يعني كان نفسي اقول اوبجكشن

الموضوع ده حيغطي علي تقرير الفضايح بس معلش مش قادر اسكت
كالعادة اليومية كل يوم اتصفح الجرايد المعارضة والمستقلة فقط هوب بقي انهاردة قوم ايه لقيت الخبر ده
اليوم العالمي للصلاة بمصر يدعو لمبارك "بأن يثبت الله حكمه سنين مديدة".. والبياضي يقول إن أمانة السياسات تعمل من أجل مصر 24 ساعة
وبقلب تاني لقيت الخبر ده كمان
10 آلاف كاثوليكي وإنجيلي يدعون لـ«مصر» والرئيس مبارك في يوم الصلاة العالمي.. وغياب تام للكنيسة الأرثوذكسية
مبدهاش بقي الواحد لازم يتكلم يعني الناس دي عايزة تعمل فينا ايه يعني شيخ الازهر ومن زمان عارفين ان هو اصلا كان كلب حكومة و بيفصل فتاوي علي مزاجهم طيب والاقباط حتي الكنيسة وصل بيها الحال انها تتفنن في الدعارة الدينية المبتذلة ؟؟ يعني خلاص لجنة السياسات اللي هتنقذ سفينة الوطن الناس دي متعرفش ان سفينة الوطن غرقت الناس دي متعرفش ان الشعب المصري مسيحين ومسلمين كلهم متنيلين زي بعض
الناس دي فاكرة ايه ؟؟ هو جمال مبارك ده اتبهدل زي اي شاب مصري ؟؟ جمال مبارك ده دخل جيش ومسك خدمة في عز البرد ولا طلع مأمورية في عز الشمس ؟؟ جمال مبارك ده داخ مع السماسرة علي شقة ايجار جديد ؟؟ الاجابة علي كل الاسئلة دي طبعا لالالالالا
طيب ازاي واحد معملش اي حاجة من اللي بيعملها المصريين العاديين هيحس بيهم ؟؟ ازاي واحد ملهوش اي صفة في الدولة غير انه يبقي ابن الرئيس يتحكم فينا كدة ويخلينا كمان ندعيله علي المنابر وفي الكنايس ؟؟ ازاي مصر تبقي الدولة الوحيدة اللي فيها منصب رسمي اسمه ابن سيادة الرئيس ؟؟
ازاي الدكتور / صفوت البياض رئيس الطائفة الإنجيلية يقحم الدين في السياسة للدرجة دي وازاي تتعمل صلاة جماعية والبابا شنودة نفسه ميبقاش هو اللي متقدم القداس ؟؟؟ انا مش فاهم اوي في المجتمع الكنسي المسيحي بس اللي انا فهمته ان اللي اتعمل ده غلط ومينفعش يصدر عن قس زي الدكتور البياضي وبرده مش لازم نسكت علي كدة لأن لو سكتنا حنلاقي ان خطبة الجمعة موضوعها تحليل التوريث والاخوة الاقباط في مدارس الاحد حيعلموا الاطفال السلبية والتأقلم علي عدم رد الفعل والقمع بس كويس ان في ناس زي الدكتور بطرس فلتاؤوس رئيس الطائفة المعمدانية الكتابية الأولى وده يعتبر الوحيد اللي رد علي الدكتور البياضي انا معرفش حد مسيحي حر غير مينا ذكري ويا ريت مينا يفهمني ايه اللي بيحصل في الكنيسة لأن من فترة كدة البابا شنودة كمان صرح بأن الرئيس مبارك هدية من ربنا يجب الحفاظ عليها
انا عن نفسي مش راضي ولا عن البابا شنودة ولا عن شيخ الازهر لأن كلهم دلوقتي بقو حكومة وانا طول عمري ضد الـحـكـومـة