقيتك بتقولي يا ريت متكونيش شيطان اخرس اوكي انا معاك
انت بقي مش شيطان اخرس بتتكلم وتقول ومبيهمكش وبتثوور ها ايه النتيجه ولا حاجه استفادنا ايه غيرنا ايه برضو ولا حاجه .
افتكر كده ساعة هوجة غلاء الاسعار الناس عملت ايه هبهبو شويه ورضيو بالامر الواقع خلاص احنا بقينا شعب بيخاف يا تامر واشترو بالاسعار الغاليه وخلاص برضو

انا بغير المنكر بقلبي انا عارفه انه اضعف الايمان بس معنديش الاسططاعه اعمل اكتر من كده واما قولتلك لا اسمع لا اري لا اتكلم كانت علي سبيل الدعابه مش اكتر ولا اقل
وعلي رأي الشاعر اللي بيقول

أنا عياز اعيش معايا معاييش ميهمنيش

وبالنسبه للطوارئ مش هنقول غير
لله الامر من قبل ومن بعد

معلش طولت عليك
تقبل مروري
سلام

maYHam يقول...

ونصوط ليه

إحنا نفرح ونزقطط ونكن في يوتنا وندعي
ما هو الشعب د مش هيتحرك ألا بالكربجة... إحنا ناقص إيه يتعمل تاني فينا ... قريب الناس هتيع دهبها وعفش بيتها ... دا إحنا هنشوف أيام

Asmaa mahaba يقول...

هههه انا حنضم لتعليق غير معروف وحدعى عليهم على وش الفجر
يا ابنى الحكومه تمنع قانون يعدل الاحوال الاجتماعيه تلغى ممكن قانون يفيد الشعب لكن دا بالذات على هواهم
تحياتى ليك سومه_87

Asmaa mahaba يقول...

اه بعد ازنك بقول لرئيس جمهوريه ملوش دعوه بالمنايفه وبالزقات عيله حسبو وزقلط
مالهم المنايفه ما هم خاربينها اهو ميه ميه
تحياتى ليك واحده نوفيه بس مش ملوخيه
الله يرحمك يا عم انور يا مادبهم ومنك لله يا مشمتهم فينا

tamer.sala7 يقول...

الافغاني
انا عايز حد يصوط معايا مش حد يباركلي وقانون الارهاب ده حيبقي مصيبة علينا كلنا
--------------------------------
رئيس جمهورية نفسي
يبقي هو يطلع ابن مريكا
--------------------------------
لورنس
طيب انا نفسي في 3 ايام من اللي انت عيشتهم
بس معلومة ليك حالة الطوارئ اترفعت من مصر 18 شهر فقط ومش 3 سنين
----------------------------------
اجندا حمرا
والله كنت فاكرهم حيلغوه انما القوانين اللي بتتفصل دي عايزلها اسبوع الواحد يقعد يحكي عنها
----------------------------------
الفنانة المفروسة
انا مش عايزك تزعلي مني انا مقصدش خالص اللي انتي فهمتيه انا عارف ان انتي كنتي بتهزري بس الموضوع فعلا ان مصر كلها بقت شيطان اخرس وفي القت ده موضوع اضعف الايمان مبقاش ينفع لأن الحكومة زودتها اوي ويا ريت تقبلي اعتزاري تاني
---------------------------------
انا من كنت محتاج
الناس حتبيع عيالها مش دهبها
--------------------------------
سومة مجنونة
والله لو الحل اننا نعمل زي الغير معروف ونكشف راسنا انا عندي استعداد اكشف جسمي كله واحلق شعري كمان بس اي حاجة تتغير بس رئيس جمهورية نفسي مجبش سيرة المنايفة عندي مع ان انا صاحب فكرة ان اننا نعمل سور كبير بين المنوفية وبقيت المحافظات علشان تبطل تتحفنا بمجايبها وسبحان الله كلهم ماسكين منصاب في الدولة

tarek momen يقول...

والله يا ابو التمامير كل الشعب بيصوط بس لجوه
ومن حيث القلة المندسة عندي اعتقاد يصل الي درجة اليقين اننا كثرة مندسة في وسط قلة منتفعة
تيجي ازاي ما اعرفش