السبت، 10 مايو 2008

فاصل مأسوي من تاريخ مصر (حقبة مبارك - اخر 25 سنة )

ده تلخيص وافي شامل لما فعلته بنا الحكومات المصرية في عهد سيادة
الرئيس / محمد حسني مبارك

واللي خلاني انشر الانجازات دي سبب واحد هو ان انا كنت في مشوار في منطقة بعد مصطفي كامل كدة اسمها الوزارة لقيت يفط كتير اوي مكتوب نحن معك يا مبارك وحاجات بقي من اللي تجيب الضغط زي السياسة الحكيمة والريادة العربية وسدد الله خطاك واحنا كلنا معاك سألت يا جدعان هو الريس جاي ولا حاجة قالولي لأ ده انت قدام المقر الرئيسي للحزب الوطني الديمقراطي قولت طيب اليفط والحاجات اللي ناس عملنها حبا في الريس دي ليه ؟ قالولي دي مسيرة التأييد لرئيس مبارك من محبيه ( ليس منافقيه ) انا قولت طيب بتحبوه علي ايه يا ناس يا محترمة يمكن انا ابن كلب مش محترم او ناكر للجميل او بنسي علشان الزهايمر بقي موضة اليومين دول قالولي علشان الانجازات قولتلهم طيب هي فين الانجازات قالولي هي دي الانجازات خد عندك
بسم الله

إحصائات من مؤسسة الأهرام مصر ( مجدّدة )
اولا : الأحوال المالية
الفقر : 35% من الشعب تحت خط الفقر,( أقل من1 دولار في اليوم )
الجنيه المصري : الدولار= 85 قرش سنة1981م و 6 جنيهات سنة 2005 م
ثانيا : الأحوال الصحية
السرطان : تضاعف 8 مرات ..
أعلى نسبة في العالم الذبحة الصدرية :20 % من الحالات شباب تحت الأربعين
البلهارسيا : أعلى نسبة في العالم
السكر : ‏7‏ ملايين .. ‏10 %‏ تقريبا من عدد السكان
إلتهاب كبدي : 13 مليون.. 20 % من الشعب
فشل كلوي : أعلى نسبة في العالم
شلل الأطفال : موجود في 6 دول في العالم فقط منهم مصر
الإكتئاب : ‏20‏ مليون مواطن
أمراض نفسية ( أخرى) : ‏6‏ ملايين
التدخين : 80% من البالغين مدخنين
التلوث : أعلى نسبة في العالم...تلوث للهواء ومياه الشرب
الأحوال الاجتماعية
القضايا : 20 مليون قضية بالمحاكم ..أقدمها من 38 عام حتى الاّن
البطالة : 29% من القادرين على العمل..حوالي 5 مليون شاب
الأُمية ( المستقبلية) : 7% من الأطفال لا يدخلون المدارس بسبب الفقر ..غير الهاربين
بعد الدخول التعليم : دروس خصوصية ، كتب خارجية ، جامعات خاصة للربح فقط ( ودلوقتي حياخدو منهم ضرايب يعني المصاريف حتتضاعف )
عشوائيات : 45% من الشعب يسكن العشوائيات.. 35 منطقة عشوائية
( بالقاهرة فقط )
موظف الحكومة : تحت خط الفقر ويؤخذ منه ضرائب
مشاكل أخلاقية: رشوة، محسوبية، بلطجة، توريث المهن، عُري، زواج عرفي، قتل الأزواج، امتهان وتحرش بالنساء، ألفاظ بذيئة، صحافة جنسية ،غش جماعي ، جريمة و تسول
الأحوال السياسية
سيطرة وفساد النخبة الحاكمة، مراكز قوى، الإعداد لتوريث الحكم، تزوير انتخابات،قمع المعارضة،اعتقالات، تعذيب حتى الموت،انتهاك لحقوق الإنسان، إلغاء دور النقابات والجمعيات الأهلية
مشاريع قومية متوقفة او خاسرة
القضاء على الأمية قبل عام 2000 ، زراعة الصحراء الغربية بالقمح
(مشروع اليابان) وادي السليكون ،محطة الطاقة النووية، جامعة د/ أحمد زويل التكنولوجيا ، فوسفات أبوطرطور ,وادي توشكى ،أكثر من 2,3 مليار جنيه خسائر بشركات القطن و 8 مليارات جنيه خسائر شركات الغزل والنسيج و 12 مليار جنيه العجز الإجمالي لسكك حديد مصر، خسائر 10 مليارات جنيه بقطاع الإذاعة والتلفزيون
الفساد المجتمعي
فساد التعليم،أزمة إسكان، أزمة زواج ، بطالة، صحة، فساد أخلاقي ،غياب ضمير،أزمة مرور,انعدام المياه النظيفة ، مشاكل في الصرف صحي ، البناء على الأرض الزراعية ، تصحر، زحام ، غلاء, انخفاض احتياطي النقد
الأرض الزراعية: تم تجريف مليون و200 ألف فدان أرض خضراء من 5000 سنة من أصل 6 مليون فدان
الأمن والشرطة
قانون الطوارىء : 25 سنة طواريء ..في خدمة الشعب
القمع والاعتقلات لكل الشرفاء والمحاكمات العسكرية للمدنين
طبعا كل الحاجات دي جزء مش كل انجازات سيادة الرئيس محمد حسني مبارك ورجاله علشان كدة انا لسة بقول انا
ضد الحكومة

هناك 14 تعليقًا:

انين الحزن يقول...

اول زياره

واعتقد كدا اني اول كومنت

ممدونتك جرئيه جدا

بس اعتقد كدا ان طول ما حسني موجود والحكومه فضلت كدا هتفضل انت وكلنا ضد الحكومه

سلامووووووووز
وزة

عجباني اوي صورة البروفايل

Wael Salem يقول...

قول يا ريس قول
قول واشجيني
اعد يا عمي أعد


وداوشين أمنا بالضربة الجوية الأولي
كأنه هو اللي رجع سينا لوحده .

انت لسه ماذكرتش الرشوه والفساد والحيتان اللي ممسكهم البلد .
انا عارف ان الكلام ده جاي في الطريق

ماتحكيلنا حكاية أحمد عز وازاي من انسان مالوش في اي حاجه لأغني بني أدم في مصر واقوي راجل في مصر بعد المحروس وابنه؟

اه صحيح ابقي سلملي علي نوفل

Salma Amer يقول...

حقول اية
حسبي الله ونعم الوكيل

la3lahakhier يقول...

يا دى الغلب ادينى مستنية اهة بردوا سياسة
هههههههههه
كل التحية

Unknown يقول...

والله يا ابنى وانا رايحة الكلية يوم عيد ميلاد الكبير شفت يفط كتير كلها تمدح وتبجل الكبير كنت هاتشل كل دة نفاق وقرف حاجة تجيب اكتئاب والله المهم ان اللى زيك لازم يفوقوا اللى زيهم دة واجبنا والباقى على المولى...سلام يا ريس

موناليزا يقول...

اللهم ارفع غضبك ومقتك عنا

أنا حر يقول...

والله المفروض ياخد جايزة الفساد الاولى في العالم
بقى كل الفساد ده من شخص واحد وفي 25 سنة بس والله انجاز
تحياتي

Desert cat يقول...

يا فندم حضرتك بتقول شوفت اللافتات دى قدام مقر الحزب الوطنى
انا امبارح بالليل كنت فى الاسماعيليه وشوفت لافته مكتوبة بالخط العريض وانت داخل من عند اشارة المرور على البلاجات مكتوب عليه نحن معاك يا صاحب اول طلعه جوية يامعدى بينا لبر الامان ... امان مين يا ولاد المتضايقة بس استغرابى زال لما لاقيت تحتها اسم مرشح الحزب الوطنى
النفاق على مرأى ومسمع

tamer.sala7 يقول...

انين الحزن
بصي يا وزة المدونة مش جريئة بس الحكومة هي اللي بجحة
صورة البروفايل دي رمز لـ اللي الحكومة عايزة تعمله فينا الحكومة عايزنا كلنا نبقي زي الصورة دي عايشين بس بنتمني الموت
--------------------------
mohager
يا باشا الضربة الجوية دي الريس مشاركش فيها ولا عمل اي حاجة غير انه تفضل بالتوقيع علي امر اقلاع الطائرات الحربية ولو حتفتش وراه حيطلع في الاخر كمسري طيارة
الرشوة والحيتان اللي ممسكهم البلد دول بقي حفرجك عليهم قريب اوي وعلي حلقات
--------------------------
Salma Amer
مش كفاية انك تقولي حسبي الله ونعم الوكيل وتفضلي سايبها علي ربنا من غير ما نتحرك لازم نعمل حاجة ربنا لماذا أمر ستنا مريم ان تهز بجزع النخلة ؟؟ يعني هو مش قادر يخلي البلح ينزل عليها من غير ما تهز ؟؟ لازم الواحد يعمل علشان ربنا يقف معاه يعني لازم تهز النخلة مع العلم ان هي كانت ضعيفة ومش الهزة بتاعتها اللي حتخلي البلح ينزل عليها بس الفكرة ان هي تبقي عملت وده اللي المفروض احنا نعمله يعني اسعي يا عبد وانا اسعي معاك
-------------------------
la3lahakhier
مهو علشان الغلب لازم نتكلم ولازم نقول اللي جوانا وبعدين كل حاجة في حياتنا سياسة ومش لازم نبقي مهمشين لازم نكون علي دراية بكل اللي بيحصل
--------------------------
enjy
كل النفاق ده علي حسابنا احنا انا بالنسبةلي مش مشكلة ان واحد يعمل يافطة من جيب امه عادي جدا انما ياخد من فلوس الشعب وينافق بيها هو ده اللي مش لازم نسكت عليه
--------------------------
monaliza
اللهم امين
بس يا ريت تلاحظي انه لايغير الله بقوم ما لا يغيرو ما بأنفسهم والامام علي قال : لا ينزل الله بلاء الا بمعصية ولا يرفع الا بتوبة
-------------------------
أنا حر
مهو الجايزة دي حياخدها حياخدها انا مش عايزك تقلق وإنشاء الله انا اللي حديلو الخابور الذهبي
---------------------------
Desert cat
اللهم لا حسد مقضيها فسح علي الاخر(:
موضوع الضربة الجوية ده بقي دمه تقيل ولو هو صاحب الضربة الجوية ماهو برضه صاحب 27 سنة فساد بالنسبة لأبن المتضايقة بتاع الحزب الوطني اللي عمل اليافطة اللي بتقولي عليها مهو مش عاملها علي حساب المتضايقة يعني ده عاملها علي حساب الشعب اللي انا وانتي احد افراده

كاميليا بهاء الدين يقول...

اسكندراني وللاسف مصرى
.....

ده كلام؟
طيب يانبيل لو مش مصرى تحب تكون ايه؟
فكر كده؟
من دولة عربية او خليجية؟
طيب دولة اوروبية؟؟؟

افتكر مصرى من اصل مصرى احسن كتير

مع ان مدونتك مصرية صميمة

ابقي اسمع يا اغلى اسم فى الوجود

بلدنا حلوة
بس تروح عنها الغمة
امان وسلام
كفاية انك تقدر تنزل من بيتك فى اي وقت من غير خوف
مش تتحبس من تسعة مساءا
ولو نزلت يبقى معاك خريطة للاماكن اللى ممنوع تقرب منها

تحياتى واحترامى

tamer.sala7 يقول...

كاميليا
اولا اسمي تامر مش نبيل
ثانيا انا اقصد بللأسف مصري (اني ائسف علي اني مصري عاجز شايف حقي بيضيع قدامي ومش قادر امد ايدي اجيبه) شوية مرتزقة شغاليين عندي لحم كتافهم من ضرايبي انا واهلي وبيسرقوني
ثالثا انا لو مش مصري كان نفسي ابقي موريتاني وراجعي الاحداث الاخيرة لموريتانيا

جنّي يقول...

شرفني زيارتك لمدونتي وأتشرف بزيارة مدونتك ضد الحكومة ..
بداية أقول الاختلاف في الرأي لا يفسد للود قضية .. ولا أختلف معك في أنك ضد الحكومة فهذا شأنك وحريتك .. ولكني أختلف وبكل شدة في أن تكتب أنك مصري للأسف .. من يريد تغير الحكومة ومحاربة الفساد لابد وأن يعتز ببلده وجنسيته التي يحارب من أجل تغيرها للأجمل وتحويل الأرقام المخيفة التي ذكرتها إلى أرقام إيجابية ..
لقد قرأت تفسيرك لهذه الكلمة في ردك على أحد التعليقات ولكن هذا لا يكفي فإما تكتبه في الوضع الكامل الخاص بك أو تزيل كلمة للأسف .. كراهيتنا للحكومة لا تجعلنا نكره بلدنا .. بلدنا مش بلادهم .. واخد بالك ..
حاجة تانية معلش أرجو ألا يضيق صدرك
لماذا ترحب المدونة بالبذاءات ؟
الفطرة السليمة لا تسمح بالبذاءات .. وأنا أربأ بك من السماح بالبذاءات ..
شكرا عزيزي على سعة صدرك سلفا .. إن قبلت كلامي فبها ونعمت وإن رفضته فلك مطلق لحرية في إزالته بالضغط على السلة أسفل التعليق ..
أشكرك
said

Empress appy يقول...

يا ابنى ارحمنى يا ابنى طيب بالعند فيك هصور لك الحاجات دى واجى اسيبها لك هنا علشان اضايقك بقى وهتشوف

tamer.sala7 يقول...

جني
عجبني اوي اسلوبك في التعليق حسيت فيه بالبلاغة والفصاحة وذلك ما يدل علي انك كاتب جيد لذلك اريد ان تعزرني علي اسلوبي في الكتابة والرد علي العليقات بالصيغة العامية حيث انني لا املك من الفصاحة والبلاغة اي شئ
اولا احب اقولك اني مصري جدا واعتز ببلدي جدا جدا والدليل علي كدة اني جالي اكتر من فرصة للسفر برة ورفضت
ثانيا الارقام المخيفة دي منشورة في مواقع كتير ومدونات اكتر بنفس اللترتيب لكن ما فعلته هو تدعيم الموضوع بالدلائل من مصادره وربط الموضوع بوصلات مباشرة لتلك المصادر وهذه الارقام لن تتغير الا بتغيير الطاغية الدكتاتور
ثالتثا موضوع للاسف مصري انا فعلا كاتب كدة في البروفايل وده نصه ( زهقت من الحكومة المصرية بس لسة مزهقتش من مصر ) وافتكر ان الجملة دي فيها تفسير
رابعا موضوع بلدنا مش بلدهم ده انا بدأت اشك افيه اوي لأنها لو بلدنا كنا عرفنا نخرجهم لكن اللي بيحصل ده بيدل علي انها بلدهم مش بلدنا والدليل انك مش بتعرف تتخانق مع ضابط شرطة حتي لوكان الظابط ده برة الخدمة وعلشان كدة ناس كتير بتسافر برة مصر وبتعرض نفسها للموت غير ان كل الشرفاء بيسافرو برة خوفا علي اسرهم من بطش الحكومة والشرطة المصرية وأخرهم صاحب كتاب علشان ما تنضربش علي افاك الضابط الشريف / عمر عفيفي
خامسا المدونة ترحب بالبذاءات علي سبيل النفيس عن ما بصدورنا ناحية الحكومة وليس من باب السفالة غير اننا لسنا بلد الاكسلانسات فنحن افقر الشعوب ودئما الفقر يولد البذاءات أما موضوع الفطرة السليمة فده اتغيير من سنة 1981
اخيرا وليس أخرا شكرا علي النصيحة وارجو منك تكرار الزيارة
-----------------------------
appy
تصدقي بالله انا بدأت اصدق انك من القلة المندسة يعني روز اليوسف تقول عليكي مكبوتة تيجي تطلعي كبتك عليا (((: والله لو صورتي الحاجات دي حبعت تلغراف صغير لروز اليوسف واخليهم هم يتصرفو معاكي يا مكبوتة P: